საბურავი ავტომობილის ერთ-ერთ მნიშვნელოვან დეტალს წარმოადგენს, რადგან სწორედ ის არის ერთადერთი კომპონენტი, რომელსაც უშუალო შეხება აქვს ყველა იმ რელიეფურ ზედაპირთან, რომელზედაც ჩვენ ყოველდღიურად გადავაადგილდებით. წუთით მაინც რომ დავფიქრდეთ და გავიაზროთ თუ რამხელა დატვირთვა მოდის მათზე, თითოეული ბრუნის დროს, ალბათ დამერწმუნებით, რომ უფრო მეტ ყურადღებას დავუთმობდით.
ამ ბლოგში შემოგთავაზებთ 5 ძირითად ნიშანს, რომლებიც გვაფრთხილებენ, რომ საბურავების შეცვლის დრო დადგა.
პროტექტორის სიმაღლე - საბურავების შეცვლის ერთ-ერთ მთავარ მიზეზს, დროთა განმავლობაში მათი ცვეთა წამოადგენს. იმისათვის, რომ განვსაზღვროთ რამდენად გაცვეთილია ჩვენი ავტომობილის საბურავები, ამისათვის საჭიროა დავაკვირდეთ მათი პროტექტორის ზომას, ვიზუალური დაკვირვებით მარტივადაა შესაძლებელი რა დონეზეა საბურავი გაცვეთილი, გარდა ამისა ყველა საბურავს აქვს თავისი ცვეთის ინდიკატორი რომელიც გამოსახულია საბურავის გვერდითა კედელზე და მათი მეშვეობით მარტივადაა შესაძლებელი გავიგოთ რა რესურსი დარჩა საბურავს.
ვიბრაცია - თუ ავტომობილით გადაადგილებისას სხვადასხვა სიჩქარეზე შეინიშნება უჩვეულო ვიბრაცია, ეს შეიძლება მრავალი ფაქტორით იყოს გამოწვეული, მაგალითად, დაკიდების სისტემის რომელიმე დეტალის გაუმართაობით, თუმცა თუ ის შემოწმებული გაქვთ და ამ მხრივ ყველაფერი რიგზეა, მაშინ ეს ვიბრაციები დიდი ალბათობით დაზიანებული ან გაცვეთილი საბურავის ბრალია, როგორც წესი ვიბრაციის დონე სიჩქარის მატებასთან ერთად იზრდება, რაც რა თქმა უნდა სახიფათოა უსაფრთხო მგზავრობისთვის.
გამობერილი ადგილები საბურავზე - ჩვენთან მას ხშირად მოიხსენიებენ ე.წ ,,ბაბონის“ სახელწოდებით. ეს საბურავის ერთ-ერთი სერიოზული დაზიანებაა, რაც იმას ნიშნავს, რომ საბურავის შიდა ფენა დაზიანებულია რის გამოც შიგნით არსებული წნევა ჰაერის სახით დაზიანებული ნაწილიდან გამოდის და საბურავის გარე კედელს აწვება, რა დროსაც ამ ნაწილში გროვდება ჰაერი და ეს ადგილი გამოიბერება. გამობერილი ადგილი ნებისმიერ დროს შეიძლება გასკდეს. აღნიშნული პრობლემის მიზეზი ხშირ შემთხვევაში, მართვის დროს, უხეშ ან წვეტიან ზედაპირზე გადავლა შეიძლება გახდეს ან თუნდაც ავტომობილის დაპარკინგების დროს ბორდიურზე საბურავის მირტყმა.
ბზარები გვერდითა კედელზე - აღნიშნული პრობლემის აღმოჩენაც მარტივადაა შესაძლებელი ვიზუალური დაკვირვებით, თუ თქვენ საბურავს გვერდითა კედელზე შეამჩნევთ სხვადასხავა ზომის ბზარებს, მაშინ ის სასწრაფოდაა შესაცვლელი, რადგან დაზიანებულია მისი სტრუქტურა და ნებისმიერ დროს შეიძლება გასკდეს.
ასაკი - ისევე, როგორც ავტომობილის სხვა ნაწილებს, საბურავსაც აქვს საკუთარი სიცოცხლისუნარიანობის ვადა და ის დაახლოებით 5 წელს უტოლდება, ამ პერიოდის გასვლის შემდეგ, რეზინის ნაერთი ნელ-ნელა იწყებს დაშლას და მგრძნობიარე ხდება ზემოაღნიშნული ბზარებისა და გამობერილი ბუშტების მიმართ, ასევე საბურავი ნელ-ნელა კარგავს ყველა იმ საჭირო მახასიათებლებს, რომლებიც საჭიროა უსაფრთხო და კომფორტული მგზავრობისთვის. საბურავის სიცოცხლისუნარიანობის გაზომვა წლებთან ერთად კილომეტრებშიცაა შესაძლებელი და ის დაახლოებით 40000-50000 კილომეტრია.
გაითვალისწინეთ ყველა ეს ნიშანი, რომლებიც დაგეხმარებათ, დაადგინოთ, რამდენად გაცვეთილია თქვენი ავტომობილის საბურავები, რათა თუ საჭიროა, დროულად შეცვალოთ ისინი.