Lexus NX Mercedes GLA-ს ჯობია?


25 ოქტომბერი 2018 / 18:04

თბილისურ პირობებში სულ უფრო მოქნილი და კომფორტული ხდება პრემიალური კომპაქტური კროსსოვერი, განსაკუთრებით გამომწვევ და ღია ფერებში. თუ თქვენ ჩემსავით გიწევთ საზოგადოებრივი ტრანსპორტიდან ქალაქის თვალიერება, მარტივად შენიშნავთ, კომპაქტური კროსოვერების პოპულაციას.

უდავოა, რომ Mercedes ქართულ ბაზარზე ლიდერია, თუმცა ეს იმას არ ნიშნავს, რომ მხოლოდ მას ჰყავს საუკეთესო კროსსოვერები. საპირისპირო კონტინეტნის წარმომადგენელი აშკარად ამბიციურად არის განწყობილი, რომ ავტომოყვარულთა გულები დაიპყროს, და იცით, მას ეს უკვე ნელ-ნელა გამოსდის. საუბარია Lexus-ზე, კონკრეტულად კი მის პატარა NX-ზე.

პარადოქსია, მაგრამ იაპონელებმა ბაზრის დაპყრობა მაღალი ფასით მოინდომეს და ამით გერმანელებთან ერთად დანარჩენი მსოფლიოც გააოცეს. მაგალითად, წინა წამყვანიანი Mercedes GLA 200-ის ფასი 85 ათასი ლარიდან იწყება, ხოლო NX 200-ის 90 ათასიდან. თუმცა ეს მხოლოდ დასაწყისია, რამდენადაც Mercedes-ის ოფციებისა და კომპლექტაციების დამატების შემთხვევაში, რომლებიც დამიჯერეთ, ისეთივე უსაზღვროა, როგორც თქვენი ფანტაზია, ფასსაც რიგიანად ზრდის. გარდა ამისა, პატარა GLA-ს AMG-ის მიერ შესრულებული 45, დაახლოებით 189 ათასი ლარი ღირს. Lexus ამ შემთხვევაში თავის ტოპ ძრავიან NX300h-საც ვერ დაუპირისპირებს გერმანელ კონკურენტს, როგორც სიმძლავრით, ასევე ფასით - მაქსიმუმ 170 ათასი.

 

 

დღეს ყველაზე პოპულარული GLA 250-ია, რომლის ღირებულება 90 ათასი ლარიდან იწყება და მფლობელს 211 ცხენის ძალას სთავაზობს, თუ არ ვიქნებით გულუბრყვილოები, ისიც უნდა ვიცოდეთ, რომ მყიდველი მინიმუმ 2000 ლარის ოფციებს დაამატებს. Lexus-ის შემთხვევაში და ამ ფასში თქვენ ყველაზე მეტი 150 ცხენის ძალიან, ღარიბი კომპლექტაციის NX 200-ს იყიდით. ეს კიდევ საპატიებელია, მაგრამ ის ფაქტი, რომ ამავე ფასში თქვენს “ლექსუს” ექნება ლოკოკინასავით ნელი ვარიატორი, ხოლო “ბენცს” ორმაგ კონუსიანი 7 სიჩქარიანი გადაცემათა კოლოფი - უკვე სამარცხვინოა.

 

 

მაშ ასე, ფასში გამარჯვებული და აშკარა ფავორიტი Mercedes-ია.

 

თუ თქვენ გინახავთ Mercedes-ის A კლასი, რთული არ იქნება მიხვდეთ, რომ GLA-ს სწორედ მისი დიზაინი უდევს საფუძვლად. რა თქმა უნდა, A კლასს დასაწუნი არაფერი აქვს, მაგრამ რბილად რომ ვთქვათ ეს უფრო კლასიკური ფორმისაა, ვიდრე თანამედროვე, ამბიციური მანქანის.

