პარიზის ავტობუსის მძღოლი გმირად შერაცხეს


5 ნოემბერი 2018 / 19:08

პარიზის ავტობუსის ერთ-ერთი მძღოლი სოც.ქსელების მომხმარებლებმა გმირად შერაცხეს. მძღოლმა აბსოლუტურად ყველა მგზავრი გაჩერებაზე მას შემდეგ ჩამოსვა, როცა შშმ პირი უნდა ამოსულიყო ეტლით და მგზავრებმა არც დახმარების და მითუმეტეს არც ადგილის დათმობის სურვილი გამოხატეს.

ფრანსუა ლე ბერრი, რომელსაც მრავალჯერადი (გაფანტული) სკლეროზის დიაგნოზი დაუსვეს ექიმებმა იძულებულია ეტლით გადაადგილდეს. ერთ-ერთ გარეუბნის გაჩერებაზე მას სურდა ავტობუსში ასულიყო, თუმცა მგზავრებმა, თითქოს, ვერც შენიშნეს ლე ბერრი და მისთვის ადგილის გათავისუფლება არც უფიქრიათ.

მგზავრების საქციელით გაოცებულმა მძღოლმა თითოეულ მათგანს ტრანსპორტის დატოვება მოსთხოვა, შემდეგ, აიყვანა ფრანსუა, დაკეტა კარები და გზა ერთადერთი მგზავრით გააგრძელა. მძღოლის ვინაობა უცნობია, რადგან ამ უკანასკნელმა იდენტიფიკაციის გასაჯაროება არ მოისურვა.

 

 

“გუშინ, როცა ვცდილობდი ავტობუსში ასვლას, არავინ მიიწია, რომ ადგილი გაეთავისუფლებინათ. ამ ყველაფერს მძღოლიც თვალსადევნებდა და იმედგაცუებულმა და ბრაზმორეულმა თქვა: “მორჩა, ავტობუსი აღარ წავა, ყველა ჩავდივართ!” შემდეგ ის ჩემთან მოვიდა და მითხრა: “ამოდით ავტბუსში, დანარჩენები კი შემდეგს დაელოდებიან.” - წერს ფრანსუა “ფეისბუქსა” და “თვითერში”.

ავტობუსებში, როგორც წესი 1-2 ადგილია გამოყოფილი ეტლებისთვის, ხოლო მგზავრები ვალდებული არიან დაუყონებლივ გაათავისუფლონ ადგილი, თუ ამას საჭიროება მოითხოვს.