პირველი ავტომობილის შეძენა მრავალ დადებით ემოციასთან, ფიქრთან, იმედებსა და საბოლოოდ დასახული მიზნის მიღწევასთან ასოცირდება. ის ხდება ჩვენი რკინის მეგობარი, რომელთანაც საკმაო დროს გავატარებთ, მოვინახულებთ სხვადასხვა ადგილს და ხანდახან კარგი მუსიკის ფონზე ემოციებსაც გავუზიარებთ, საბოლოოდ კი, ერთად შეგროვილი მოგონებების კრებული დაგვრჩება.

თუმცა, სანამ ეს ყველაფერი მოხდება, მანამდე რამდენიმე მნიშვნელოვანი საკითხია გასათვალისწინებელი, რომლებიც დაგვეხმარება, სწორად შევარჩიოთ ავტომობილი, რათა ის მაქსიმალურად მორგებული იყოს ჩვენს მოთხოვნებსა და არსებულ ბიუჯეტთან. ამ ბლოგშიც სწორედ ამ საკითხზე ვისაუბრებთ და ჩამოვთვლით იმ 5 საყურადღებო საკითხს, რომლებიც შეძენამდე უნდა გავითვალისწინოთ.

ახალი თუ მეორადი?

დღევანდელი რეალობიდან გამომდინარე, საზოგადოების ძალიან მცირე რაოდენობას შეუძლია ახალი ავტომობილის შეძენა პირდაპირ ცენტრიდან. ეს, რა თქმა უნდა, მშვენიერი გადაწყვეტილებაა, იცი რომ პირველი მფლობელი ხარ, იცი რომ სუფთა ისტორია აქვს, ავტომობილი სულ ახალია და თუ რამე გაუფუჭდება, გარანტია აანაზღაურებს, ასე რომ საფიქრალი არაფერი გაქვს და ისღა დაგრჩენია, მასთან ერთად მშვენიერი ადგილები მოინახულო. თუმცა, როგორც აღვნიშნეთ, ეს საკმაოდ დიდ თანხებთანაა დაკავშირებული. მაგრამ არსებობს სხვა ვარიანტიც, რომელსაც ყველაზე ხშირად ვხვდებით. სიტუაცია, როდესაც მეორად ავტომობილს ვყიდულობთ. ასეთ შემთხვევაში ფასი რამდენჯერმე ნაკლებია, თუმცა, პირველ ეტაპზე, როდესაც ნაკლებად ან თითქმის არ გაქვს ავტომობილით მოძრაობის გამოცდილება, ჯობს შედარებით ნაკლებ ფასად შეიძინო კარგ მდგომარეობაში მყოფი მეორადი ავტომობილი, რომელიც შენს მოთხოვნებს დააკმაყოფილებს.

სად შევიძინოთ?

ასეთი ავტომობილის შესაძენად რამდენიმე გზა არსებობს. ჩვენთვის სასურველი ავტომობილის მოძებნა ინტერნეტის საშუალებით სხვადასხვა საიტზეა შესაძლებელი, მაგალითისთვის შეგვიძლია განვიხილოთ ყველასათვის კარგად ცნობილი MYauto.ge. ძიების გასამარტივებლად ვებგვერდი რამდენიმე ძირითადი ინფორმაციის მიხედვით, გაფილტვრის საშუალებას იძლევა. იქნება ეს სასურველი ინტერიერისა თუ ექსტერიერის ფერი ან თუნდაც სალონში გამოყენებული ტექსტურა, ძრავის მოცულობა, გადაცემათა კოლოფის ტიპი, რომელ საწვავს მოიხმარს და სხვა. ამასთანავე ავტომობილის რეალურ პირობებში დათვალიერება და შერჩევა, საქართველოში ყველაზე დიდ ავტობაზრობაზე, რუსთავშია შესაძლებელი. აქ თქვენ შეხვდებით სხვადასხვა ფერისა თუ მონაცემის ერთსა და იმავე მოდელს, ფასი კი მათი მდგომარეობის მიხედვით მერყეობს. ბოლოს კი, მეორადი ავტომობილის შეძენა, რამდენიმე უცხოურ აუქციონზეცაა შესაძლებელი. თუმცა, წინა ორი ვარიანტისგან განსხვავებით, ასეთ შემთხვევაში ავტომობილის ჩამოსასვლელად გარკვეული პერიოდია საჭირო (დაახლოებით 2-3 თვე), გარდა ამისა, ეს ავტომობილები, ძირითად შემთხვევაში დაზიანებულები ჩამოდის, რომლის შეკეთებაც დამატებით თანხებს მოითხოვს. ამ ყველაფერს კი განბაჟების საფასურიც ემატება. ამ სამი ვარიანტიდან, თქვენი გადასაწყვეტია, რომელს აირჩევთ.

