ზაფხულის ცხელი დღეები დასრულდა და შემოდგომაც უკვე კარს მოგვადგა. ეს ის პერიოდია, როდესაც სხვადასხვა ადგილას დასასვენებლად წასულები უკან ვბრუნდებით და ცხოვრების ჩვეულ რიტმში ვდგებით. ვიხსენებთ ადგილებს, რომლებმაც წარუშლელი მოგონებები დატოვა ჩვენს გონებაში და ჩვენთვის საყვარელ პიროვნებებს, რომლებიც ჩვენთან ერთად იყვნენ ამ მშვენიერ მომენტებში. მაგრამ არის კიდევ ერთი მეგობარი, რომელიც ასევე იზიარებდა ყველა თავგადასავალსა თუ ემოციას. ეს ჩვენი ავტომობილია.

ეს ყველაფერი კარგია, თუმცა ხანგრძლივი მოგზაურობის შემდეგ, ჩვენს ავტომობილს აუცილებლად სჭირდება გეგმიური შემოწმება, რათა დავრწმუნდეთ, რომ ყველაფერი რიგზეა და გამართულად მუშაობს. ამ ბლოგშიც სწორედ ამ საკითხზე გვინდა, გესაუბროთ და გაგაცნოთ ის ინტერვალები და შესაბამასი დეტალები, რომლებიც კონკრეტული პერიოდის გასვლის შემდეგ უნდა შემოწმდეს.

ყოველ 3 თვეში ან 5000 კილომეტრის გავლის შემდეგ უნდა შემოწმდეს:

გადაცემათა კოლოფის ზეთი - მისი პერიოდული შემოწმება აუცილებელია, რადგან არასაკმარისი საპოხი მასალის გარეშე ფუნქციონირების შემთხვევაში შესაძლოა ის დაზიანდეს. ამის თავიდან ასარიდებლად კი, შეამოწმეთ მისი დონე, საჭიროების შემთხვევაში დაამატეთ ან მთლიანად შეცვალეთ.

ძრავის ზეთი და ფილტრი -  მასაც ისევე, როგორც გადაცემათა კოლოფის ზეთს, პერიოდული შემოწმება და შეცვლა სჭირდება. ნელ-ნელა ის კარგავს თავის ფუნქციებს და ვეღარ უზრუნველყოფს ეფექტურ შეზეთვას, შედეგად, შესაძლებელია ძრავის მოძრავ ნაწილებს შორის ხახუნის ძალა გაიზარდოს და ამან დროთა განმავლობაში მათი დაზიანება გამოიწვიოს. ამის თავიდან ასარიდებლად, კარგი იქნება თუ, ძრავის ზეთის მდგომარეობას ყოველ სამ თვეში ერთხელ ან 5000 კილომეტრის გავლის შემდეგ შევამოწმებთ. ზეთთან ერთად აუცილებლად შეამოწმეთ ფილტრიც, თუ ის დახეულია, დაზიანებულია ან სხვა რაიმე დეფექტი აქვს, აუცილებლად შეცვალეთ ახლით.

საჭის გამაძლიერებელი სითხე - ის ერთ-ერთი მნიშვნელოვანი სითხეა ჩვენი ავტომობილის გამართულად და უსაფრთხოდ ფუნქციონირებისთვის. როდესაც მოხვევის დროს გესმით არასასიამოვნო ხმაური და საჭის მოტრიალება გიძელდებათ, ეს დიდი ალბათობით, საჭის სითხის არასათანადო რაოდენობაზე მიუთითებს. ამის თავიდან ასარიდებლად, მისი შემოწმება აუცილებელია ზემოაღნიშნული ინტერვალით, რათა დროულად შევაფასოთ მისი დონე და მდგომარეობა.

საბურავის ცვეთის დონე - საბურავებს უშუალო შეხება აქვთ ზედაპირთან, ამიტომ ისინი საკმაოდ მალე იცვითებიან. ამ პროცესს კიდევ უფრო აჩქარებს ისეთი ნიუანსები, როგორებიცაა: არასათანადო მართვის სტილი, გარემო ფაქტორები თუ კლიმატური პირობები. შესაბამისად, მათი გეგმიური შემოწმება აუცილებელია, რადგან გაცვეთილი საბურავები ვეღარ უზრუნველყოფენ სათანადო მოჭიდებასა და ეფექტურ სამუხრუჭე მანძილს. ამასთანავე, არ დაგავიწყდეთ წნევის შემოწმება, რადგან არასაკმარისი რაოდენობა იწვევს საბურავის არათანაბარ ცვეთასა და საწვავის ჭარბ მოხმარებას.

ნათურები - სამი თვის გასვლის ან 5000 კილომეტრის გავლის შემდეგ აუცილებლად შეამოწმეთ ნათურები. მათ სხვადასხვა ფუნქცია აკისრიათ. ზოგიერთ მათგანს ახლო თუ შორი განათებისთვის ვიყენებთ, ზოგიერთს მოხვევისას თუ ნისლში გადაადგილებისას, ამიტომაც მათი გამართულად ფუნქციონირება მნიშვნელოვანია, როგორც ჩვენთვის, ასევე - მოძრაობის სხვა მონაწილეებისთვისაც.

სპეციალური მილები - სხვადასხვა ზომისა და ფორმის მილები მრავლად გვხვდება ავტომობილში. ისინიც, ისევე, როგორც სხვა ცვეთადი ნაწილები დროთა განმავლობაში ფუჭდება და ვეღარ უზრუნველყოფს მასში გამტარი სითხეების ეფექტურ მიწოდებას. გაცვეთილი, დაბზარული და დაჟანგებული მილებიდან კი ადვილად ხდება გაჟონვა. ამის პრევენციისთვის აუცილებელია მათი გეგმიური შემოწმება.

