ბოროტი ხილვებით შეპყრობილი სასტიკი მკვლელები, ერნი და ვიპერი, შავი კლდეების წიაღში ბუნებრივად წარმოქმნილ ცივ ორმოში მოკალათებულან. მოთმინების უნარი და გამძლეობა უდაოდ მათი ძლიერი მხარეა. უკვე მეოთხე დღეა ასე არიან. სამართებლის პირივით ბასრი ცივი ქარის ნაკადის სახეში შეხეთქებისას, წარბიც კი არ უტოკდებათ. არც ქვეწარმავლების სისინი და მორიელების ფუსფუსი ადარდებთ. მიცვალებულებივით გაუნძრევლად წვანან ქვებზე და ოპტიკური სამიზნეებიდან მაღაროს ჩასასვლელს აკვირდებიან.

შერიფი დარკოს დაუძინებელი მტრები - მშვენიერი სქაი, ავანტიურისტი, ალტრუისტი კოსმიური მტვერი და მათი ჟანგმოდებული რობოტები, ყველა ინფორმაციით, ამ ბინძურ სოროში უნდა იყვნენ შემალულები.

თავებზე მონადირეებმა კარგად იციან, რომ სადაც არც წყალია და არც საჭმელი, დიდხანს იმედიც ვერ იარსებებს, შესაბამისად, იქ მუდმივად არათუ უბრალო მოკვდავი, ყველაზე გამძლე და გამჭრიახი მხეციც კი ვერ დარჩება. საბოლოოდ ის მაინც დაუშვებს შეცდომას. რამდენიმე მცდელობის შემდეგ თავს დაირწმუნებს, რომ საფრთხე აღარ ემუქრება, სამალავიდან გამოვა და... როდის დასცემენ გამარჯვების ყიჟინას ერნი და ვიპერი, ეს მხოლოდ დროის საკითხია. ყოველ შემთხვევაში, თავად სწორედ ასე ფიქრობენ..

ღრუბლებში გახვეული საშიში მთვარის ჟოლოსფერი შუქის ქვეშ, მაღაროს ჩასასვლელთან, შავ კლდეზე ქალის ჩრდილი ჩნდება. უსწორმასწორო ზედაპირი წამიერ, ტეხილ ნახატებს ტოვებს ლოდებზე, თუმცა მკვლელის გამოცდილი თვალისთვის, ამ სილუეტში ნანატრი მსხვერპლის ამოსაცნობად, ესეც კი საკმარისია.

დიახ ეს სქაია, რომლისთვისაც ეს გასეირნება შეიძლება უკანასკნელი აღმოჩნდეს, ისევე როგორც ჰაერის ის რამდენიმე ცივი ყლუპი, რომელსაც ასე ხარბად ეწაფება...

...................................................................

იქ სადაც განუკითხაობა მეფობს, მტაცებელიც და მსხვერპლიც, საბედისწერო ბრძოლაში ჩართვამდე, ფეხქვეშ თელავს ყველა იმ მორალურ პრინციპს, რომელიც იქამდე გააჩნდა, გასაქანს ბოლომდე ინსტინქტებს აძლევს და უკანმოუხედავად ეშვება მეწამულ მორევში...
თუმცა, თუ ჭკვიანი მონადირე, ან გაქცეული ამბიციური ცხოველი მოახერხებს და ამ ძნელბედობის ჟამს თავს ეშმაკობის ფუფუნებას მისცემს, დიდი შანსია ორთაბრძოლაში გამარჯვებული დარჩეს... ასეთი დახვეწილი უნარების მქონე მოწინააღმდეგეთა დაპირისპირება ნამდვილ შოუს გავს, რომელსაც საათობით და წლობითაც კი შეგვიძლია თვალი ვადევნოთ. განსაკუთრებით იმ შემთხვევაში, თუ თავად არ ვართ არც მდევრის და მითუმეტეს, არც მსხვერპლის როლში...