 

Mercedes A class

 

აი, NX-ის შემთხვევაში შეგიძლიათ წარმოიდგინოთ ანტიკური ხანის ბერძნული ქანდაკებები, რომელიც ადამიანის სხეულის ფორმების კონტურებს უსვამდა ხაზსს და მათ ბუნებრიობას გამოკვეთდა. მოეშვით, კონსერვატიულო გერმანელებო. ამ მოდელებს არ იყიდის შუა ასაკის ადამიანი, ეს არის ახალგაზრდული პატარა სიგიჟე ან ქალური სინაზე, თქვენ კი არც ოქროს შუალედი გაქვთ და მითუმეტეს, არც ერთისკენ ხართ რადიკალურად გადახრილი. ასე რომ აქ ჩვენ იაპონელებს ვაძლევთ უპირატესობას, თუმცა დარწმუნებული ვარ, მეთუნუქეები მათ დიზაინერებს მთელი გულით უსურვებენ “წარმატებებს” ხოლმე.

 

შევიხედოთ შიგნით, გასაკვირი არაა რომ ორივე მანქანა მდიდრულად გამოიყურება, თუმცა სივრცის უპირატესობა უკანა სავარძლებზე NX-ში თვალსაჩინოა. სწორედ აქ უნდა ვაღიარო ის ფაქტი, რომ GLA-ს პირდაპირი კონკურენტი Lexus UX არის, თუმცა ის ჯერ არ გამოჩენილა ბაზარზე, ასე რომ იძულებით ვადარებთ გაბარიტულად ოდნავ დიდ NX-ს. მერსედესის გულშემატკივრებმა არ მოიწყინოთ, წინა სავარძლებზე საპირისპირო სიტუაცია დაგვხვდა. არ ვიცი რამდენად კარგად შეასრულეს თავის მოვალეობა გერმანელმა დიზაინერებმა, რა მოიფიქრეს მათი მექანიზმივით მომუშავე ტვინებით, მაგრამ სივრცე ამ პატარა GLA-ში მინიმუმ მძღოლისთვის მაინც იქნება. Lexus-ში კი მძროლი ფაქტობივად მიკრულია საჭესა და სავარძელს შორის.

 

 

მიუხედავად იმისა, რომ ჩემი სიმპატიები ყოველთვის მერსედესისკენ არის მიმართული, ინტერიერის მასალა Lexus-თან შედარებით, სრული ნაგავია! ძვირფასი მატერია, უზუსტესად დამუშავებული დეტალები შეუიარაღებელი თვალითაც ჩანს. უბრალოდ მიადეთ თითები კარების ხეს და მიხვდებით რაზეც ვსაუბრობთ.

 

ცოტა გართულდა სიტუაცია, უკანა სივრცე იაპონელებთან მეტია, წინა - გერმანელებთან, ინტერიერით კი კვლავ იაპონელები ჯობიან და ამრიგად ანგარიში გათანაბრდა 2-2.

 

სალონის “შეიარაღებას” რაც შეეხება… ყველაფერი დამოკიდებულია კომპლექტაციებზე, ასე რომ ცალსახა პასუხის გაცემა პრაქტიკულად შეუძლებელია რომელია უკეთესი. მაგრამ უნდა აღინიშნოს, რომ მულტიმედიის დისპლეი გაცილებით დიდია “ლექსუსში”, ინტერფეისი მარტივია, ასევე სენსორულია. იაპონელის შემთხვევაში შეგიძლიათ შეუკვეთოთ საქარე მინის გათბობა, Mercedes-ის შემთხვევაში ეს ოფცია მიუწვდომელია.

 

რაც შეეხება უსაფრთხოების სისტემას გერმანელებს თავის მანქანაში ინტეგრირებული აქვთ Pre Safe, ხოლო იაპონელებს Lexus Safety System+, რაც პრაქტიკულად თანაბარი შესაძლებლობებით არის აღჭურვილი და რომელიმის უპირატესობა გამოკვეთილი არ არის. ორივეს შეუძლია საგანგებო ვითარების დროს მკვეთრი დამუხრუჭება. ამრიგად აქ ჩვეულებრივი ფრე გვაქვს.

