დღევანდელ ჩვენს ბლოგში წარმოგიდგენთ 2024 წლის Genesis G90-ს (შიდა ბაზარზე ცნობილი, როგორც EQ900). ეს არის სრული ზომისა და მდიდრული კლასის სედანი, რომელსაც სამხრეთ კორეული კომპანია Genesis აწარმოებს. უფრო კონკრეტულად კი, G90 Hyundai Motor Company-ის ძვირადღირებულ განყოფილებაში იწყობა. ის არის ღირსეული შთამომავალი მისი წინამორბედის Equus MK2-ის.

ავტომობილის დებიუტი, სამხრეთ კორეაში, 2015 წლის 9 დეკემბერს შედგა. ხოლო მოგვიანებით კი 2016 წელს, საზოგადოებამ ჩრდილო ამერიკის საერთაშორისო ავტო შოუზე იხილა. იმავე წლის სექტემბერში საცალო ვაჭრობით გაიყიდა, როგორც 2017 წლის მოდელი. ხელმისაწვდომი იყო - 3.3T, 3.3T HTRAC, 5.0 და 5.0 HTRAC კუბატურის ძრავებით. ავტომობილი წარმოდგენილი იყო, უკანა და სრული ამძრაობით. მისი დიზაინერი კი, ავტო სამყაროში საკმაოდ ცნობილი, გერმანელი, Peter Schreyer-ია.

ახლა კი უშუალოდ 2024 წლის მოდელზე გადავიდეთ და განვიხილოთ მისი მახასიათებლები. ეს არის უაღრესად კონკურენტუნარიანი ძვირადღირებული სედანი, რომელიც არის ფართო, კომფორტული, მიმზიდველი და სავსეა სხვადასხვა თანამედროვე ტექნიკური მახასიათებლებით.

ის შეიძლება შევადაროთ მასზე ფასით ძვირადღირებულ BMW-ს მე-7 სერიასა და Mercedes-Benz-ის S class-ს. კორეული სედანი შესაძლოა არ ემთხვეოდეს გერმანული მართვის დინამიკას, თუმცა მათ არაფრით ჩამორჩება, კომფორტში, დიზაინსა თუ ტექნოლოგიებში.

რაც შეეხება მის ინტერიერსა და ტექნოლოგიებს, როგორც უკვე ავღნიშნეთ, ავტომობილი ამ მხრივ საკმაოდ დახუნძლულია. G90 აღჭურვილია Bang & Olufsen-ის უმაღლესი ხარისხის აუდიო სისტემით, რომელიც სტანდარტულია ავტომობილის ნებისმიერი კომპლექტაციისთვის. უკანა სავარძლებს შორის განლაგებულია მასიური სენსორული ეკრანი, ცენტრალური კონსოლით, რომელსაც თითქმის ყველა ფუნქცია გააჩნია, აქვეა ტელეფონის უკაბელო დამტენიც. მძღოლის სავარძლის თავის მისადებში ჩამონტაჟებულია დინამიკი, რომელიც გაფრთხილებებს/ბრძანებებს უგზავნის მძღოლს, რათა უკანა სავარძლებზე მსხდომი პირები არ შეწუხდნენ ისეთი ზედმეტი ხმაურით, როგორებიცაა ნავიგაციის ან თუნდაც მოხვევის მანიშნებლის ხმა.

მას აქვს ორი, 12,3 დიუმიანი ეკრანი, რომელთაგან ერთ-ერთი ცენტრალური, ხოლო მეორე კი, საინფორმაციო-გასართობი სენსორული ეკრანია. ინტერიერი დამუშავებულია უმაღლესი ხარისხის მასალითა და ლამაზი ლითონის ღილაკებითა თუ გადამრთველებით. მიუხედავად იმისა, რომ Genesis იყენებს სენსორული კონტროლის ეკრანს, მასზე შეხებისას, ზოგიერთი ფუნქციის გააქტიურების დროს, გამოსცემს ჰაფტიკურ ხმას, რაც ქმნის შეგრძნებას, რომ თქვენ ამ დროს თითქოსდა რეალურ ღილაკს აჭერ თითს.

რაც შეეხება ექსტერიერს, ის ნამდვილი გიგანტია, რომელსაც აქვს დამახასიათებელი დიდი წინა ცხაურა და წვრილი, ზოლისებრი, ორგანყოფილებიანი ფარები, რომლებიც გადადის გვერდითა კრილოებზეც. ლამაზი და დიდი დისკები, მას უფრო თვალშისაცემს და მოხდენილს წარმოაჩენს, უკანა მხარეს კი ამ ყველაფერს დახრილი და წაწვეტებული დაბოლოება ამშვენებს, სადაც კარგ კონტრასტს ქმნის უკანა ფარები და ორი დიდი მაყუჩი.

