მსოფლიოში მრავალი ტიპისა თუ კლასის ავტომობილი არსებობს და ისინი შექმნილია იმისათვის, რომ მფლობელის სხვადასხვა მოთხოვნები დააკმაყოფილონ. ზოგიერთი განსაკუთრებული ვიზუალით გამოირჩევა, ზოგი ჩქარია, სხვები კი რაიმე კონკრეტული მიზნისთვის არიან შექმნილნი, მაგალითად უგზოობისთვის. მაგრამ არსებობს კიდევ ერთი კლასი, რომელშიც ის იშვიათი ავტომობილები ერთიანდებიან, რომლებიც ყველასათვის ხელმისაწვდომი არ არის და ლიმიტირებული რაოდენობით შეიქმნა.

ამ ბლოგში სწორედ ასეთი ტიპის ავტომობილებზე გვინდა გესაუბროთ და წარმოგიდგინოთ ის 5 იშვიათი ავტომობილი რომლებიც მსოფლიოს მასშტაბით სულ რამდენიმე ეგზემპლარად შეიქმნა ან რაიმე ნიშნით განსაკუთრებულია.

1962 წლის Ferrari 250 GTO: არსებობს უამრავი ფასდაუდებელი Ferrari, თუმცა 250 GTOგანსაკუთრებულია. ის 1962 წელს გამოვიდა და სულ 39 ერთეული დამზადდა, აქედან გამომდინარე ის იშვიათი ავტომობილების კლასს მიეკუთვნება. მის შექმნაში თავად ენცო ფერარი იღებდა მონაწილეობას და ეს ავტომობილი გამოსვლისთანავე საკმაოდ სოლიდურ თანხად იყო შეფასებული. დღესდღეობით კი ორიგინალ და კარგ მდგომარეობაში მისი ნახვა ნამდვილად გაგიჭირდებათ ან თუ ნახავთ კოლოსალური თანხა ეღირება. მაგალითისთვის, 2018 წელს ერთ-ერთი მათგანი 48,4 მილიონ დოლარად გაიყიდა.

1955 წლის Mercedes 300SL Gullwing: ეს მოდელი წარმოადგენს ერთ-ერთ ყველაზე ძვირადღირებულ მერსედესს რაც კი ოდესმე შექმნილა. ის 1950-იანი წლების პირველ ნახევარში გამოვიდა და იმ დროისათვის ავტო ინდუსტრიაში ფურორი მოახდინა. კონკრეტულად კი მისი ორივე კარი, როგორც ყველასათვის ცნობილია, ნაცვლად გვერდითა მხრიდან გაღებისა, სახურავზე იყო დამაგრებული და გახსნისას ზემოთ, ფრთებივით იწეოდა, სწორედ ამიტომ შეარქვეს მას ,,თოლია“. დღეს ეს ავტომობილი საკოლექციო მანქანათა სიაში მყარად იკავებს საკუთარ ადგილს.

1996 VECTOR M12: ცოტას თუ სმენია ამ ძლიერი სუპერქარის შესახებ, რომელიც 1996 წელს წარადგინეს ჟენევის ავტო შოუზე. აღნიშნული მოდელი მთლიანად დაფუძნებული იყო Lamborghini Diablo-ზე. ის იყო იმ დროისათვის ერთ-ერთი მძლავრი ავტომობილი, რომლის V ტიპის 12 ცილინდრიანი ძრავი 500 ცხენის ძალას გამოიმუშავებდა და 0-100კმ/სთ-მდე 5 წამში ჩქარდებოდა, მაქსიმალური სიჩქარე კი რომლის მიღწევაც მან შეძლო 305 კმ/სთ იყო. სამწუხაროდ, კომპანიის არასწორმა მენეჯმენტმა საბოლოოდ მისი ბაზრიდან ნაადრევად გაყვანა გამოიწვია, დავიწყებას მალევე მიეცა და დღეს ნაკლებად თუა ცნობილი.

1964 წლის FORD GT 40 : გასული საუკუნის 60-იანი წლების ერთ-ერთი ყველაზე ცნობილი ავტომობილი, რომელმაც საბოლოოდ დაასრულა Ferrari-ის დომინირება Le Mans-ის 24 საათიან რბოლებში. რამაც ის მსოფლიო ვარსკვლავი გახადა და FORD-ის ფანების რიცხვი სოლიდური რაოდენობით გაზარდა. ეს ლეგენდარული მანქანა, კეროლ შელბიმ და კენ მაილსმა პირადად შექმნეს, რომელიც არამხოლოდ ელვისებურად ჩქარი, არამედ მკვეთრი და აგრესიული სტილითაც გამოირჩეოდა, რაც პირდაპირ ეხმიანებოდა აშშ-ის ,,კუნთიანი ავტომობილების“ კულტურას. დღეს მისი ფასი 7 მილიონ დოლარს აღემატება.

1962 წლის Aston Martin DB 4 GT Zagato: ის წარმოადგენს კლასიკური DB 4-ის გაუმჯობესებულ ვარიანტს, 1962 წელს მოდელი გადაეცა იტალიელ ავტომწარმოებელს Zagato-ს, რომელმაც ვიზუალის დახვეწასთან ერთად მის ძრავზეც იზრუნა და დამატებით რამდენიმე ცხენის ძალით გაძლიერება შეძლო. DB 4 Zagato შეზღუდული რაოდენობით, მხოლოდ 25 ერთეული დამზადდა. აღნიშნული ფაქტი, რა თქმა უნდა, მის ღირებულებაზეც აისახება და დღეს მისი ფასი დაახლოებით 14.3 მილიონი დოლარია.

ეს ის 5 ავტომობილია, რომლებზედაც ამ ბლოგში გვსურდა გვესაუბრა, რომელიმე მათგანი შესაძლოა თქვენი ერთ-ერთი საყვარელი მოდელიც კი იყოს. ერთი კი უდაოა, მათ თავის დროზე შეძლეს და დაწერეს დაუვიწყარი ისტორია.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!