საავტომობილო ტექნოლოგიების თანამედროვე მიღწევების პირობებშიც კი ზეთი კვლავაც რჩება ძრავის სიცოცხლისუნარიანობის გარანტად. ის წარმოადგენს მთავარ ინგრედიენტს, რომელსაც სწორად შერჩევა და გარკვეული პერიოდულობით შეცვლა სჭირდება. მისი დანიშნულებაა ძრავის შიდა კომპონენტების შეზეთვა, გაგრილება და გაწმენდა. ახალი საავტომობილო ზეთის აგრეგატში გამოყენებისას მოძრავი ნაწილები უკეთაა დაცული ხახუნისგან, სიცხისა და კოროზიისგან. ამასთანავე, ზეთი ხელს უშლის ჭუჭყისა და ნაწილაკების დაგროვებას, რომლებიც სხვადასხვა გზით ხვდებიან ძრავში. ამან კი გარკვეული პრობლემები შეიძლება გამოიწვიოს და დროთა განმავლობაში დააზიანოს კიდეც აგრეგატი.

ძრავის ზეთი ასაკთან ერთად ნაკლებად ეფექტური ხდება, ამიტომ ის რეგულარულად უნდა შეიცვალოს, რათა სწორად შეასრულოს თავისი მოვალეობა. უგულვებელყოფილი ზეთი საბოლოოდ ,,იშლება“ და კარგავს ყველა დამცავ თვისებას. ამიტომაც ძველმა საპოხმა სითხემ შესაძლოა რიგი პრობლემები გამოიწვიოს, როგორებიცაა: ძრავის გადახურება, საწვავის არაეფექტური მოხმარება, აგრეგატის არასწორი ფუნქციონირება და სხვა. ყველაფერი ეს კი, საბოლოო ჯამში ძრავის დაზიანებას გამოიწვევს.

დღევანდელ ბლოგშიც სწორედ ამ საკითხზე გვინდა გესაუბროთ და აღვნიშნოთ, თუ რამდენად ხშირად უნდა შეიცვალოს ზეთი, რათა ჩვენი ავტომობილის ძრავი დიდხანს და გამართულად გვემსახუროს.

ძრავისთვის ზეთის სწორად შერჩევა ადვილი საქმე ნამდვილად არ არის. თქვენი ავტომობილის მარკისა და მოდელისთვის განკუთვნილ საპოხ საშუალებას უნდა გააჩნდეს სიბლანტის ხარისხი, რომელიც შესაბამისობაშია გარკვეულ სტანდარტებთან, როგორებიცაა, ავტომწარმოებლის ან ძრავის მწარმოებლის მიერ დადგენილი ნებისმიერი უნიკალური სპეციფიკაცია. ეს მოთხოვნები დეტალურადაა აღწერილი თქვენი ავტომობილის სახელმძღვანელოში და, ამასთანავე, ინფორმაციის მოწოდება შეუძლია იმ აპრობირებულ ავტოსახელოსნოს, სადაც ზეთის შეცვლას გადაწყვეტთ.

ახლა კი გადავიდეთ ჩვენს დღევანდელ საკითხზე, თუ რამდენ ხანში ერთხელ უნდა შეიცვალოს ძრავის ზეთი. აღსანიშნავია, რომ ავტომობილის ასაკის, მისი ტიპისა თუ მართვის პირობების  მიხედვით, ზეთის შეცვლის ინტერვალი განსხვავებულია. 

შედარებით ადრეულ პერიოდში ზეთის შეცვლა ყოველ 5000 კილომეტრზე ნორმას წარმოადგენდა. თუმცა, თანამედროვე საპოხი მასალები საშულებას გვაძლევს ეს ინტერვალი გავზარდოთ და აგრეგატში ზეთი ყოველი 8000-დან - 12000 კილომეტრამდე შუალედით შევცვალოთ. უფრო მეტიც, ავტომწარმოებლები ირწმუნებიან, რომ თუ თქვენი მანქანის ძრავი სრულად სინთეტიკურ ზეთს მოიხმარს, მაშინ შუალედი კიდევ უფრო იზრდება და შეცვლა შესაძლებელია ყოველ 24000 კილომეტრზეც კი. 

აქვე უნდა აღინიშნოს ის ფაქტიც, რომ თქვენ არ შეგიძლიათ ზეთის მდგომარეობის შემოწმება ფერის ან რაიმე სხვა ვიზუალური მახასიათებლის გამო, ამიტომაც კარგი იქნება, თუ დაიცავთ რეკომენდებულ შუალედს. 

თანამედროვე ავტომობილების უმრავლესობა აღჭურვილია ე.წ ზეთის შეცვლის მონიტორინგის სისტემით, რომელიც ავტომატურად განსაზღვრავს განვლილ მანძილს, პერიოდსა და ზეთის დეგრადაციის ხარისხს. ასეთ დროს საინფორმაციო დაფაზე გამოისახება სპეციალური მანიშნებელი, რომელიც მძღოლს ზეთის შეცვლის შესახებ ამცნობს. 

გაითვალისწინეთ, რომ შეცვლიდან შეცვლამდე აუცილებლად აკონტროლეთ ძრავში ზეთის დონე და საჭიროების შემთხვევაში შეავსეთ კიდეც. რადგან საპოხი საშუალების სათანადო ნიშნულის შენარჩუნება დაგეხმარებათ, თავიდან აირიდოთ ავტომობილის ძვირადღირებული შეკეთება, გადამეტებული ცვეთა და რაიმე სახის დაზიანება. 

ბოლოს კი გეტყვით, რომ არ ჩაასხათ თქვენი ავტომობილის ძრავში უხარისხო და შეუსაბამო ზეთი, რადგან როგორც ზემოთ აღვნიშნეთ, ამან შესაძლოა რიგი პრობლემები გამოიწვიოს და დააზიანოს თქვენი აგრეგატი. ნაცვლად ამისა, გვეწვიეთ ამბოლის ნებისმიერ ფილიალში, სადაც ჩვენი თანამშრომლები სწორად შეგირჩევენ თქვენი მანქანისთვის შესაბამის ზეთს და საჭიროების შემთხვევაში სათანადო რეკომენდაციასაც მოგაწვდიან.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!