2024 წლის მოდელში ორი ტიპის ძრავს შეხვდებით, 3.5T და 3.5T E-Supercharger. პირველი მათგანი არის V ტიპის 6 ცილინდრიანი, 3.5 ლიტრის მოცულობისა და ორმაგი ტურბო დაბერვის ძრავი, რომელიც დაახლოებით 375 ცხენის ძალას გამოიმუშავებს. ეს სიმძლავრე ოთხივე საბურავს 8 სიჩქარიანი ავტომატური გადაცემათა კოლოფით მიეწოდება. EPA-ს შეფასებით კი, ქალაქში - 18mpg, ტრასაზე - 26 mpg, ხოლო შერეული - 21 mpg-ის საწვავს მოიხმარს.

მეორე ტიპის ძრავიც იგივე 3.5 V6-ია დამატებული 48-Volt Electric Supercharger. ამ შემთხვევაში გამოიმუშავებს დაახლოებით 409 ცხენის ძალას და სიმძლავრე, იმავე 8 სიჩქარიანი ავტომატური გადაცემათა კოლოფით გადაეცემა საბურავებს. EPA-ს შეფასებით საწვავის მოხმარება, ქალაქში - 17mpg, ტრასაზე - 24 mpg და შერეული - 20 mpg-ია.

აღსანიშნავია, რომ E-Supercharged აქვს მულტიფუნქციური დაკიდების სისტემა, რომელიც აღჭურვილია ,,Preview-Electronic Control Suspension” ტექნოლოგიით. ის იყენებს სხვადასხვა სენსორებს და მოქმედებს გზაზგე არსებული დაბრკოლებების შესაბამისად. ამასთანავე ამ მოდიფიკაციაში ვხვდებით უკანა საბურავების მობრუნებას 4 გრადუსით დაბალ სიჩქარეზე, ხოლო მაღალ სიჩქარეზე კი 2 გრადუსით. ეს კი ამ ზომის სედანს ეხმარება იყოს უფრო მანევრული ყველა სიტუაციაში.

G90 3.5T - აღჭურვილია სტანდარტული 20 დიუმიანი დისკებით, ელექტრო საბარგულით, პანორამული ლუქით, Nappa-ს ტყავის სავარძლებით, ამას თან ემატება წინა სავარძლების გათბობა-გაგრილებისა და მასაჟის ფუნქცია და ელექტრონული მართვით, საჭის გათბობა, ამსთანავე უკანა მხარეს ელექტრონული ფარდები, Head-Up დისპლეი, Bang &Olufsen აუდიო სისტემა, Apple CarPlay, Android Auto, ტელეფონის უკაბელო დამტენი და სხვა. უსაფრთხოების ტექნოლოგიების მთელი რიგი ნაკრებიც სტანდარტულია. ფასს რაც შეეხება, მისი ღირებულება - 90395 დოლარია.

G90 E-Supercharged - ამ შემთხვევაში დამატებულია ზემოაღნიშნული დაკიდების სისტემა, 21 დიუმიანი დისკები, უკანა სავარძლების გათბობა-გაგრილებისა და მასაჟისა და დაწოლის ფუნქცია, კარის ავტომატური რბილი დახურვის ფუნქცია, Bang & Olufsen 3D Premium Audio და უკანა მხარეს ტელეფონის უკაბელო დამტენი. ფასი - 102195 დოლარია.

მძღოლის დამხმარე ტექნოლოგიები: ადაპტირებული კრუიზ კონტროლი, ბრმა წერტილების მონიტორინგი, პარკირებისას შეჯახების თავიდან აცილების გამაფრთხილებელი სისტემა, ზოლში დარჩენის ფუნქცია, მძღოლის ყურადღების მონიტორინგი, პარკირების სენსორები და კამერები გარშემო/სრული ხედით, მოსალოდნელ საფრთხეზე უკან მსხდომი მგავრების გაფრთხილება და მათი უსაფრთხოდ გადასვლის ფუნქცია.

IIHS-მა G90-ს Top Safety Pick+ მიანიჭა და მიიღო უმაღლესი შეფასება ავარიის ყველა ტესტებში.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!