უსაფრთხოების სისტემებიდან ღვედთან ერთად უსაფრთხოების ბალიშსაც უმნიშვნელოვანესი როლი აკისრია. ის წარმოადგენს სპეციალურ სისტემას, რომელიც შექმნილია ავარიის შემთხვევაში დაზიანების შესამსუბუქებლად. ისინი ჩაშენებულია საჭეში, ტორპედოში კარებებში სახურავსა და სავარძლებში, ავარიის დროს, მათი გახსნის შემთხვევაში, სწორედ უსაფრთხოების ბალიშები წარმოადგენენ ერთადერთ დამცავ ზედაპირს მგზავრებსა და მყარ სხეულებს შორის.
რაც შეეხება აირბაგის ტიპებს, ისინი განკუთვნილია წინა და გვერდითა დარტყმისთვის და შესაბამისად ისე არიან განლაგებულნი, რომ მათი გაშლის შემთხვევაში, უზრუნველყოფენ სხეულის სხვადასხვა ნაწილის ეფექტურ და დროულ დაცვას. მაგალითად, გვერდითა მოქმედების ბალიშები, შექმნილია იმისათვის, რომ დაიცვან თავი ან გულ-მკერდის ნაწილი. გვერდითა მოქმედების ბალიშების სამი ძირითადი ტიპი არსებობს, რომლებიც იცავენ გულ-მკერდს ან ტანს, ცალკე თავს ან მკერდის ნაწილს და თავს ერთად.
ახლა კი ვისაუბროთ მათი შექმნის ისტორიაზე. 1968 წელს ალენ ბრედმა გამოიგონა ე.წ ,,Sensor and Safety System’’, რომელიც მსოფლიოში პირველი ელექტრომექანიკური აირბაგის სისტემა იყო. თუმცა, მანამდე, ჯერ კიდევ 1950-იანი წლების დასაწყისში, გერმანელმა, ვალტერ ლინდერერმა და ამერიკელმა ჯონ ჰეთრიკმა, შექმნეს აირბაგის პირველი ვერსია. ეს იყო 1951 წელს. ლინდერერის უსაფრთხოების ბალიშის სისტემა ეფუძნებოდა შეკუმშული ჰაერის პრინციპს. რაც შეეხება ჰეთრიკის აირბაგს მან 1953 წელს მიიღო პატენტი, მისი უსაფრთხოების ბალიშიც, „შეკუმშული ჰაერის პრინციპზე იყო დამყარებული. მან თავის სისტემას, ,,Safety Cushion Assembly For Automotive Vehicles” უწოდა. მოგვიანებით, 1960-იან წლებში, კვლევებით დადგინდა, რომ მსგავსი პრინციპის უსაფრთხოების ბალიში არ იყო ეფექტური, კონკრეტულად კი, მასში არსებული შეკუმშული ჰაერი, საჭიროების შემთხვევაში, ვერ უზრუნველყოფდა ბალიშის დროულ გახსნას.
1964 წელს, იაპონელმა საავტომობილო ინჟინერმა, Yasuazaburou Kobori-მ შექმნა უსაფრთხოების ბალიშის საკუთარი ვერსია, რომელშიც გამოყენებული იყო სპეციალური ასაფეთქებელი მექანიზმი, რომელიც უზრუნველყოფდა ბალიშის დროულ და ეფექტურ მოქმედებას. მისი ეფექტურობის გამო კობორის პროდუქტს 14 ქვეყანაში მიენიჭა პატენტი. სამწუხაროდ, 1975 წელს კობორი გარდაიცვალა და ვერ მოესწრო საკუთარი იდეის პრაქტიკულ და ფართო გამოყენებას.
General Motors იყო პირველი კომპანია, რომელმაც 1973 წლის Chevrolet Impala აღჭურვა უსაფრთხოების ბალიშებით, თუმცა აღსანიშნავია, რომ ყველა ეს ავტომობილი მთავრობის კუთვნილება იყო. მოგვიანებით, ჯენერალ მოტორსმა, 1973 წლის Oldsmobile Tornado-ში დაამონტაჟა ბალიშები, რომლებიც უკვე ჩვეულებრივი მოქალაქეებისთვის იყო ხელმისაწვდომი. მოგვიანებით, ჯენერალ მოტორსმა, მძღოლებს შესთავაზა გვერდითა უსაფრთხოების ბალიშებიც, რომლებიც დაამონტაჟა Oldsmobile-სა და Buick-ის 1975 და 1976 წლის მოდელებში. კომპანიის უსაფრთხოების ბალიშები, რომლებიც ბაზარზე ცნობილი იყო Air Cushion Restraint System-ის სახელწოდებით, სამწუხაროდ, სამომხმარებლო ინტერესის არარსებობის გამო, 1977 წელს, წარმოება და მომარაგება შეწყვიტა. შემდგომი, წლების განმავლობაში FORD და GM ამტკიცებდნენ, რომ უსაფრთხოების ბალიშები უბრალოდ არ გამოდგებოდა, თუმცა საბოლოოდ, გიგანტი ავტომწარმოებლები დარწმუნდნენ მის მნიშვნელობასა და აუცილებლობაში და 1998 წლიდან უსაფრთხოების ბალიშები სავალდებულო გახდა ყველა ავტომობილისათვის.