ყველაზე ძვირადღირებული საგზაო ჯარიმები


5 ნოემბერი 2018 / 19:47

მძღოლებს შორის ხშირია ჩივილი პატრულსა და ჯარიმების დაწერაზე. ზოგიერთი მიიჩნევს, რომ ჯარიმის ტარიფი და მოსახლეობის შემოსავალი ერთმანეთს კატეგორიულად არ შეესაბამება. უსაფრთხოების ზომების გასამკაცრებლად კი ყველა ძირითად სატრანსპორტო კვანძებზე დამონტაჟებულია ვიდეოკამერები და საკმაოდ იშვიათია პოლიციას დარღვევა გამორჩეს. დღეს ვისაუბრებთ ყველაზე ძვირადღირებულ ჯარიმებსა და მათ მიზეზებზე.

Daily Mail-ის ცნობით, მსოფლიოში ყველაზე დიდი ჯარიმა შვედეთის 37 წლის მოქალაქეს დაუწერეს. “იღბლიანი” კაცი 2010 წელს შვეიცარიაში მოგზაურობდა და ბერნი - ლოზანას ტრასა რატომღაც მანქანის შესაძლებლობების დასატესტად მიიჩნია. ვიდეოკამერამ მის Mercedes-Benz SLS-ს მაშინ გადაუღო, როცა ის 290 კმ/სთ-ით პრაქტიკულად მიფრინავდა. ეს სისწრაფე კი დადგენილს 2-ჯერ აღემატებოდა.

პოლიციელი, რომელიც მას აედევნა, აცხადებს, რომ მანქანას დასამუხრუჭებლად 1 კილომეტრამდე მანძილი დასჭირდა.

 

შვეიცარიაში ჯარიმის თანხა თქვენი შემოსავლის მიხედვით დაიანგარიშება. რაც მაღალია თქვენი შემოსავალი, მით უფრო იზრდება ჯარიმის ოდენობა. როგორც აღმოჩნდა SLS-ის მფლობელი საკმაოდ მდიდარი იყო და ჯარიმამ 750 000 დოლარი შეადგინა (დაახლოებით 650 000 ევრო მაშინდელი კურსით).

ცნობისთვის SLS-ის ფასი მაშინ 200 000 დოლარი იყო.

იუსსი სალონოია ფინეთის ერთ-ერთ ჰოკეის კლუბის მფლობელია. მისი წლიური შემოსავალი საშუალებას აძლევს Ferrari-ით იკატაოს და ასევე… რეკორდული ჯარიმებიც გადაიხადოს.

პოლიციის ანგარიშიდან გამომდინარე, იუსსიმ დააიგნორა სისწრაფის შეზღუდვის ნიშანი 40კმ/სთ და აჩქარება 80-90კმ/სთ-ით გააგრძელა. გამომდინარე იქიდან, რომ ფინეთშიც ჯარიმა იწერება შემოსავლის პროპორციულად, სალონოიას მოუწია 200 000 დოლარის გადახდა.

 

 

დიდ ჯარიმას ვერ გაექცა Nokia-ს ერთ-ერთი მაღალი რანგის თანამშრომელი. 2002 წელს ის მოტოციკლეტით 70 კმ/სთ-ით გადაადგილდებოდა, თუმცა დაშვებული მხოლოდ 50კმ/სთ იყო. სასამართოლომ გულდასმით შეისწავლა მისი შემოსავლები და მოსამართლემ გადაწყვიტა, რომ ყველაზე სამართლიანი იქნებოდა თუ დამრღვევი სულ რაღაც 100 000 დოლარით დაჯარიმდებოდა.

კანადის ერთ-ერთ პროვინციის მკვიდრს საინტერესო შემთხვევა გადახდა თავს. 2010 წელს ის ედმონტონის შემოგარენში მოტოციკლეტით 250 კმ/სთ-ით მოძრაობდა. კანადური კანონმდებლობის თანახმად, ყველაზე დიდი ჯარიმის დაწერა 1000 დოლარის ფარგლებში შეიძლება. თუმცა დამნაშავე სასამართლოს შეუთანხმდა რომ გადაიხდიდა გაცილებით მეტს და მას შეუნარჩუნდებოდა მართვის მოწმობა. მსგავსი პრაქტიკა კანადურ სამართალში საკმაოდ ხშირია. მაგალითად, იმავე ქალაქში და ანალოგიურ შეთანხმებაში სხვა მძღოლმა 8500 დოლარი გადაიხადა.

შემდეგი გმირი ან უბრალოდ ძალიან გულუბრყვილო იყო, ან ჩვეულებრივი თავში ავარდნილი მილიონერი. 2012 წელს დუბაის პოლიციამ სიჩქარის გადაჭარბებისთვის ის 12-ჯერ გააჩერა. სისწრაფესთან თამაში მას 12 000 დოლარზე მეტი დაუჯდა.

ინგლისში, როგორც ბევრ სხვა ქვეყანაში, ჯარიმის რაოდენობა დამოკიდებულია თუ რამდენად გადააჭარბა დამნაშავემ ლიმიტს და სად, ქალაქში თუ ტრასაზე. ამასთან ითვალისწინებენ მძღოლის მდგომარეობას, იყო თუ არა ნასვამი, ან ნარკოტიკების ზემოქმედების ქვეშ. ჯარიმის მაქსიმალური გადასახადი მერყეობს 2000 - 4000 დოლარამდე.

თუმცა Porsche 911-ის მძღოლმა მოახერხა 4000 დოლარის ნაცვლად 8000 გადაეხადა. 2007 წელს ის ლონდონთან ახლოს მაშინ გააჩერეს, როცა რეგისტრატორმა 275 კმ/სთ-ით შეაფასა მისი სიჩქარე. გაოგნებული მოსამართლე, ალბათ, დათანხმდებოდა 4000 დოლარიან ჯარიმაზე, მაგრამ მძღოლმა დაიწყო უხეში, არა ეთიკური, საუბარი და მიუხედავად ყველა მტკიცებულებისა, ამბობდა, რომ დამნაშავე არ იყო. საბოლოოდ ასეთი საქციელის გამო მოუწია 8000 დოლარის გადახდა.