ავტომობილის მართვის 5 რჩევა ზამთრის სეზონზე


ავტომობილის მართვის 5 რჩევა ზამთრის სეზონზე

16 დეკემბერი 2022 / 15:14

ზამთრის ცივ დღეებში ავტომობილით გადაადგილება გარკვეულ სირთულეებთანაა დაკავშირებული. ეს ეხება, როგორც ქალაქში, ასევე ქალაქ გარეთ გარკვეულ დისტანციაზე გადაადგილებას. მოძრაობას თავისთავად უხვი ნალექი და დაბალი ტემპერატურის შედეგად მოყინული გზა ართულებს. ასეთ დროს მძღოლის მიერ მაქსიმალური ყურადღება და მართვის სპეციფიური სტილია საჭირო, რათა დროულად მოხდეს საშიშროების თავიდან აცილება.

ამ ბლოგშიც სწორედ 5 ძირითადი რჩევა გვინდა გაგიზიაროთ, რომელიც დაგეხმარებათ და გაგიადვილებთ ზამთრის ცივ ამინდში მგზავრობას, რათა თქვენ და თქვენი თანამგზავრები უსაფრთხოდ მიხვიდეთ დანიშნულების ადგილამდე.

პირველი რაც აუცილებლად უნდა გავაკეთოთ, ეს თოვლისგან ავტომობილის გასუფთავებაა. გასაგებია, რომ სიცივეში ამ პროცედურის ჩატარება ნამდვილად არ არის სასიამოვნო, თუმცა უსაფრთხოებისთვის აუცილებელია. საჭესთან დაჯდომისას დარწმუნდით, რომ რომელიმე ხედვის არე დაფარული არ არის. წინააღმდეგ შემთხვევაში შესაძლოა მანევრირების დროს მოძრაობის სხვა მონაწილე ან რაიმე დეტალი დროულად ვერ შეამჩნიოთ, რაც დიდი ალბათობით ავარიის მიზეზი გახდება.

მართვისას აუცილებლად შეამცირეთ სიჩქარე, უმჯობესია თუ დასაშვებზე ნაკლები სიჩქარით ივლით. მკვეთრად არ დააჭიროთ აქსელერატორის პედალს, რამაც შესაძლოა ავტომობილის მოცურება გამოიწვიოს, ნაცვლად ამისა, ნელა და თანაბრად მოუმატეთ სიჩქარეს. ზუსტი სიჩქარე, რომლითაც უნდა გადავაადგილდეთ დამოკიდებულია გარემო პირობებზე, იმ შემთხვევაში თუ თოვს და გზა მოყინულია, უმჯობესია 50კმ/სთ-ს არ გადააჭარბოთ.

აუცილებლად გაზარდეთ მანძილი და დაიცავით მინიმუმ 5-6 წამის დისტანცია თქვენს წინ მიმავალ ავტომობილთან. ეს საკმარისია იმისთვის, რომ საჭირო მომენტში დროული რეაგირება შეძლოთ. რაც შეეხება იმას, თუ როგორ გავთვალოთ წამებში დისტანცია, ეს მარტივია. პირობითად ათვლის წერტილად აიღეთ გზის პირას მდგარი ხე, განათების ბოძი ან რაიმე სხვა. როდესაც თქვენს წინ მიმავალი ავტომობილი მას ჩაუვლის ამის შემდგომ დაიწყეთ დათვლა, სანამ თქვენც არ გაცდებით ათვლის წერტილს.

არ მართოთ უხეშად, ნელა დააჭირეთ როგორც მუხრუჭს, ასევე აქსელერატორის პედალს, ამით თავიდან აიცილებთ ავტომობილის მოცურებას. ამასთანავე საჭესაც ნელ-ნელა შეუცვალეთ მიმართულება, რათა კონტროლი არ დაკარგოთ.

თუ მართვისას კონტროლი დაკარგეთ და თქვენი ავტომობილი მოულოდნელად მოცურდა, ასეთ შემთხვევაში აუცილებლად შეამცირეთ სიჩქარე და არ გამოიყენოთ მკვეთრად მუხრუჭი ამან შესაძლოა უარესად მოაცუროს ავტომობილი. ნაცვლად ამისა, რომელ მხარესაც მოცურდება ავტომობილი, იმავე მიმართულებით მოაბრუნეთ საჭეც, ასეთ შემთხვევაში უფრო მალე დაიბრუნებთ კონტროლს.

P.S: თუ ამინდი მკვეთრად გაუარესდა და ნალექს ქარბუქიც თან დაერთო, მაშინ აუცილებლად მოძებნეთ პირველივე უსაფრთხო ადგილი სადაც დროებით გაჩერდებით, სანამ ამინდი არ გამოსწორდება. ჰო და კიდევ, თუ დიდი ხნით მოგიწიათ გაჩერება აუცილებლად ყოველ ერთ საათში მინიმუმ 10 წუთით მაინც დაქოქეთ ავტომობილი.

გაითვალისწინეთ ზემოაღნიშნული რჩევები, გისურვებთ მშვიდობიან მგზავრობას.

ამბოლი, მეტი დრო მოძრაობისთვის!