ყოველი ახალი მოხვედრა საჭესთან მორიგი გამოცდილებაა. ავტომობილის მართვისას აუცილებელია მაქსიმალურად ორიენტირებული ვიყოთ დეტალებზე, იქნება ეს მოძრაობის სხვა მონაწილის მანევრი თუ უბრალოდ საგზაო ნიშნებზე დაკვირვება. თუმცა ხშირია შემთხვევები, როდესაც მძღოლები უდიერად იქცევიან მართვისას და არ ითვალისწინებენ ამა თუ იმ წესებს და შესაბამისად მათ მიერ გამოწვეულ შესაძლო შედეგებს.
ამ ბლოგში გვინდა გესაუბროთ რამდენიმე უხეშ დარღვევაზე, რომელთა დაშვებამაც შესაძლოა ცუდი შედეგები მოიტანოს, როგორც საკუთარი, ასევე სხვისი ჯანმრთელობისა თუ უსაფრთხოების მხრივ.
არასდროს მართოთ ავტომობილი მაშინ, როდესაც გადაღლილი ხართ ან გეძინებათ. თუ მართვისას მსგავს სიტუაციაში აღმოჩნდით, აუცილებლად მოძებნეთ უახლოესი გასაჩერებელი ადგილი, სადაც უსაფრთხოთ შეძლებთ დასვენებას საჭირო დროით და ამასთანავე არ შეუშლით ხელს მოძრაობის სხვა მონაწილეებს. მოძრაობა განაგრძეთ მას შემდეგ, როდესაც დარწმუნდებით, რომ საკმარისად გამოიძინეთ ან დაისვენეთ, წინააღმდეგ შემთხვევაში შესაძლოა ყველაფერი ცუდად დასრულდეს.
არასდროს დაჯდეთ საჭესთან რაიმე სახის თრობის საშუალების ზემოქმედების ქვეშ მყოფი, იქნება ეს ალკოჰოლური სასმელი თუ სხვა რამ. რადგან ასეთ დროს მძღოლს აქვს არასათანადო რეაქცია ავტომობილის მართვისას. ადამიანი მსგავს სიტუაციაში ჩვეუებრივზე გვიან და შენელებულად აღიქვამს მოვლენებს.
არასდროს მართოთ საჭე ერთი ხელით, რადგან მრავალი კვლევების შედეგად დადასტურდა, რომ მსგავსი მართვის სტილი, მოულოდნელ და სახიფათო სიტუაციაში არ იძლევა ეფექტური მანევრირების საშუალებას, რათა თავიდან ავიცილოთ საფრთხე. ნაცვლად ამისა ეცადეთ საჭე ორივე ხელით მართოთ ე.წ 9 და 3-ის პოზიციაზე. ანუ რომ წარმოიდგინოთ საჭე როგორც საათი და შესაბამისად მარცხენა ხელი 9საათის მიმართულებაზე, ხოლო მარჯვენა კი 3-ის. ასე ბევრად უფრო კარგად მართავთ ავტომობილს და საჭირო დროს მანევრირებაც ეფექტურია.
არასდროს მართოთ უხეშად. ხშირია შემთხვევები, როდესაც მძღოლები ამა თუ იმ მიზეზით არ ემორჩილებიან საგზაო ნიშნებსა თუ დაწესებულ ლიმიტებს და მათ უხეშად არღვევენ, აჭარბებენ სიჩქარეს, შუქნიშნის წითელ სიგნალზე არ აჩერებენ, კვეთენ ღერძულა ხაზს და საფრთხეს უქმნიან როგორც საკუთარ, ასევე საპირისპირო მიმართულებით მოძრავ ავტომობილს.
გაითვალისწინეთ ზემოააღნიშნული რჩევები, ეცადეთ დაიცვათ მოძრაობის წესები და იყავით მაქსიმალურად დაკვირვებული და ორიენტირებული ავტომობილის მართვისას, რათა თქვენს ან მოძრაობის სხვა მონაწილის მიერ დაშვებული შეცდომის შედეგად მოახლოებული საფრთხე დროულად აიცილოთ თავიდან.
გისურვებთ მშვიდობიან მგზავრობას.
ამბოლი, მეტი დრო მოძრაობისთვის!