საბურავი რომ ავტომობილის ერთ-ერთი უმნიშვნელოვანესი დეტალია ეს უკვე ყველამ კარგად ვიცით და ამასთანავე ამბოლის ბლოგის ერთგულ მკითხველებს მრავალჯერ წაგიკითხავთ, რომ საბურავი - ეს არის ერთადერთი ცვეთადი დეტალი, რომელსაც უშუალო შეხება აქვს სხვადასხვა სახის რელიეფთან.

დღემდე მრავალი სახისა და ტექნოლოგიის საბურავი შექმნილა და მსოფლიო ბაზარზე მოწინავე ბრენდები მუდმივად ცდილობენ, მათი პროდუქტი რაც შეიძლება მორგებული იყოს მომხმარებლის მოთხოვნებს - მათ კომფორტულ და უსაფრთხო მგზავრობას.

თუმცა, დღევანდელ ბლოგში გვინდა, გესაუბროთ განსხვავებული და ინოვაციური ტექნოლოგიის Run-Flat-ის ტიპის საბურავზე. კონკრეტულად კი, რისთვის შეიქმნა, რა უპირატესობა აქვს მას ჩვეულებრივ საბურავთან შედარებით, რამდენად კომფორტული და უსაფრთხოა და საერთოდ საიდან იღებს სათავეს ის..

Run-Flat საბურავს სხვაგვარად ნულოვანი წნევის მქონე საბურავადაც მოიხსენიებენ. პირველად, აღნიშნული ტიპის საბურავი 1930-იან წლებში გამოჩნდა თუმცა, საჯაროდ ბაზარზე 1980-იან წლებში გამოვიდა.

ჩვეულებრივ საბურავთან შედარებით, მას აქვს ბევრად სქელი ფენის გვერდითა კედლები, რის ხარჯზეც, საბურავის უეცარი დაზიანების, ანდაც მასში არასაკმარისი წნევის პირობებშიც კი, ის უძლებს ავტომობილის მასას. შედეგად არ ზიანდება არც საბურავი და არც - დისკი. მეტიც, იმ შემთხვევაში თუ Run-Flat ტიპის საბურავი დაგიზიანდათ, მწარმოებლები ირწმუნებიან, რომ მისით გადაადგილება 80კმ/სთ სიჩქარითაც კი შეიძლება და ასეთ დროს მას შეუძლია 80 კილომეტრის გავლა. ეს კი, წესით, საკმარისი უნდა იყოს, რათა მძღოლი უახლოეს სახელოსნომდე შეფერხების გარეშე მივიდეს. მისი შექმნის იდეაც სწორედ ეს იყო - დაზიანების შემთხვევაში საჭეზე კონტროლის დაკარგვის გარეშე მოძრაობის გაგრძელება.

უპირატესობები:

• უსაფრთხოება, მეტი კონტროლი დაზიანებული საბურავით მართვის დროს.

• მძღოლს აქვს საშუალება დაზიანების შემთხვევაშიც კი განაგრძოს მოძრაობა .

• კომფორტის მხრივ, მძღოლს არ უწევს დაზიანებული საბურავის სათადარიგოთი შეცვლა და ამასთანავე საბარგულში მეტი ადგილი რჩება ბარგისთვის.

ნაკლოვანებები:

• ზოგიერთი ამ ტიპის საბურავი მოძრაობისას ხმაურობს, რაც სალონში მყოფი მგზავრებისათვის გარკვეული დისკომფორტია.

• მიუხედავად იმისა, რომ დაზიანებულმა საბურავმა შესაძლოა მიგიყვანოთ უახლოეს სახელოსნომდე, უმეტეს შემთხვევაში ის ვერ შეკეთდება.

• ამ ტიპის საბურავების უმეტესობას პრემიუმ ღირებულება აქვს.

• და ბოლოს ამ ტიპის საბურავზე, ზოგიერთი ზომა და პარამეტრი შესაძლოა არ იყოს ხელმისაწვდომი.

ახლა თქვენ უკვე იცით რა არის Run-Flat საბურავი, რა უპირატესობები აქვს და საერთოდ რისთვის შექმნა. სულ ეს იყო, რისი მოყოლაც გვინდოდა, დაელოდე ჩვენს შემდეგ ბლოგს. 

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!