ზამთრის სეზონის მოახლოებასთან ერთად, უსაფრთხო მართვისთვის, ერთ-ერთი მნიშვნელოვანი საკითხია იმის ცოდნა, თუ როდის უნდა მოვარგოთ ჩვენს ავტომობილს ზამთრის საბურავები. ისინი სპეციალურად შექმნილია იმისთვის, რომ უზრუნველყოს სათანადო მოჭიდება და მართვა, თოვლიან, ყინულიან და სველ ზედაპირზე, რაც შესაბამისად აძლიერებს ჩვენს უსაფრთხო მგზავრობას გადაადგილებისას. ამ ბლოგშიც სწორედ ამ საკითხზე გვინდა გესაუბროთ და გირჩიოთ, თუ როდის უნდა გადახვიდეთ ზამთრის საბურავებზე.

ჩვენს ქვეყანაში ხშირია შემთხვევები, როდესაც მძღოლები უპირატესობას ე.წ ყველა სეზონის საბურავს ანიჭებენ. მათი სახელიდან გამომდინარე, ამ ტიპის საბურავები მზადდება მთელი წლის განმავლობაში მოსახმარად, ზომიერ კლიმატურ პირობებში. მიუხედავად იმისა, რომ ყველა სეზონის საბურავები იძლევა კომბინირებულ სარგებელს, როგორც თბილ, ასევე - ცივ კლიმატურ პირობებში, ისინი მაინც არ არიან იდეალურები მძღოლებისთვის, რადგან ამ ტიპის საბურავები, შესაძლოა, მოულოდნელად აღმოჩნდნენ ექსტრემალური სიცივის, ყინულიან და თოვლიან გარემოში. კვლევების შედეგად ექსპერტები თანხმდებიან, რომ დაბალ ტემპერატურაზე ყველა სეზონის საბურავი მკვრივდება და კარგავს ეფექტურობას, შედეგად, იკლებს ზედაპირზე მოჭიდების მაჩვენებელი, რაც პირდაპირ აისახება ჩვენს უსაფრთხოებაზე.

ამისგან განსხვავებით, ზამთრის საბურავები დამზადებულია სპეციალურად შემუშავებული ელასტიური რეზინის ნაერთებით, რომელიც უზრუნველყოფს მოქნილ და ეფექტურ მართვას დაბალ ტემპერატურაზე. ხოლო ღრმა პროტექტორის საფარი უკეთ გამოდევნის თოვლსა და ჭუჭყს, შედეგად უკეთ ეჭიდება, როგორც თოვლიან, ასევე - მოყინულ და სველ ზედაპირზე.

ახლა კი 4 ძირითადი რჩევა, რომლებიც უნდა გავითვალისწინოთ ზამთრის საბურავებზე გადასვლისათვის:

ტემპერატურა: ტემპერატურის ვარდნა ერთ-ერთი მთავარი მაჩვენებელია ზამთრის საბურავებზე გადასვლისათვის. უფრო კონკრეტულად კი, როდესაც გარე ტემპერატურა +7 გრადუსი ან ნაკლებია, ყველა სეზონის ან ზაფხულის საბურავები კარგავენ ეფექტურობას და დროა ზამთრის საბურავები მოარგოთ ავტომობილს.

ამინდის პროგნოზი: მოახლოებული ამინდის პირობების შესახებ ინფორმირებულობა გადამწყვეტ როლს თამაშობს ზამთრის საბურავებზე გადასასვლელად. ყურადღებით ადევნეთ თვალი ამინდის პროგნოზს და წინასწარ დაიჭირეთ თადარიგი მოსალოდნელი ამინდის გაუარესებისთვის. ცუდმა მეტეოროლოგიურმა პირობებმა, შესაძლოა, შექმნას სახიფათო სატრანსპორტო პირობები. ხოლო ზამთრის საბურავების წინასწარ დაყენება მნიშვნელოვან გავლენას მოახდენს თქვენს უსაფრთხო მგზავრობაზე.

პროტექტორის სიმაღლე: სწორედ ეს მაჩვენებელი განსაზღვრავს საბურავის ცვეთას და მნიშვნელოვან როლს თამაშობს გადაადგილებისას. ამიტომ აუცილებელია მისი პერიოდული შემოწმება, რადგან გაცვეთილი ზამთრის საბურავი ვერ უზრუნველყოფს სათანადო მოჭიდებას ყინულიან და თოვლიან ზედაპირზე.

პირველი თოვლი: სეზონისათვის დამახასიათებელი პირველი თოვლი, ხშირ შემთხვევაში არასახარბიელო მდგომარეობაში აყენებს ავტომობილის მფლობელებს. ამიტომაც ნუ დაელოდებით თოვლის მოსვლას, დროულად მოარგეთ ზამთრის საბურავები ავტომობილს, რათა თავიდან აიცილოთ პოტენციური რისკები.

და ბოლოს, როდესაც ზამთრის საბურავების კომპლექტს მოარგებთ ავტომობილს, არ დაგავიწყდეთ, ზაფხულის ან ყველა სეზონის საბურავების სათანადო პირობებში შენახვა. არც ერთ შემთხვევაში ისინი არ უნდა იყოს ღია ცის ქვეშ, რეკომენდებულია შენობაში, გრილ და მშრალ პირობებში ინახებოდეს, რათა არ დაზიანდეს და სამომავლოდ ისევ გამოგადგეთ.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!