ჩვენი ერთგული მკითხველისათვის მარტივი გასაგები რომ იყოს, პირველ ეტაპზე განვმარტავთ, თუ რა არის ზოგადად ავტოინდუსტრია და რას მოიცავს ის, შემდგომ კი გადავიდეთ უშუალოდ იმ შიდა ბაზრებსა და მათ დასახელებებზე, რომლებიც ყველაზე გავრცელებულია და არსებობს როგორც ევროპისა და აზიის, ასევე - ამერიკის ტერიტორიებზე.

მაშ ასე, მოკლედ და გასაგებად რომ ავხსნათ, ავტოინდუსტრია მოიცავს კომპანიებისა და ორგანიზაციების ფართო სპექტრს, რომლებიც მონაწილეობენ ავტომობილების დიზაინის შექმნაში, განვითარებაში, მოდიფიცირებასა და შეკეთებაში - ამასთანავე, მარკეტინგში, გაყიდვებსა და წარმოებაში. საავტომობილო ინდუსტრია ერთ-ერთი მოწინავეა შემოსავლების მხრივ და, ამასთანავე, იგი ლიდერობს მიზნობრივი ხარჯების მხრივაც.

აქვე უნდა აღინიშნოს იმ რეგულაციების შესახებ, რომლებსაც აწესებს ესა თუ ის სახელმწიფო ავტომობილების წარმოებისას. შესაბამისად, სატრანსპორტო საშუალების რეგულაციები არის იგივე მოთხოვნები, რომლებსაც უნდა აკმაყოფილებდეს ავტომობილი, რათა დამტკიცდეს გასაყიდად ან გამოსაყენებლად რომელიმე ქვეყანასა ან კონკრეტულ რეგიონში. 

აღნიშნული რეგულაციები, როგორც წესი, განსაზღვრულია სახელმწიფო კანონმდებლობით და მას კურირებს შესაბამისი სამთავრობო ორგანო. 

რეგულაციები ძირითადად ეხება ისეთ ასპექტებს, როგორებიცაა: განათება, უსაფრთხოების კონტროლი, გარემოს დაცვა და ქურდობის საწინააღმდეგო შესაბამისი ოფციები. ასე რომ, რეგულირება პირდაპირ გავლენას ახდენს ავტომობილის ვიზუალზე, მისი კომპონენტების დიზაინსა თუ უსაფრთხოების მახასიათებლებზე. 

სწორედ ამ რეგულაციების გათვალისწინებით, მსოფლიოში არსებობს რამდენიმე მსხვილი შიდა საავტომობილო ბაზარი, რომლებსაც ავტომოყვარულები, ხშირ შემთხვევაში არაოფიციალური ტერმინებით მოიხსენიებენ, ესენია:

JDM: ჩვენ უკვე გიამბეთ JDM-ზე - ამ ტერმინით მოიხსენიებენ ავტომობილებს, რომლებიც იწარმოება მხოლოდ იაპონიის შიდა ბაზრისთვის და მორგებულია იმ კანონმდებლობასა და რეგულაციებს, რომელსაც აწესებს იაპონიის მთავრობა. შესაბამისად, JDM ითვლება იაპონიაში წარმოებული და ამ ხალხისა თუ გზებისთვის მორგებული ავტომობილი.

USDM: არაოფიციალური ტერმინი, რომლითაც აღნიშნავენ ამერიკული ბრენდის ავტომობილებსა და ნაწილებს, რომლებიც წარმოებულია შეერთებული შტატების შესაბამისი მოთხოვნებისა და რეგულაციების სრული დაცვით. როგორც წესი, ისინი ძირითადად ეხება განათებებსა და ბამპერებს, რომლებიც განსხვავდება ევროპული სტანდარტებისაგან.

ADM: ეს კი ავსტრალიის შიდა ბაზრისთვის და მათი რეგულაციების სრული დაცვით წარმოებული ავტომობილებია. აღსანიშნავია ის ფაქტი, რომ ამ ტერიტორიაზე მრავლად გვხვდება JDM ავტომობილები.

EDM: ამ ტერმინით აღინიშნება, ევროპის ქვეყნების შეთანხმების შედეგად დამტკიცებული რეგულაციების შესაბამისი წარმოების ავტომობილები, რომლებიც მორგებულია ევროპელი ხალხისა და მათი გზების სტანდარტებს.

CHDM: ეს კი ჩინეთის შიდა ბაზრისთვის წარმოებული ავტომობილებია, რომლებიც JDM მანქანების მსგავსად არ არის ექსპორტზე გათვლილი. თუმცა, ამ ავტომობილებს შევხვდებით აზიასა და ავსტრალიაშიც.

ეს იყო ის ინფორმაცია, რომელიც ჩვენი ერთგული მკითხველისათვის გვინდოდა მიგვეწოდებინა. შესაძლოა, გაგონილიც კი გქონდათ ზოგიერთი მათგანის შესახებ და ალბათ უფრო JDM ავტომობილებზე, ახლა კი ყველა სხვა დანარჩენის შესახებაც შეიტყეთ.

გისურვებთ მშვიდობიან მგზავრობას,

ამბოლი, მეტი დრო მოძრაობისთვის!