ზამთრის სეზონსაც, ისევე როგორც, წელიწადის ყველა დროს თავისი ხიბლი აქვს და ალბათ, უმრავლესობა ჩვენთაგანისთვის ერთ-ერთი საყვარელი პერიოდია. მის მოახლოებასთან ერთად, გვახსენდება ბავშვობაში გატარებული სასიამოვნოდ მოსაგონი პერიოდი, თოვლი, თხილამურებით სრიალი ჩვენს საყვარელ ზამთრის კურორტზე და სხვა ბევრი რამ.
თუმცა ზამთრის სეზონმა, უხვმა ნალექმა, ყინვამ და ცივმა ამინდმა შესაძლოა მრავალი გაუთვალისწინებელი პრობლემა შეგვიქმნას ჩვენ და ჩვენს საყვარელ ავტომობილს.ამ ბლოგშიც სწორედ ამ საკითხზე გვინდა გესაუბროთ და ჩამოვთვლით 5 მნიშვნელოვან ნივთს, რომელიც აუცილებლად უნდა გვედოს ავტომობილში ზამთრის სეზონზე.
ყინულის საფხეკი და თოვლის ჯაგრისი:
ეს არის ერთ-ერთი მნიშვნელოვანი რამ, რაც აუცილებლად უნდა შევინახოთ ავტომობილში ზამთრის პერიოდში. რადგან, ყველამ კარგად ვიცი, რომ ხშირია შემთხვევები, როდესაც სინოპტიკოსების მიერ ნავარაუდები ამინდი ხანდახან არ ამართლებს. ამიტომ, დილით, სამსახურში წასვლის წინ შესაძლოა რამდენიმე სანტიმეტრის სისქის თოვლი დაგვხვდეს ავტომობილზე. ასეთ დროს მარტივად შევძლებთ სპეციალური ჯაგრისის საშუალებით თოვლისგან გავასუფთაოთ ავტომობილი. ეს აუცილებელი პროცედურაა, რადგან თოვლის მასა შეგვიზღუდავს მხედველობის არეალს, რაც შესაძლოა ავტოსაგზაო შემთხვევის მიზეზი გახდეს.
ნიჩაბი:
კარგი იქნება თუ საბარგულში პატარა დასაკეცი ნიჩაბი გვექნება. რადგან თოვლში გადაადგილებისას შესაძლოა ავტომობილი მოულოდნელად გაჩერდეს და ვერ შეძლოს თოვლის საფარისა და ყინულის დაძლევა. ასეთ დროს, ნიჩაბი დაგვეხმარება საბურავებთან დაგროვილი თოვლი მოვაშოროთ და განვაგრძოთ გზა უსაფრთხოდ.
პლედი და თბილი ტანსაცმელი:
თუ ქალაქგარეთ გეგმავთ გასვლას და წინ დიდი გზა გელით, მაშინ აუცილებლად გაითვალისწინეთ და ავტომობილში იქონიეთ თბილი პლედი და ტანსაცმელი, რადგან შესაძლოა გაუთვალისწინებელი შემთხვევის გამო თქვენი ავტომობილი მწყობრიდან გამოვიდეს და ზამთრის ცივ ამინდში კარგა ხანს მოგიწიოთ ლოდინი, სანამ თქვენს დასახმარებლად მოვლენ.
აკუმულატორის დასაქოქი კაბელები(ე.წ ,,პერემიჩკები“):
დასაქოქი კაბელები აუცილებელი ატრიბუტია, რაც ისედაც უნდა გვედოს ავტომობილში და განსაკუთრებით ზამთრის პერიოდში, რადგან დაბალი ტემპერატურა უარყოფითად მოქმედებს აკუმულატორზე, რამაც შესაძლოა მისი მწყობრიდან გამოსვლა გამოიწვიოს. ე.წ. ,,პერემიჩკების“ საშუალებით კი მარტივად დავქოქავთ ავტომობილს.
პირველადი დახმარების ნაკრები:
ესეც, ისევე როგორც დასაქოქი კაბელები, აუცილებლად უნდა გვედოს ავტომობილში. ზამთრის სეზონზე გახშირებული ავტო საგზაო შემთხვევების დროს ის დაგეხმარებათ როგორც საკუთარ თავს, ასევე მოძრაობის სხვა მონაწილეს აუცილებელი პირველადი სამედიცინო დახმარება გაუწიოთ. რადგან უხვა ნალექმა და ყინვამ შესაძლოა შეაფერხოს სასწრაფო დახმარების ჯგუფის დროული მოსვლა.
გაითვალისწინეთ ზემოაღნიშნული რჩევები, გისურვებთ მშვიდობიან მგზავრობას.
ამბოლი, მეტი დრო მოძრაობისთვის!