ამერიკის საგზაო მოძრაობის უსაფრთხოების ეროვნულმა ადმინისტრაციამ გამოძიება დაიწყო TOYOTA RAV 4-ის 2013-2018 წლებში გამოშვებულ მოდელებზე.
Associated Press-ის განცხადებით, საკითხი მას შემდეგ გახდა აქტუალური, რაც ადმინისტრაციაში 11 ერთმანეთის მსგავსი საჩივარი დაფიქსირდა.
საქმე ეხება დაახლოებით 1.9 მილიონ ავტომობილს, რომლებსაც აღმოაჩნდათ ქარხნული წუნი, კონკრეტულად კი საუბარია აკუმულატორის ჩამკეტ ჩარჩოზე, რამაც შესაძლოა გამოიწვიოს ელექტრო ენერგიის უეცარი გათიშვა, რაც ავტომატურად გამოიწვევს ავტომობილის გაჩერებას ან უფრო უარესი, შესაძლოა გაჩნდეს ხანძარი ძრავის განყოფილებაში.
11 შემთხვევიდან 7 ავტომობილის მფლობელი აცხადებს, რომ ხანძარი მოულოდნელად გაჩნდა ძრავის განყოფილებაში, როდესაც ისინი მართავდნენ ავტომობილს, ხოლო დანარჩენ 4 შემთხვევაში ხანძარი მაშინ გაჩნდა, როდესაც ავტომობილი არ იყო დაქოქილი.
იმ შემთხვევებში, როდესაც ავტომობილს მართავდნენ, მფლობელების ნახევარმა განაცხადა, რომ ხანძარს წინ უძღოდა ავტომობილის უეცარი გაჩერება, რაც ელექტრო ენერგიის მოულოდნელი დაკარგვით იყო გამოწვეული.
უსაფრთხოების ეროვნული ადმინისტრაციის განცხადებით, ზოგიერთ შემთხვევაში ინციდენტის გამომწვევი მიზეზი აკუმულატორის არასათანადო მონტაჟი იყო.
ასეა თუ ისე, დიდი ალბათობით, სწორედ ეს ინციდენტები იქნება წინა პირობა იმისა, რომ TOYOTA 1.9 მილიონ RAV 4-ს უკან გაიწვევს.