ამ ბლოგში შემოგთავაზებთ რამდენიმე გავრცელებულ შემთხვევას, რომლებსაც ყოველდღიურად ვხვდებით ავტომობილით გადაადგილებისას. მნიშვნელოვანია გავითვალისწინოთ ისინი, რათა საკუთარ თავსა და სხვა მძღოლებს არ შევუქმნათ დისკომფორტი, არ დავაზიანოთ ჩვენი ავტომობილი უხეში მართვით და უბრალოდ ვიმგზავროთ, მშვიდად და კომფორტულად. მაშ ასე , ესენია:
არასწორი პარკირება - ავტომობილის სწორად დაპარკინგება არც ისე რთული პროცედურაა, თუმცა რათქმაუნდა, გარკვეულ გამოცდილებას მოითხოვს, რომელიც დროთა განმავლობაში პრაქტიკაში ვითარდება. მაგრამ, სამწუხაროდ მრავლად არიან მძღოლები, რომლებიც გამოცდილების მიუხედავად, მაინც დაუდევრად იქცევიან და არასწორად აჩერებენ ავტომობილს. მაგალითად ხშირია შემთხვევები, როდესაც ავტომობილი ერთის ნაცვლად რამდენიმე გასაჩერებელ ადგილს იკავებს, ასევე მრავლად შევხვდებით ისეთ სიტუაციასაც, როდესაც ავტომობილი ქვეითთათვის განკუთვნილ სავალ ბილიკზეა გაჩერებული.
უხეში მართვა სიცივეში - ავტომობილის უხეში სტილით მართვა არასდროსაა რეკომენდებული, განსაკუთრებით კი სიცივეში, როდესაც ძრავი ჯერ კიდევ ცივია და არასაკმარისათაა შეზეთილი.
არასათანადო დისტანცია - ალბათ ხშირად შესწრებიხართ სიტუაციას როდესაც მძღოლი არ იცავს საჭირო დისტანციას წინ მიმავალ ავტომობილთან მიმართებაში, ასეთი მართვა რათქმაუნდა დიდი საფრთხის შემცველია , რადგან, თუ მაგალითად წინ მიმავალმა ავტომობილმა მოულოდნელად შეანელა სვლა, არასათანადო დისტანცია , დიდი ალბათობით გამოიწვევს ავარიას.
ცუდი დაკვირვება - ავტომობილით გადაადგილებისას, აუცილებელია მაქსიმალურად ვკონცენტრირდეთ და ვეცადოთ არ გამოგვრჩეს არცერთი გადაადგილება და მოძრაობა ჩვენს სავალ გზაზე, იქნება ეს სხვა ავტომობილის მანევრი, თუ ქვეითის გადაადგილება, წინააღმდეგ შემთხვევაში შეიძლება ყველაფერი სავალალო შედეგით დასრულდეს.
მუდმივი სიარული გადაბმულობით (,,ცეპლენიით“) - როცა საქმე მექანიკურ გადაცემათა კოლოფს ეხება, ხშირია შემთხვევები, როდესაც დამწყები მძღოლი საჭიროზე მეტად იყენებს გადაბმულობას, რაც იწვევს მის გადახურებას და ზრდის ცვეთას, ამიტომ თუ სიჩქარის შეცვლა არ გვიწევს, ზედმეტად არ უნდა შევეხოთ მას.
P.S : გაითვალისწინეთ ზემოაღნიშნული რჩევები, რათა ავტომობილის მართვა გახდეს უფრო სასიამოვნო და კომფორტული თქვენთვის და თქვენი თანამგზავრებისთვის, გისურვებთ, მშვიდობიან და უსაფრთხო მგზავრობას.