ავტომობილის 5 ყველაზე გავრცელებული პრობლემა

ავტომობილის 5 ყველაზე გავრცელებული პრობლემა. 

სულ რამოდენიმე წუთით მაინც რომ დავფიქრდეთ თუ რამდენი ემოციის, თავგადასავლისა და სანახაობის გამზიარებელია ჩვენთან ერთად ავტომობილი, ალბათ უფრო მეტად შეგვიყვარდებოდა და ვიზრუნებდით მასზე, რადგან სწორედ ის არის ის ერთადერთი მეგობარი, რომელიც ყველგან გამოგყვება, იზრუნებს შენს კომფორტზე, დაგიცავს სხვადასხვა გარემო-ფაქტორებისა და კლიმატური პირობებისგან, ან სულაც დაგელოდება სანამ შენს საქმეებს დაასრულებ და ისევ დაბრუნდები მასთან.

ეს ყველაფერი კარგია, მაგრამ მის ორგანიზმსაც, ისევე, როგორც ჩვენ, პერიოდულად აწუხებს სხვადასხვა რამ ან უბრალოდ რაღაც პერიოდულობით საჭიროებს პროფილაქტიკურ შემოწმებას, რომელთა უგულებელყოფა შესაძლოა საზიანო იყოს მისი სიცოცხლისუნარიანობისთვის.
ამ ბლოგშიც სწორედ ავტომობილის 5 ყველაზე გავრცელებულ პრობლემებზე გვინდა გესაუბროთ.

სამუხრუჭე ხუნდები: ავტომობილის ხუნდი არის ის ერთ-ერთი მნიშვნელოვანი დეტალი, რომელიც არამარტო ჩვენს, არამედ მოძრაობის სხვა მონაწილეების უსაფრთხოებაზეც აგებს პასუხს. ამიტომ, თუ თვლით, რომ თქვენს ავტომობილს ძველებურად აღარ აქვს ეფექტური სამუხრუჭე მანძილი ან შენელებისას გამოსცემს არასასიამოვნო ხმას, მაშინ თქვენი ავტომობილის ხუნდები შესაცვლელია.

აკუმულატორი: მისი დანიშნულებაა ავტომობილს საჭირო რაოდენობის ელექტრო ენერგია მიაწოდოს, რათა მან გამართულად და შეუფერხებლად ფუნქციონირება შეძლოს. მასაც ისევე როგორც სხვა დეტალებს თავისი საექსპლუატაციო ვადა აქვს და მის სიცოცხლისუნარიანობაზე მრავალი ფაქტორი მოქმედებს მათ შორის ტემპერატურული ცვალებადობა, როგორც სიცხე, ასევე სიცივე. ასე რომ, თუ თქვენს ავტომობილს დასაქოქად ერთზე მეტი ცდა სჭირდება ან სულაც კაპოტის ახდისას მოულოდნელად გაფუჭებული კვერცხის სუნს იგრძნობთ და აკუმულატორის დადებით და უარყოფით პოლუსზე თეთრ ან მოცრისფრო ნადებს შეამჩნევთ, ე.ი მისი შეცვლის დრო დადგა.

აალების სანთლები: ე.წ ,,სვეჩები“ ავტომობილის ძრავის მნიშვნელოვანი კომპონენტებია, რომლებიც უზრუნველყოფენ მის გამართულ და სტაბილურ მუშაობას და ამასთანავე სიმძლავრის სრულად გამოყენებას. მათი გაუმართაობის ნიშნებია, საწვავის ხარჯის ზრდა, აქსელერატოლის პედალზე დადგმისას აჩქარებისა და სიმძლავრის შემცირება. თუმცა ყველაზე მკაფიო და ადვილად შესამჩნევი ნიშანია, ადგილზე დაქოქილ მდგომარეობაში ყოფნისას ბრუნების ამთვლელი ისარი არ არის ერთ კონკრეტულ ნიშნულზე გაჩერებული( როგორც წესი, დაახლოებით 0.7-0.9) და მომენტალურად იკლებს ან იმატებს.

არასათანადო წნევა საბურავებში: თანამედროვე ავტომობილების მონაცემთა დაფაზე მრავალი ინფორმაციის გაგებაა შესაძლებელი, მათ შორის ერთ-ერთი სწორედ საბურავებში არასათანადო წნევის მანიშნებელია. არასაკმარისმა წნევამ შესაძლოა გამოიწვიოს საბურავის არათანაბარი ცვეთა, საჭის რომელიმე მიმართულებით უფრო მეტად დახრა და ამასთანავე საწვავის მოხმარების ზრდა.

საქარე მინის საწმენდი სითხე: ალბათ ყველა დამეთანხმებით, რომ მინამწმენდების სითხის შევსება ხშირად გვავიწყდება და მხოლოდ მაშინ გვახსენდება, როდესაც მათი გამოყენების აუცილებლობა დგება. ამ თითქოს ნაკლებად პრობლემატურმა და უწყინარმა საკითხმა შესაძლოა სერიოზული პრობლემა გამოიწვიოს, რადგან როგორც მინამწმენდები, ასევე სითხე ერთობლივად უზრუნველყოფენ ჩვენი მხედველობის არეალის გაწმენდას.

გაითვალისწინეთ ზემოაღნიშნული პრობლემები და დროულად იზრუნეთ მათ მოგვარებაზე, რათა თქვენი ავტომობილი დიდხანს და ერთგულად გემსახუროთ.

ამბოლი, მეტი დრო მოძრაობისთვის!