![](/upload/BlogPosts/7_ავტომობილი_რომელიც_დონორი_ძრავითაა_საიტის_ბლოგი_0dbf41e2.jpg)
7 ავტომობილი რომელიც დონორი ძრავითაა აღჭურვილი
გასული ათწლეულების განმავლობაში უამრავი დამოუკიდებელი საავტომობილო ბრენდი იყიდა მსხვილმა კორპორაციებმა, რაც იმას ნიშნავს, რომ ბევრი მარკა თუ მოდელი იზიარებს როგორც ცალკეულ ცვეთად ნაწილებს, ასევე თვით ძრავსაც. როდესაც ავტომობილი აღჭურვილია ძრავით, რომელიც შექმნილია სხვა ბრენდის მიერ, ასეთ შემთხვევაში ამბობენ, რომ ავტომობილს აქვს ,,დონორის ძრავი“. ამ ბლოგშიც სწორედ ამ ტიპის, 7 ყველასათვის ცნობილ ავტომობილს შემოგთავაზებთ.
Mercedes-Benz A Class: 2012 წელს მერსედესმა საზოგადოებას განახლებული სპორტული ჰეჩბეკი წარუდგინა, რომელშიც რამდენიმე მოცულობის, როგორც ბენზინის, ასევე დიზელის ძრავები მოათავსა. ეს მოდელი, მისი პრაქტიკულობიდან გამომდინარე, ერთ-ერთი ყველაზე გაყიდვადი და მოთხოვნადი ავტომობილია. თუმცა, აღსანიშნავია, რომ 1.5 ლიტრის მოცულობის დიზელის ძრავი, რომლითაც A Class-ია აღჭურვილი, არა Mercedes-ის, არამედ Renault-ის მიერაა შექმნილი. ეს ძრავი გამოიყენება ასევე Nissan-ისა და Dacia-ს რამდენიმე მოდელზე. თუმცა A Class-ში მისი სიმძლავრე შეცვლილია და გამოიმუშავებს 116 ცხენის ძალას.
Ford Focus ST: ფორდი უკვე კარგა ხანია ,,ცხელი“ ჰეჩბეკებით დომინირებს ბაზარზე. როგორც Focus, ასევე Fiesta, შედარებით დაბალფასიანი და ხელმისაწვდომი მოდელებია, მათი ტურბინირებული ძრავები კი ნამდვილად აღძრავს ამაღელვებელ ემოციებს და გულგრილს არავის ტოვებს. Ford Focus ST-ის უახლესი მოდელი აღჭურვილია Volvo-ს 2.3 ლიტრის მოცულობის ტურბო ძრავით, რომელიც 220 ცხენის ძალას გამოიმუშავებს, რაც საკმაოდ კარგი მაჩვენებლით აჩქარებს ავტომობილს.
Toyota GT 86: ეს მოდელი 2012 წელს გამოჩნდა ბაზარზე და იმ დღიდან მოყოლებული უამრავი გულშემატკივარი გაიჩინა მთელი მსოფლიოს მასშტაბით. ეს კი განპირობებულია ამ მოდელის განსხვავებული ვიზუალური შესრულებითა და Toyota-ს გამძლეობითა და საიმედოობით. თუმცა, უნდა აღინიშნოს ის ფაქტი, რომ მისი ძრავი არა Toyota-მ, არამედ SUBARU-მ შექმნა.
Alfa Romeo Giulia QV: Ferrari უკვე კარგა ხანია მონაწილეობას იღებს Alfa Romeo-ს სხვადასხვა მოდელების დაპროექტებაში, ამ მხრივ გამონაკლისი არც Giulia აღმოჩნდა. სწორედ Ferrari-მ დააპროექტა მისთვის ძრავი, რითიც Giulia, BMW M3-ის პირდაპირ კონკურენტად აღიქმება.
Mclaren F1: იმის გათვალისწინებით, რომ ეს მოდელი ისედაც შეზღუდული რაოდენობით უნდა დამზადებულიყო, მაკლარენის გუნდის წევრებმა, დრო და რესურსი აღარ დახარჯეს მისი ძრავის შექმნაზე, სამაგიეროდ კი ეს საქმე BMW-ს მიანდეს. სწორედ BMW-ს გუნდმა შექმნა ის ლეგენდარული და მონსტრი 6.1 ლიტრის მოცულობის ძრავი, რომლითაც ეს მოდელი თავს იწონებს. ამ და სხვა მახასიათებლების გამო Mclaren F1 ნამდვილად არის ეპოქის ერთ-ერთი ყველაზე მძლავრი და ინოვაციური სუპერქარი.
Pagani Huayra: Pagani ეს არის იტალიური ავტოსამყაროს ნამდვილი სიამაყე, მისი დახვეწილი და აგრესიული ვიზუალი, სიმძლავრესთან ერთად, იდეალურ ტანდემს ქმნის. მისი უახლესი მოდელი, Huayra აღჭურვილია Mercedes-Benz-ის მიერ შექმნილი 12 ცილინდრიანი ძრავით, რომელიც 789 ცხენის ძალას გამოიმუშავებს, ეს მაჩვენებელი კი მას ნამდვილ სპორტქარად აქცევს.
Smart ForTwo: სმარტმა თავის მისიად პატარა და პრაქტიკული ავტომობილების შექმნა დაისახა, ეს კი მას ნამდვილად კარგად გამოსდის. ხოლო ForTwo არის ყველაზე თანამედროვე და ინოვაციური მოდელი, რაც Mercedes-ის საკუთრებაში არსებულ ბრენდს დღემდე შეუქმნია. ეს მოდელი არ არის შექმნილი სიჩქარისთვის, ის იწარმოება იმისთვის, რომ რაც შეიძლება პატარა სივრცე და ადგილი დაიკავოს. აღსანიშნავია, რომ ამ მოდელსა და Renault Twingo-ს ერთი და იგივე ძრავი აქვთ, ისევე როგორც Renault-სა და Dacia-ს რამდენიმე მოდელს. უკანა ნაწილში განთავსებული ძრავი, მაქსიმალურ კომფორტსა და პრაქტიკულობას უზრუნველყოფს.
სწორედ ამ 7 ავტომობილზე გვინდოდა გვესაუბრა დღევანდელ ბლოგში - ესენი არიან ყველასათვის კარგად ნაცნობი ავტომობილები, რომელთა ძრავები სხვა ავტომწარმოებლის მიერაა დამზადებული.
გისურვებთ მშვიდობიან მგზავრობას.
ამბოლი, მეტი დრო მოძრაობისთვის!
Did you like the article?
Share on social platforms