თავზეხელაღებული ბოროტმოქმედები, ერნი და ვიპერი, ფრთხილად მიიპარებიან ბნელი მაღაროს ლაბირინთებში. გამოცდილი თავებზე მონადირეები, ცხადია, სანათს არ ანთებენ, ცდილობენ ინტუიციით და სმენით გაიკვლიონ გზა ნესტიან ქვესკნელში, იქ, სადაც მათ ხელთ არსებული ინფორმაციით, შერიფი დარკოს მტრები, აჯანყებული სქაი და კოსმიური მტვერი უნდა იყვნენ დაბანაკებულნი.

მათ ყურადღებას მაღაროს სიღრმიდან წამოსული, უჩვეულო გუგუნი იპყრობს, რომელიც პერიოდულად ქრება, შემდეგ კი ისევ ისმის. ერნი და ვიპერიც სწორედ ამ ხმისკენ მიემართებიან, რათა მისი წარმოქმნის მიზეზი დაადგინონ. მალევე, გვირაბის ბოლოს, გაურკვეველ სილუეტებს ამჩნევენ. ლანდები ადამიანებს არ ჰგვანან, უფრო სქაის და კოსმიური მტვერის დამხმარე, მაღაროელი რობოტები უნდა იყვნენ. მონადირეები დიდი სიფრთხილით, გაფაციცებით აკვირდებიან ყველა დეტალს. იციან, რომ ერთი არასწორი ქმედება შესაძლოა სიცოცხლის ფასად დაუჯდეთ… ნაბიჯის გადადგმაღა დარჩათ და მსხვერპლს სასროლო დისტანციაზე მიუახლოვდებიან, თუმცა ჰოი საოცრებავ... სიფრთხილისა და ყურადღების მიუხედავად, უეცრად ფეხქვეშ მიწა ეცლებათ…

ლითონის ბაგირის ტკაცუნის მჭახე ხმის ფონზე, ორივე მონადირე მოწინააღმდეგის მიერ ოსტატურად დაგებულ მახეში ებმება. თავდაყირა ჩამოკიდებული მკვლელების გამაყრუებელი ღრიალის ხმა აზვირთებული ტალღის მსგავსად ეხეთქება ნესტიანი მაღაროს კედლებს. წარმოქმნილი ექო ელვის სისწრაფით ვრცელდება და ერთ წამში, სრულად მოიცავს ბნელი ქვესქკნელის ყველა კუნჭულს, შემდეგ კი უკვალოდ იკარგება, სადღაც შორს, მის სიღრმეში…

უჩვეულო გუგუნს ადამიანების საუბარი ცვლის. იარაღის დაყრის მოთხოვნით, სამალავიდან, ერნის და ვიპერის წინაშე, მათი სამიზნეები, ლეგენდარული ავტომრბოლელი კოსმიური მტვერი და მშვენიერი სქაი ჩნდებიან.

...................................................................

როგორც წესი, მათთვის, ვისთვისაც რისკი და სიკვდილისთვის თვალებში ყურება ბუნებრივი მდგომარეობაა, ტყვეობაში ყოფნის წარმოდგენაც კი უფრო ღრმა ჭრილობას ტოვებს, ვიდრე ყველაზე ბასრი დანის ყელში გამოსმა. ასეთ ადამიანებს პატიმრობა არა მხოლოდ თავისუფლებას, არამედ ცხოვრების არსს ართმევს...

თუმცა შესაძლოა, ასეთ გამოუვალ მდგომარეობაში მოხვედრა, ასეთ უძირო ორმოში ჩავარდნა, მათთვის მომავალი, განსაკუთრებული შესაძლებლობის აღმოჩენის და ახალი გზის დასაწყისიც კი გახდეს...