![](/upload/BlogPosts/viber_image_2023_05_19_16_52_25_353_4447f3f5.jpg)
როგორ განვსაზღვროთ ჩვენი ავტომობილის საბაზრო ღირებულება?
ავტომობილი მოძრავი კომფორტის საშუალებაა და ამასთანავე, ის ჩვენთვის ერთგვარ პირად სივრცესაც წარმოადგენს. ამიტომ, იგი იმსახურებს პატივისცემას, რაც მის მოვლასა და კარგ მდგომარეობაში შენარჩუნებით გამოიხატება. ის, თუ როგორ ვუვლით მას და რამდენად დროულად ვუტარებთ ყველა საჭირო სერვისს პირდაპირ აისახება გაყიდვისას მის ღირებულებაზე.
ასე რომ, ამ ბლოგში გვინდა გესაუბროთ, თუ რა განსაზღვრავს ავტომობილის ღირებულებას და როგორ მივანიჭოთ მას ადეკვატური ფასი.
შეისწავლეთ ბაზარი
პირველი, რაც უნდა გავაკეთოთ, არის ის, რომ ჩვენი ავტომობილის მსგავსი მოდელები დავათვალიეროთ ბაზარზე, იქნება ეს ონლაინ გასაყიდ საიტებზე, თუ რეალურად გასაყიდად გამოყვანილი ავტომობილების სპეციალურ სივრცეში. მათთან შედარება დაგვეხმარება, დაახლოებით დავადგინოთ, რა არის ჩვენი ავტომობილის საშუალო ფასი იმ მომენტში.
საჭირო სერვისული პროცედურები
როგორც ზემოთ აღვნიშნეთ, მნიშვნელოვანია ყველა საჭირო სერვისი ავტომობილს დროულად უტარდებოდეს, რათა დიდხანს და ხარისხიანად გვემსახუროს. ჰოდა, თქვენ თუ სწორედ ასეთ მეპატრონეთა კლასს მიეკუთვნებით და თან შენახული გაქვთ ყველა შესაბამისი საბუთი თუ ჩანაწერი, იქნება ეს სხვადასხვა ცვეთადი ნაწილისა თუ საპოხი სითხის შეცვლის დრო და დასახელება, ან სულაც ტექდათვალიერების საბუთი, სადაც ნათლად ჩანს ავტომობილის გამართული მდგომარეობა ყველა პარამეტრის დაცვით, მაშინ ეს ფაქტორი თქვენი ავტომობილის ფასზე დადებითად აისახება.
გარბენი
ეს ერთ-ერთი მნიშვნელოვანი ნიუანსია, რასაც ავტომობილის ყიდვისას ყურადღება ექცევა. ზოგადად ქარხანა-დამამზადებლები, ბენზინზე მომუშავე ძრავებზე გარანტიას დაახლოებით 250000 კმ-ზე, ხოლო დიზელზე კი - 350000 კმ-ზე იძლევიან. თუმცა, ეს შემთხვევაც დამოკიდებულია იმაზე, თუ რამდენად გულმოდგინედ უვლის მეპატრონე თავის მანქანას. თორემ ალაბათ ყველას გვინახავს დაბალგარბენიანი ავტომობილები ბევრად ცუდ მდგომარეობაში. ასე რომ, თუ უვლით ავტომობილს და თან დაბალი გარბენიც აქვს, ეს საკმაოდ მიმზიდველად გამოიყურება პოტენციური მყიდველისთვის.
ვიზუალური მდგომარეობა
აქ იგულისხმება როგორც ექსტერიერი, ასევე - ინტერიერი. ანუ ვიზუალური დეფექტები, მაგალითად, როგორებიცაა: დაზიანებული და საღებავამძვრალი გარე დეტალები ან სალონში დაბინძურებული, დახეული და დალაქავებული ინტერიერი, რასაკვირველია, გავლენას ახდენს მისსავე ღირებულებაზე. რაც უფრო სუფთად გამოიყურება ავტომობილი, მით უფრო მეტად ვფიქრობთ, რომ მას მეპატრონე პატივს სცემს და უვლის. დამეთანხმებით ალბათ, რომ პირველ ეფექტს, როდესაც ავტომობილის საყიდლად მივდივართ, მისი ვიზუალური მდგომარეობა და სისუფთავე ახდენს.
ოფციები
რაც უფრო მეტი ოფცია აქვს ავტომობილს, მით უფრო კომფორტული და სასიამოვნო სამართავია, შესაბამისად, კონკურენტებთან შედარებით, ფასიც მაღალია.
მფლობელების რაოდენობა
ესეც თქვენი ავტომობილის ისტორიის მნიშვნელოვანი ნაწილია, რადგან ყიდვისას უპირატესობა ხშირ შემთხვევაში იმ ავტომობილის ენიჭება, რომელსაც ნაკლები მფლობელი ჰყავდა.
და ბოლოს, როცა ფასი უკვე განსაზღვრულია და თქვენი ავტომობილი ყველა ზემოთ ჩამოთვლილ ასეპექტს მეტ-ნაკლებად აკმაყოფილებს, ისღა დაგრჩენიათ, განცხადება გამოაქვეყნოთ. მაგრამ აქაც არის ერთი მნიშვნელოვანი დეტალი - ის, თუ როგორ და რა ფონზე გადაუღებთ ავტომობილს ფოტოებს. ალბათ დამეთანხმებით, რომ კარგ ფონზე და სწორი რაკურსით გადაღებული ფოტო,პირველ შთაბეჭდილებაზე დიდ გავლენას ახდენს და იზიდავს პოტენციურ მყიდველებს.
გისურვებთ მშვიდობიან მგზავრობას.
ამბოლი, მეტი დრო მოძრაობისთვის!
Did you like the article?
Share on social platforms