ისტორია

მოგეხსენებათ, რომ ყველა ავტომობილს აქვს ე.წ VIN კოდი, რომლის შემოწმებითაც, ავტომობილის წარსულის შესახებ მრავალი ინფორმაციის მიღებაა შესაძლებელი. ამისათვის კი სულ რამდენიმე წუთი და ინტერნეტია საჭირო. Google-ის საძიებო ველში მიუთითებთ თქვენთვის სასურველი ავტომობილის VIN კოდს და შედეგად მიიღებთ გაყიდვის მომენტში ავტომობილის მდგომარეობის ამსახველ სურათებს, რა დაზიანებით იყო, რა რაოდენობის გარბენს აჩვენებდა ოდომეტრი და სხვა. ამასთანავე, გარკვეული თანხის სანაცვლოდ, VIN კოდით დეტალური ინფორმაციის ამოღება CARFAX-სა და CLEARVIN-ზეცაა შესაძლებელი. ეს ერთ-ერთი მნიშვნელოვანი საკითხია, რადგან პირდაპირ აისახება ავტომობილის მდგომარეობაზე. ის, თუ რამდენი მფლობელი ჰყავდა, რამდენად დროულად უტარდებოდა საჭირო სერვისი ან რამდენად ხარისხიანი იყო შეცვლილი ცვეთადი ნაწილი თუ საპოხი საშუალება. ყურადღებით შეამოწმეთ, რადგან კარგი მფლობელის ხელში ნამყოფი ავტომობილი, ნაკლებ პრობლემას შეგიქმნით მომავალში.

მექანიკური თუ ავტომატური?

გადაცემათა კოლოფი ავტომობილის ერთ-ერთი მნიშვნელოვანი დეტალია, რომელსაც მის გამართულ და უსაფრთხო ფუნქციონირებაში დიდი როლი უჭირავს. ორივე მათგანს, როგორც ავტომატურს, ისე მექანიკურს, თავისი დადებითი და უარყოფითი მხარეები აქვს. ავტომობილი მექანიკური გადაცემათა კოლოფით ხშირად უფრო იაფია და ამასთანავე ნაკლებ ხარჯებთანაა დაკავშირებული მისი შენახვა ვიდრე იმავე მოდელის ავტომობილი ავტომატური გადაცემათა კოლოფით. ამასთანავე, მექანიკურ გადაცემათა კოლოფს შეუძლია გარკვეული რაოდენობის საწვავის ეკონომია. თუმცა, მეორე მხრივ, ავტომატური კოლოფის მქონე ავტომობილის მართვა ბევრად ადვილი და კომფორტულია. თუ კარგად იზრუნებთ მასზე და დროულად ჩაუტარებთ საჭირო სერვისს, გამართულად და უღალატოდ გემსახურებათ. საბოლოოდ, თქვენ უნდა გადაწყვიტოთ რომელი მათგანია თქვენთვის უკეთესი.

უსაფრთხოება

თანამედროვე ავტომობილები აღჭურვილია უსაფრთხოების სხვადასხვა ფუნქციით, რომლებიც უზრუნველყოფენ ჩვენს მშვიდობიან მგზავრობას. საყურადღებოა, რომ 1993 წლიდან მოყოლებული არსებობს სპეციალური პროგრამა სახელწოდებით ANCAP, რომელსაც აქვს 5 ვარსკვლავიანი რეიტინგი. სწორედ ამ შკალით ფასდება ავტომობილის უსაფრთხოება, როგორც მგზავრებისათვის, ასევე მოძრაობის სხვა მონაწილეებისთვის. ასე რომ, არსებობს ამ შეფასების ამსახველი მრავალი ვიდეო, სადაც თქვენ მიერ შერჩეული ავტომობილის განხილვაც იქნება. ყურადღებით უყურეთ მას და დააკვირდით 5-დან რამდენი ვარსკვლავის აღებას შეძლებს.

გამართლებული ხარჯი

და ბოლოს, როდესაც შეარჩევთ თქვენთვის სასურველ მოდელს, რომელიც აკმაყოფილებს თქვენს მოთხოვნებს და ამასთანავე გამოყოფილ ბიუჯეტშიც იდეალურად ჯდება, რაც უნდა გააკეთოთ არის ის, რომ დეტალურად შეამოწმოთ მისი მდგომარეობა, იქნება ეს დაკიდების სისტემა, ძრავისა და კოლოფის გამართულობა თუ პროგრამულად რა მდგომარეობაშია ავტომობილი. ამისათვის კი უკვე შეგიძლიათ ესტუმროთ ამბოლის სანაპიროს ფილიალს, სადაც ავტომობილის ტექნიკურ გამართულობას სრულად შეგიმოწმებენ. 

გისურვებთ მშვიდობიან მგზავრობას.

ამბოლი, მეტი დრო მოძრაობისთვის.