ყოველ 6 თვეში ან 10 000 კილომეტრის გავლის შემდეგ უნდა შემოწმდეს:

აკუმულატორი - ის ავტომობილის მთავარი დენის წყაროა და პასუხისმგებელია ისეთ მნიშვნელოვან საკითხებზე, როგორებიცაა ელექტროგამართულობა და უსაფრთხო გადაადგილება. ამიტომაც, მნიშვნელოვანია მისი სწორად შერჩევა, მონტაჟი და პერიოდული გეგმიური შემოწმება, რათა თავიდან ავიცილოთ მისი გაუმართაობით გამოწვეული ხარვეზები.

მინამწმენდები - გარემო ფაქტორებისა და კლიმატური პირობების გამო, მინამწმენდი რეზინები, დროთა გამნავლობაში, ცვდება, იშაშხება ან ტყდება. შედეგად ისინი სათანადოდ ვერ წმინდავენ საქარე მინას. ეს კი ზღუდავს ჩვენს მხედველობის არეალს, რაც სახიფათოა გადაადგილებისას.

გაპრიალება - ცვილით ან სპეციალური საპრიალებლით ავტომობილის ზედაპირის პერიოდული დამუშავება მატებს ბზინვარებას და ეხმარება ზედაპირული ნაკაწრების აღმოფხვრასა და საღებავზე მზის უარყოფითი ზემოქმედებისაგან დაცვაში.

შასის შეზეთვა - ეს პროცედურა, ძირითადად, შედარებით ძველ ავტომობილებს ეხება. რადგან მათ რამდენიმე სპეციალური საპოხი წერტილი აქვთ და  შასის შემადგენელი დეტალების პერიოდულ შეზეთვას საჭიროებენ.

ყოველ 12 თვეში ან 20 000 კილომეტრის გავლის შემდეგ უნდა შემოწმდეს:

სამუხრუჭე სისტემა - ეს არის მექანიკური მოწყობილობა, რომელიც გამოიყენება მოძრავი ავტომობილის შესანელებლად ან საბოლოოდ გასაჩერებლად. ის საკმაოდ რთული სისტემაა და მრავალი კომპონენტისგან შედგება. ძირითადი კომპონენტებია: პედლები, სამუხრუჭე სითხის რეზერვუარი, სპეციალური მილები, რომელშიც მიედინება სამუხრუჭე სითხე, სამუხრუჭე ხუნდები და დისკები. სამუხრუჭე სისტემა პირდაპირაა პასუხისმგებელი ჩვენს უსაფრთხო მგზავრობაზე და საჭიროების შემთხვევაში, საფრთხის დროულად არიდებაზე. აქედან გამომდინარე, მათი ზემოაღნიშნული პერიოდულობით შემოწმება აუცილებელია და თუ საჭიროება მოითხოვს, მყისიერად უნდა შეიცვალოს მისი დაზიანებული ან გაცვეთილი კომპონენტი.

გამაგრილებელი სითხის დონე - ჩვეულებრივ ეს არის წყლისა და ანტიფრიზის ნარევი, რომელიც იცავს ძრავს გადახურებისგან. ამიტომ მისი პერიოდული შემოწმებაც მნიშვნელოვანია. ეს კი საკმაოდ მარტივია, ძრავის ხუფის ახდისას თქვენ დაინახავთ სპეციალურ რეზერვუარს. მასში მდგარი სითხის დონე კი უნდა იყოს F(სრულსა) და E(დაბალს) შორის.

საჭისა და დაკიდების სისტემა - გადაადგილებისას ორივე მათგანი ერთობლივად უზრუნველყოფს, საბურავების ადეკვატურ მანევრირებასა და ავტომობილის სტაბილურობას სხვადასხვა რელიეფურ ზედაპირზე. მათგან სისტემის რომელიმე კომპონენტის გაუმართაობა იწვევს არაკონტროლირებად მართვას და ზრდის საფრთხის დონეს. ამიტომაც მათი შემადგენელი ნაწილების, პერიოდული გეგმიური შემოწმება, თავიდან აგვარიდებს ყოველგავარ არასასურველ შედეგს.

თვეში ერთხელ მაინც უნდა შემოწმდეს/გაკეთდეს:

• შეამოწმეთ ანთებს თუ არა მონაცემთა დაფაზე ძრავის ნათურა
• გაასუფთავეთ ავტომობილის ინტერიერი და ექსტერიერი
• დარწმუნდით, რომ ყველა ნათურა ანთებს
• შეამოწმეთ საბურავებში არსებული წნევა
• დარწმუნდით, რომ მინამწმენდი სითხის ავზი სავსეა

და ბოლოს, ავტომობილი ეს არის მრავალი დეტალის ერთობლიობა, რომლებიც ერთმანეთთანაა დაკავშირებული. ამიტომაც საჭიროა მისი პერიოდული შემოწმება და მოვლა, რათა დროულად შევნიშნოთ და საჭიროების შემთხვევაში შევცვალოთ რომელიმე დაზიანებული დეტალი. ეს კი, თავის მხრივ, დაგეხმარებათ დაზოგოთ ფული გრძელვადიან პერსპექტივაში.

და ბოლოს, ჩვენს ფილიალებში, უნივერისტეტის #6-სა და მტკვრის მარცხენა სანაპიროზე შეგიძლიათ, სრულიად უფასოდ შეუმოწმოთ თქვენს ავტომობილს ნათურების მდგომარეობა, სამუხრუჭე ხუნდების ცვეთა, ჰაერისა და სალონის ფილტრები, აკუმულატორის რესურსი, ძრავის ზეთის დონე და ა.შ

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!