ძრავის ზეთის მნიშვნელობაზე არაერთხელ გვისაუბრია და კიდევ ერთხელ აღვნიშნავთ, რომ მას აკისრია სასიცოცხლოდ აუცილებელი მისია, კერძოდ, აგრეგატის მოძრავი ნაწილებისა და რთულად მისადგომი ადგილების შეზეთვა, რაც ამცირებს ხახუნს და იცავს ძრავს დაზიანებისაგან.

ამიტომ, საჭიროა მისი პერიოდული შეცვლა ხარისხიანი ნაწარმით, რადგან დაძველებული ზეთი კარგავს საჭირო ფუნქციებს და შესაბამისად ვეღარ ასრულებს ნაკისრ მოვალეობას. 

თუმცა, აქვე უნდა აღინიშნოს ერთი საკმაოდ გავრცელებული პრობლემა, რომელიც დროთა განმავლობაში ყველა ავტომობილს აწუხებს და მისი უგულებელყოფა საბოლოოდ ძრავის დაზიანებას გამოიწვევს, რაც დაგვეთანხმებით, რომ საკმაო ხარჯებთანაა დაკავშირებული. ეს პრობლემა ძრავის რომელიმე ნაწილიდან ზეთის გაჟონვაა. 

ამ ბლოგში კი გვინდა გესაუბროთ იმ 5 ძირითად ნიშანზე, რომლებიც ამ ფაქტზე მეტყველებენ და ავტომობილის მფლობელისაგან დროულ ყურადღებას საჭიროებენ.

ზეთის დაბალი დონის მანიშნებელი მონაცემთა დაფაზე: თანამედროვე ავტომობილების უმეტესობას მონაცემთა დაფაზე აქვს სპეციალური მანიშნებელი ინდიკატორი, რომელიც მაშინ ანთებს, როდესაც ძრავში საკმარისი ზეთის რაოდენობა არ არის, ან კრიტიკულად დაბალ ზღვარზეა. ეს ერთ-ერთი პირველი ნიშანია, ამიტომ თუ ამ ნიშანს ხედავთ, დროა, ავტომობილი ხელოსანთან მიიყვანოთ და გაარკვიოთ ძრავში ზეთის დონის დაწევის მიზეზი.

ზეთის ლაქები ან გუბე ავტომობილის ქვეშ: თუ ავტომობილის დაძვრის შემდეგ, მისი გაჩერების ადგილას მუქი ყავისფერი ან შავი ფერის ზეთის ლაქები ან გუბე შენიშნეთ, ამ შემთხვევაშიც საქმე მის გაჟონვასთან გვაქვს. რაც უფრო დიდია ლაქა, მით უფრო მეტად ჟონავს სითხეც, ამიტომ დროულად შეამოწმეთ და გაარკვიეთ მიზეზი.

ზეთის დონის მოულოდნელი კლება: თუ ძრავში ზეთის შეცვლის შემდგომ მისი დონის შემოწმების მიზნით, სპეციალური შუპის ნახვისას, ზეთი მხოლოდ მის მცირე ნაწილს ასველებს, ეს სერიოზული პრობლემაა და რაღა თქმა უნდა ძრავის რომელიმე დეტალიდან მის გაჟონვაზე მეტყველებს.

დამწვარი ზეთის სუნი: ეს სიმპტომიც მხოლოდ იმაზე მეტყველებს, რომ ძრავის რომელიმე ნაწილებს შორის დაზიანებაა და მათ შორის მოთავსებული რეზინის შუასადები მწყობრიდან გამოვიდა, რამაც გაჟონვა გამოიწვია, ეს სითხე ძრავის გახურებულ ნაწილზე მოხვდა, შედეგად კი მივიღეთ უსიამოვნო დამწვრის სუნი.

ძრავის გადახურება: და ბოლოს, ზეთი ძრავში ხახუნის შემცირებით ეხმარება მას გადახურებისაგან, ანუ მას აქვს ერთგვარი გამაგრილებელი ფუნქცია. მისი დაბალი დონე კი ამ ფუნქციას ვეღარ ასრულებს, შედეგად, ძრავი ნორმაზე მეტად ხურდება, რასაც პერიოდულად თან ახლავს კვამლი. 

გაითვალისწინე ყველა ზემოთ ჩამოთვლილი შემთხვევა და რომელიმეს არსებობის შემთხვევაში დაუყოვნებლივ ეცადეთ გამოასწოროთ, რათა ძრავი არ დაზიანდეს და მომავალში ზედმეტი ხარჯები არ გამოიწვიოს.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!