Mercedes-ს თავის ისტორიაში მრავალი გამორჩეული და საკულტო მოდელი შეუქმნია, თუმცა მათ შორისაც არის განსაკუთრებით დასამახსოვრებელი ავტომობილები, რომლებმაც საზოგადოებაში უდიდესი მოწონება და აღიარება დაიმსახურეს. ერთ-ერთი მათგანი, უდავოდ, W124-ია, რომელმაც ყველანაირ გამოწვევასა თუ კრიტიკას გაუძლო. გერმანელებმა ყველა რესურსი ჩადეს, რათა მანქანა მაქსიმალურად კონკურენტუნარიანი და მფლობელზე მორგებული ყოფილიყო.

ავტომობილი 1984-1997 წლებში იწარმოებოდა და ამ ხნის მანძილზე 2,5 მილიონზე მეტი ეგზემპლარი დამზადდა, მათ შორის იყო, როგორც სედანი, ასევე კუპე და კაბრიოლეტის მოდელები. ძალური აგრეგატის მხრივაც საკმაოდ მრავალფეროვანი არჩევანი იყო. სურვილისამებრ, პოტენციურ მყიდველს შეეძლო არჩევანი გაეკეთებინა მინიმალური მოცულობის 2.0 დიზელის ძრავიდან, მაქსიმალურ 5.0 და 6.0 AMG ვერსიებს შორის.

ამ ლეგენდარული მოდელის დიზაინერი, იტალიელი, Bruno Sacco იყო, რომელმაც საზოგადოებას W124-ის გარდა სხვა მრავალი ავტომობილიც წარუდგინა, მაგალითად: C111, S-კლასის მდიდრული მოდელების სამი თანმიმდევრული თაობა, W126, W140 და W220, ასევე R 129 SL, C-class W202, E-class W210, CLK და SLK. 

W124-ის  თითოეული დეტალი დიდი გულმოდგინებითა და მკაცრი გამოცდების მთელი სერიებით იქმნებოდა. ავტომობილში გამოყენებული იყო, იმ დროისათვის მოწინავე და ინოვატორული ფუნქციები. დროსთან ერთად საზოგადოება სულ უფრო რწმუნდებოდა, რომ ის ნამდვილად იყო ,,უკვდავი” მოდელი, რომელიც ყველანაირ კლიმატურ პირობებს, ზეწოლასა თუ სირთულეს უძლებდა. მისი გამოსვლიდან თითქმის ნახევარი საუკუნე გავიდა და ზოგიერთი მათგანის ოდომეტრის ჩვენება მილიონსაც კი გასცდა, თუმცა დღესაც შესანიშნავ მდგომარეობაში მყოფნი ერთგულად ემსახურებიან თავის მფლობელებს. 

დღევანდელ ბლოგში გვინდა გესაუბროთ W124-ის გამორჩეულ ეგზემპლარზე SG 65-ზე. ეს არის Mercedes-ის ერთ-ერთი ყველაზე მძლავრი მოდელი, სპეციალურად მათთვის, ვინც ვერ კმაყოფილდება E 500-ის 5 ლიტრიანი V8 ძრავის მონაცემებით, ან თუნდაც E 60 AMG-ის კიდევ უფრო გაზრდილი სიმძლავრით.

სწორედ ამიტომ, გერმანულმა სახელოსნომ, Stern Garage-მ, რომელიც 1980-იანი წლებიდან მოყოლებული აღადგენს და ყიდის Mercedes-ის კლასიკური მოდელების სათადარიგო ნაწილებს, შექმნა ყველაზე ძლიერი W124. Mercedes Sg 65-ს აქვს 6 ლიტრიანი Twin-turbo V12 ძრავი, რომელიც 700 ცხენის ძალასა და 1000 Nm მაბრუნებელ მომენტს გამოიმუშავებს. 

Stern Garagem-მ შეცვალა 6 ლიტრიანი V12 Twin-turbo ძრავი, თუმცა არ აკონკრეტებს თუ როგორ მიაღწიეს ამ უზარმაზარ სიმძლავრეს ან რა ტიპის გადაცემათა კოლოფი გამოიყენეს. აღსანიშნავია, რომ Mercedes E500-სს ჰქონდა 4 სიჩქარიანი ავტომატური გადაცემათა კოლოფი, რომელიც ასევე გამოიყენებოდა E60 AMG-შიც. V12-ის უფრო მაღალი წონისა და უზარმაზარი სიმძლავრის კომპენსირებისთვის Stern-garagem-მ სრულად შეცვალა ავტომობილის დაკიდების სისტემა და დაამონტაჟა 400 მილიმეტრიანი კერამიკული სამუხრუჭე დისკები. მანქანის წონის შესამცირებლად, სახელოსნოს ბიჭებმა, მანქანაზე  სპეციალურად დააყენეს ნახშირბადის ბამპერები, გვერდითა კანტები და ფარები.

ინტერიერი განახლებულია და გამოყენებულია უმაღლესი ხარისხის დახვეწილი მასალები, უკანა მხარეს სტანდარტულისგან განსხვავებით განთავსდა ორი ინდივიდუალური სავარძელი, სპიდომეტრი კი მაქსიმალურ 400 კმ/სთ-ს მიუთითებს.

საბოლოოდ კი, დანამდვილებით შეიძლება ითქვას, რომ ეს ნამდვილად,,ცხვრის ტყავში გადაცმული მგელი”, ბევრად უფრო სწრაფია, ვიდრე E60 AMG, რომელიც 0-100 კმ/სთ-ს საშუალოდ 5,6 წამში ავითარებს და მაქსიმალურ 295 კმ/სთ-ს აღწევს. თუმცა Stern Garage არ ავრცელებს ავტომობილის ამ მონაცემებს ან ფასს. 

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!