May 30, 2024

ეპიზოდი 62

ბარაკოსის ქვიშიან სანაპიროზე, ზღვის ტალღების შრიალის და გაზაფხულის ნაზი სიოს ლაქუცის ფონზე, ემოციებით დატვირთული რობოტი ლუი, მარტოდმარტო მიაბიჯებს. მექანიკური გული მანქანისთვის შეუსაბამოდ, ზედმეტად ვნებიანად ძგერს, მის რკინის მკერდში. მოახლოებული ოპერაცია, რომლის წყალობითაც დასახიჩრებული მამაცი მეზღვაური პიტერ ქარდი კიბორგად უნდა გადაიქცეს და ცხოვრებას დაუბრუნდეს, სევდიან მოგონებებს აღძრავს რობოტის გონებაში.

ლუის რებეკა ენატრება. არსება, რომელიც უყვარს, რომელიც სიკვდილს გამოგლიჯა ხელიდან, აღადგინა, მოუარა... და რომელიც, მათი საერთო მტრისადმი შურისძიების წყურვილით განმსჭვალული, ერთ დღეს, უეცრად გაუჩინარდა, სავარაუდოდ, დასახული განზრახვის სისრულეში მოყვანის მიზნით.

რობოტის მიკროსქემებით სავსე სხეულში მოგონებები ციმციმებს, ზუსტად ისე, როგორც შორეული ვარსკვლავები ღამის მოწმენდილ ცაზე. თითოეული ეს გაელვება მტკივნეული შეხსენებაა იმისა, რაც მოხდა...

დაკარგულ სიყვარულთან გაერთიანების დაუოკებელი სურვილი რობოტის გონებაში ენერგიის ახალ წყაროს ბადებს და ოპტიმიზმიც ისევ ანაცვლებს მელანქოლიას.

პოზიტიური განწყობით დამუხტული, რომანტიკული მოგონებებიდან ისევ მიმდინარე პროცესებზე ფოკუსირებული რობოტი, ოქროსფერ სანაპიროს ტოვებს და სწრაფი სვლით, კალი ბონქის სასახლისკენ მიემართება. "წინ დიადი საქმეა ლუი", ჩაესმის რობოტს საკუთარი ხმა. "წინ დიადი საქმეა. პიტერ ქარდი გადასარჩენია"...

...................................................................

მონატრება ბევრად უფრო ღრმაა, ვიდრე უბრალოდ ფიზიკური ლტოლვა. ის გაზიარებული ღრმა სულიერი კავშირის უტყუარი გამოვლინებაა. ის ადასტურებს, რომ სიყვარული აღემატება დროსა და სივრცეს, განზომილებებს. ის ადასტურებს, რომ სიყვარული მარადიულია.