კლიმატურ ცვლილებას ავტომობილის გამართულ მდგომარეობაზე დიდი გავლენის მოხდენა შეუძლია. ამ მხრივ არც ზაფხულის სეზონია გამონაკლისი. განსაკუთრებით მაშინ, როდესაც გარე ტემპერატურა ყოველდღიურად უფრო მაღალ ნიშნულს აღწევს. ასეთ დროს მნიშვნელოვანია ჩვენს ავტომობილზე ვიზრუნოთ და ჩავუტაროთ ყველა საჭირო სერვისი, რათა სიცხემ მისი რომელიმე კომპონენტი ან ცვეთადი ნაწილი არ დააზიანოს.

ერთ-ერთ ასეთ დეტალს ავტომობილის მთავარი ენერგიის წყარო, აკუმულატორი წარმოადგენს. ამ ბლოგშიც სწორედ ამ საკითხზე გვინდა გესაუბროთ და განვმარტოთ თუ როგორ მოქმედებს მასზე მაღალი ტემპერატურა და როგორ უნდა მოვუაროთ მას ზაფხულის ცხელ დღეებში.

ტემპერატურის გადაჭარბებულმა ზემოქმედებამ შესაძლოა აკუმულატორის რამდენიმე შიდა პრობლემა გამოიწვიოს, რასაც ყოველთვის ვერ შევამჩნევთ მარტივი ვიზუალური შემოწმებით.

ელექტროლიტების აორთქლება

მაღალმა ტემპერატურამ შესაძლოა გამოიწვიოს აკუმულატორის ელექტროლიტების(წყლისა და გოგირდმჟავას ნარევის) ნორმალურზე უფრო სწრაფი სიჩქარით აორთქლება, რამაც შესაძლოა შეამციროს აკუმულატორის საერთო მოქმედება და მისი სიცოცხლისუნარიანობა.

კოროზია

სითბო აჩქარებს კოროზიის წარმოქმნას და გავლენას ახდენს აკუმულატორის შიდა კომპონენტებზე, რაც ავტომატურად ამცირებს მის უნარს დატენვის შესანარჩუნებლად. რაც უფრო მაღალია ტემპერატურა, კოროზიაც უფრო სწრაფად დაგროვდება როგორც აკუმულატორის ტერმინალებზე, ასევე მის სხვა დეტალებზეც.

სულფაცია

ექსტრემალურმა სიცხემ შესაძლოა ხელი შეუწყოს სულფაციას, პროცესს, რომლის დროსაც ტყვიის სულფატის კრისტალები გროვდება აკუმულატორის ფირფიტებზე. ამ კრისტალებს შეუძლიათ ხელი შეუშალონ აკუმულატორის სწორად ფუნქციონირებისათვის საჭირო ქიმიურ რეაქციებს, რაც გამოიწვევს მის გაუმართავობასა და სიცოცხლისუნარიანობის შემცირებას.

შემცირებული სიმძლავრე

ზაფხულის მცხუნვარე სიცხემ შესაძლოა გამოიწვიოს აკუმულატორის სიმძლავრის მნიშვნელოვანი შემცირება, ანუ იმ ენერგიის რაოდენობა, რომელიც აკუმულატორს შეუძლია შეინახოს და მიაწოდოს ავტომობილს დროთა განმავლობაში.

ყოველივე ზემოხსენებულიდან გამომდინარე, საჭიროა მოვუფრთხილდეთ ჩვენი ავტომობილის აკუმულატორს და ყოველდღიურად თუნდაც რამდენიმე წუთი დავუთმოთ მის მოვლას, რათა შეუფერხებლად გვემსახუროს.

გააჩერეთ ავტომობილი ჩრდილში

თუ ეს შესაძლებელია, თქვენი ავტომობილი აუცილებლად გააჩერეთ ჩრდილში ან ავტოფარეხში, რათა მინიმუმამდე დაიყვანოთ მზის სხივების პირდაპირი ზემოქმედება. ჩრდილში პარკირება მნიშვნელოვნად შეამცირებს ტემპერატურას კაპოტქვეშ და ნაკლებად იმოქმედებს აკუმულატორზე.

ხანმოკლე მგზავრობა

ხშირ შემთხვევაში ხანმოკლე გადაადგილებებმა შესაძლოა ხელი შეუშალოს აკუმულატორის სრულად დამუხტვას და თანდათანობით შეამციროს მისი მოცულობა. ამიტომაც, შეძლებისდაგვარად გაზარდეთ მოძრაობის არეალი, რათა გაიზარდოს აკუმულატორის დატენვის ხანგრძლივობა.

შეამოწმეთ კოროზია

დარწმუნდით, რომ აკუმულატორის ტერმინალები სუფთაა და კოროზიისგან თავისუფალია, რადგან ფხვიერმა ან კოროზირებულმა კავშირებმა შესაძლოა შეაფერხოს ელექტროენერგიის ნაკადი და გაზარდოს წინააღმდეგობა, რაც გამოიწვევს აკუმულატორის ნორმაზე მეტად დაძაბვას.

რეგულარული მოვლა აუცილებელია

აქტიურად მოუარეთ აკუმულატორს, რეგულარულად შეამოწმეთ ის კოროზიის ან დაზიანების სხვა ნიშნებზე. საჭიროების შემთხვევაში გაწმინდეთ ტერმინალების სპეციალური დამცავი ნაკრების ან სოდისა და წყლის ნარევის გამოყენებით. ამასთანავე პერიოდულად შეამოწმეთ ის სპეციალური ხელსაწყოებისა და აპარატის მეშვეობით, რომელიც შეაფასებს თქვენი აკუმულატორის მუშაობას და მარტივად აღმოაჩენს პოტენციურ პრობლემას.

გაითვალისწინეთ ზემოთ აღნიშნული ინფორმაცია და შეძლებისდაგვარად დაიცავით თქვენი აკუმულატორი ზაფხულის ცხელი დღეებისგან, რათა მან უზრუნველყოს თქვენი ავტომობილის გამართული და შეუფერხებელი მუშაობა.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!