საბედნიეროდ, დღესდღეობით ყველაფერი ისეა მოწყობილი, რომ ჩვენთვის სასურველი ინფორმაციის მიღება მრავალი გზითაა შესაძლებელი, იქნება ეს წიგნები, გაზეთები, ინტერნეტსივრცე თუ სხვადასხვა სოციალური ქსელი. თუმცა არსებობს ინფორმაციის მიღების კიდევ ერთი წყარო, რომელსაც აუდიოწიგნები ეწოდება. ამ ბლოგშიც სწორედ მათზე გვინდა გესაუბროთ და ჩამოვთვალოთ ის 8 უპირატესობა თუ სარგებელი, რომელიც აუდიოწიგნებს გააჩნიათ.

აუდიოწიგნები ბავშვებს სრულყოფილად მოსმენის უნარს უყალიბებს:

აუდიოგამომცემელთა ასოციაციის თანახმად, მსგავსი სახის წიგნები ხელს უწყობს წერა-კითხვის ისეთი მნიშვნელოვანი უნარების ჩამოყალიბებასა და გაძლიერებას, როგორებიცაა: ლექსიკის სრულყოფილად ფლობა, ენის ათვისება, სწორი გამოთქმა და სრულყოფილი მოსმენა. უნარები, რომლებიც ადრეული ასაკიდანვე ეხმარება ბავშვებს, წინსვლასა და განვითარებაში.

ხელს უწყობს ნეგატიური აზროვნების შემცირებას:

აუდიოწიგნებს აქვთ ,,ძალა“, უკეთესობისკენ შეცვალონ ადამიანის განწყობა და გაფანტონ ნეგატიური აზრები. კვლევებით დასტურდება, რომ მათთვის ვინც მიდრეკილია შფოთვისა და დეპრესიისკენ, სხვის მიერ სასურველი ინფორმაციის ხმამაღლა წაკითხვა ან მოსმენა, ეხმარებათ უარყოფითი ფიქრების განდევნაში.

მოსმენასა და კითხვას ერთი და იგივე შედეგი აქვს:

UC Berkeley-ისა და Gallant Lab-ის მკვლევარებმა სპეციალური ცდა ჩაატარეს, რის საფუძველზეც ისინი აკვირდებოდნენ 9 ადამიანის ტვინს, მათგან ნაწილი კითხულობდა, ხოლო ნაწილი კი ინფორმაციას მოსმენით იღებდა. სკანირებით დაკვირვებამ ცხადყო, რომ ორივე გზით მიღებული ინფორმაცია ერთსა და იმავე კოგნიტურ და ემოციურ სფეროებს ასტიმულირებდნენ ტვინში.

გვეხმარება თვალების მოდუნებაში:

კვლევებით დასტურდება, რომ დღის განმავლობაში ადამიანი საშუალოდ 7 საათს ატარებს ეკრანთან, რამაც შესაძლოა გამოიწვიოს, მხედველობის დაქვეითება, თვალების დაძაბვა და ისეთი გრძელვადიანი პრობლემები, როგორიცაა ახლომხედველობა. ეს კი კიდევ ერთი მიზეზია, თუ რატომ უნდა გამოვიყენოთ აუდიოწიგნები.

პირდაპირ გავლენას ახდენს ძილზე:

ეკრანის ცისფერი შუქი არღვევს ჩვენს რიტმს, რაც ართულებს ღამის საათებში დაძინებას. მოსმენით მიღებული ინფორმაცია კი ჩვენს გონებას და თვალებს საშუალებას აძლევს მოდუნდეს და დაისვენოს.

აუმჯობესებს დროის მართვას:

აუდიოწიგნები გვეხმარება, პარალელურად რაიმე საქმე ვაკეთოთ, იქნება ეს მოგზაურობისას მანქანის მართვა თუ სახლის დალაგება ან სხვა რაიმე საყოფაცხოვრებო საქმიანობა.

ხელს უწყობს წიგნიერების უნარების ჩამოყალიბებას:

აღსანიშნავია, რომ აუდიოწიგნებს შეუძლიათ კითხვის ისეთი უნარების განვითარება, როგორებიცაა გაშიფვრა და წაკითხულის გააზრება.

,,სხვა სამყარო“:

აუდიოწიგნებს შეუძლიათ ჩვენი ,,ფანტაზია მოხიბლონ“, რაც მსმენელს საშუალებას აძლევს ერთდროულად შექმნას მთელი სამყარო, როგორც საკუთარ თავში, ასევე მის გარეთაც. ყოველდღიური საზრუნავისგან თავის დაღწევა მძლავრი ინსტრუმენტია ადამიანის სიმშვიდისათვის, ამის უნარი კი ნამდვილად შესწევს აუდიო წიგნების მოსმენას.

სწორედ ამ 8 უპირატესობის გაცნობა გვინდოდა თქვენთვის, რომლებიც უდავოდ ადასტურებენ, რომ მოსმენით მიღებული ინფორმაცია, ხელს უწყობს ჩვენი გონებისა და თვალების მოდუნებას, არის სასიამოვნო მოსასმენი, ხელს უწყობს შფოთვის შემცირებას და ამავე დროს საშუალებას გვაძლევს, პარალელურად სხვა საქმეც ვაკეთოთ.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!