 

211 ცხენის ძალიან GLA 250-ს 100-მდე დაახლოებით 6.6 წამი სჭირდება, NX 300-ს, რომელსაც კაპოტის ქვეშ 238 ცხენის ძალა აქვს 0-100-მდე 7.1 წამს ანდომებს, რაც იმას ნიშნავს, რომ გერმანელებს ამ შემთხვევაში კოლოსალური უპირატესობა გააჩნიათ.

 

აქ კიდევ ერთ მწარე რეალობას ვაწყდებით. ხომ გახსოვთ, GLA 250-ის საფასურად ჩვენ მაქსიმუმ NX 200-ს ვყიდულობთ. ეს უკანასკნელი ატმოსფერული ძრავით 150 ცხენის ძალას ვაი-ვაგლახით გამოიმუშავებს და 100-მდე ჩქარდება… 12.3 წამში, რაც უსასრულობაზე ოდნავ ნაკლებია.

 

სვლაშიც განსხვავებულობაა. გერმანელი აგრესიულ შთაბეჭდილებას ტოვებს, ერგება უშუალოდ მძღოლს. საოცარი მანევრირების უნარი, მარტივი მართვა, მოსალოდნელი რეაქციები მაღალ სიჩქარეზე.

 

Lexus შედარებით რბილია, უკეთესი ხმისიზოლაციით, მინიმუმამდე ჩახშობილია ყველა ის ხმა რაც მძღოლს, მანქანასა და გზას აკავშირებს. ლექსუსით არ დადიხარ, თითქოს სახლში ხარ და ისვენებ.

კომფორტის მოყვარულები აუცილებლად უპირატესობას იაპონელს მიანიჭებთ, ვისაც უყვარს აქსელერატორით თამაში - გერმანელს. ასე რომ ამ შემთხვევაში მოყვარულზეა, ხომ იცით, კაცია და ბუნება… თუმცა ჩემთან “ბენცის” შესაძლებლობები უფრო ახლოს არის.

 

აჩქარებისა და სამუხრუჭე დინამიკით Mercedes თავით მაღლა დგას. წრეზეც და სპრინტზეც უკეთესად სწორედ GLA გამოიყურება.

 

სიმართლე რომ გითხრათ, უგზოობაზე GLA უბრალოდ საშინელებაა, off road პაკეტის შემთხვევაშიც კი (შედარებით მაღალი კლირენსი). ჩვენი ქვეყნის გზების გათვალისწინებით, განსაკუთრებით კი რეგიონებში, ბევრად კარგი ვარიანტია NX. რა თქმა უნდა არც ის მოგცემთ საოცარ კომფორტს, თუმცა GLA-ს აჯობებს

.

რაც შეეხება უგზოობაზე სვლას, როგორც არ უნდა გაგიკვირდეთ ორივე კარგად დადის და სანამ მათი გეომეტრიული შესაძლებლობები საშუალებას მისცემს, მანამდე თავდაჯერებულად ივლიან… რა იქნება მერე, წარმოდგენაც არ მინდა. თუმცა მცირე უპირატესობას აქ Mercedes მივცემდი. ხოლო რამდენადაც არც ერთი მათგანი არ არის უგზოობისთვის მოვლენილი, ფრე სამართლიანი იქნება.

 

თუ დაუკვირდით, სტატიის ერთ მომენტში ქულების დათვლა შევწყვიტე, არა იმიტომ რომ NX წინ გავიდა, არამედ ბევრი კომპონენტი მოყვარულსა და გემოვნებაზე იყო დამოკიდებული. მთლიანობაში NX-ს კომფორტი, დიზაინი და მოცულობა არ უნდა დავუკარგოთ, მეორეს მხრივ GLA-ს დინამიურობა და მართვადობა გამოსარჩევია. დიდი მინუსია ფასი, Lexus, აშკარად, ნამეტანი ძვირია. და მაინც, თუ იაპონელის ყიდვას ფიქრობთ, აიღეთ 300 AWD და ისიამოვნეთ იაპონური კომფორტით, ხოლო თუ გერმანელი ამოიღეთ მიზანში, GLA 250-იც იდეალური ვარიანტი იქნება, თუ რა თქმა უნდა, კომპლექტაციებს დაუმატებთ და არ დასჯერდებით სასტარტოს.