შერიფი დარკო გაფართოებული თვალებით შესცქერის ადმირალი კოლტის გამოგზავნილ შიკრიკებს, რომლებიც რობოტი ლუის ადგილსამყოფლის ზუსტ კოორდინატებს აწვდიან სამართალდამცავს. მისი მზერით მოტივირებული, მსუყე გასამრჯელოს მიღების იმედად გაბრწყინებული მსტოვრები, რკინის რაინდის რეალური ფასის გაცნობიერების შემდეგ, თავის მხრივ, უფრო მეტ დრამატულობას სძენენ საკუთარ ნაამბობს. სერიოზულდებიან, პაუზებს აკეთებენ, სახეზე მიმიკებს იცვლიან, თუმცა ეს უნიჭო სპექტაკლი დიდხანს არ გრძელდება და მაშინ წყდება, როდესაც შერიფის შემზარავი ღრიალის შედეგად აზანზარებულ ოთახში, მისი ერთგული ამფსონები შემოდიან.

მდევართა ექსპედიცია სრულ მზადყოფნაშია. ოცამდე კბილებამდე შეიარაღებული, თავზეხელაღებული მონადირე, საბედისწერო ქალაქის, სასოწარკვეთილების აკვნის აღმოსავლეთის კარიბჭის მისადგომებთანაა გამაგრებული და ბოლო მითითებებს ელოდება. მართლია, ბევრი მათგანისთვის ეს ბრძანებები შეიძლება უკანასკნელი აღმოჩნდეს, თუმცა სისხლისმსმელ ბოროტმოქმედებს ეს სულაც არ ადარდებთ. მათთვის მთავარი პატრონის ერთგულებაა, პატრონის, რომელიც მათ დაბადებიდან განსაკუთრებული საკვებით, ზიზღითა და სიძულვილით კვებავს.

ჰაერში მანქანის ძრავების ბღუილის გამაყრუებელი ხმა ისმის. კონვოი იძვრება. რობოტის შესაპყრობი ექსპედიცია დიდი შემართებით, საბრძოლო ყიჟინით იწყება. თუმცა ვინ იცის, რა სიურპრიზები ელოდებათ ავაზაკებს...

...................................................................

როდესაც ტირანი განსაკუთრებულ დაუნდობლობას იჩენს და საქმეში მის ხელთ არსებულ ყველაზე სასტიკ იარაღს რთავს, ხშირად ვერც კი ამჩნევს, რომ ეს არა უკიდეგანო ძალაუფლების დემონსტრირების, არამედ მისი რღვევის შედეგი უფროა. ამ ბრუტალური ნაბიჯით მას უნებურად მოჰყავს მწყობრში თვითგანადგურების ღილაკი.

ტირანის სასოწარკვეთილი მცდელობა, გაანადგუროს და მტვრად აქციოს ყველა მეტოქე, მისი იმედგაცრუების გამოძახილს და ახალი ეპოქის დაბადებას უფრო მოასწავებს, ვიდრე ტერორის გზით მართვის სადავეების წარმატებით შენარჩუნებას.