სამწუხაროდ, დღევანდელი რეალობა სახარბიელო ნამდვილად არ არის, საქმე ეხება სხვადასხვა პროდუქტზე გაზრდილ ფასებს. მათგან ერთ-ერთი კი საწვავია, რომელიც ასე მნიშვნელოვანია ჩვენი ყოველდღიური ცხოვრებისთვის. შესაბამისად, ავტომობილის მფლობელები, რომლებსაც ყოველდღიურად უწევთ მანქანით გადაადგილება, ცდილობენ რაიმე ალტერნატივისა თუ მეთოდების მოძიებას, რათა საწვავის ფასით გამოწვეული ხარჯი შეძლებისდაგვარად შეამცირონ.

ჩვენი დღევანდელი თემაც სწორედ ამ საკითხს უკავშირდება და ჩვენს ერთგულ მკითხველს გვინდა, გავუზიაროთ ერთ-ერთი აპრობირებული მეთოდი, რომლის გამოყენებაც მნიშვნელოვნად შეამცირებს საწვავის მოხმარებას. ამ მეთოდს კი ჰიპერმილინგი ეწოდება.

მაშ ასე, დავიწყოთ თუ რა არის ჰიპერმილინგი და რამდენად უსაფრთხოა ის ჩვენი ავტომობილისათვის.

მარტივად რომ ვთქვათ, Hypermiling ეს არის მართვის მეთოდი, რომელიც მთელ რიგ ტექნიკებს აერთიანებს და რომლის გამოყენებაც მნიშვნელოვნად შეამცირებს საწვავის ხარჯს. პირველად ეს ტერმინი Wayne Gerdes-მა გამოიყენა, რომელიც არის ერთ-ერთი საიმფორმაციო საიტის, CleanMPG-ის შემქმნელი. ამ ტერმინმა კი, მოგვიანებით, 2022 წელს სტატიაში გაიჟღერა, რომელიც პროდუქტებზე გაზრდილ ფასებს ეხმაურებოდა.

ჰიპერმილინგის იდეა არის ის, რომ რაც შეიძლება მეტი მანძილი გავიაროთ, რაც შეიძლება ცოტა საწვავის გამოყენებით. ეს კი, რა თქმა უნდა, მოითხოვს მართვის სრულიად ახალ ჩვევებსა და ტექნიკას, ესენია:

მოძრაობა აქსელერატორის გარეშე: სიტუაცია, როდესაც თქვენ გადაადგილდებით ავტომობილით და არ იყენებთ აქსელერატორს, ანუ როდესაც მანქანა უკვე მოძრაობაშია და დამატებით აღარ ვადგამთ პედალს ფეხს ასაჩქარებლად. მაგალითად, როდესაც მოშორებით ხედავთ შუქნიშნის წითელ ფერს, ჯობს აჩქარების ნაცვლად ნელ-ნელა შეანელოთ სვლა ან თუ წამზომიც ჩართულია, ისე გათვალოთ დრო და მანძილი, რომ შუქნიშანთან გავლისას უკვე მწვანე ფერი ენთოს. ამ მეთოდით დაზოგავთ საწვავსაც და თავიდან აირიდებთ სამუხრუჭე სისტემის დეტალების ზედმეტ ცვეთას, მით უმეტეს, თუ ხშირად გიწევთ მსგავს სიტუაციაში გადაადგილება.

კრუიზ კონტროლი: ეს არის ავტომობილის ოფცია, რომელიც გათვლილია მძღოლის კომფორტზე. მისი დახმარებით თქვენ შეინარჩუნებთ სტაბილურად ერთ სიჩქარეს და თავიდან აირიდებთ მის მომატებას ან დაკლებას, შედეგად, ერთი სიჩქარით გადაადგილება შეამცირებს საწვავის ხარჯს. ასე, რომ უფრო მეტად და ხშირად გამოიყენეთ ეს ფუნქცია, იმ შემთხვევაშიც კი, თუ მოკლე მანძილზე აპირებთ გადაადგილებას.

დაგეგმეთ თქვენი მგზავრობა: კარგი იქნება, თუ ყოველი მგზავრობის წინ სწორად დაგეგმავთ მას. უფრო კონკრეტულად, რუკაზე ან სხვა რომელიმე აპლიკაციაში ნახეთ, თუ არის კიდევ რაიმე ალტერნატიული გზა, რომელიც უფრო მალე მიგიყვანთ დანიშნულების ადგილამდე. გარდა ამისა, ეცადეთ მგზავრობა არ დაგეგმოთ პიკის საათებში, რადგან ასეთ დროს საცობში დგომა და მუდმივად აჩქარება-შენელება, მნიშვნელოვნად ზრდის საწვავის მოხმარებას.

იაფი საწვავი: ეცადეთ, მოიძიოთ ინფორმაცია ახლომდებარე ბენზინგასამართ სადგურებზე და მათი საწვავის ფასებზე, მათგან ყველაზე იაფით სარგებლობა მნიშვნელოვნად შეამცირებს თქვენი ჯიბის ხარჯს და თქვენი ავტომობილის ავზიც უფრო მეტი საწვავით შეივსება.

საწვავის დანამატების გამოყენება: სპეციალური დანამატების გამოყენება დაგეხმარებათ თქვენი ავტომობილის გამართული ფუნქციონირების შენარჩუნებაში. დანამატები უზრუნველყოფენ წვის სისტემის გაწმენდასა და გამონაბოლქვის შემცირებას, ამასთანავე, ძრავის გამართულ მუშაობას, რაც საბოლოო ჯამში, ამცირებს საწვავის მოხმარებას.

რაც შეეხება შეკითხვას, არის თუ არა საზიანო ჰიპერმილინგი ავტომობილისთვის? ამაზე პასუხი მარტივია, ეს მეთოდი ვერანაირად ვერ იქნება საზიანო. როგორც მისი ზემოთ ჩამოთვლილი ცალკეული ტექნიკებით აღვნიშნეთ, ის გეხმარებათ მართვის ახალი სტილისა და გადაადგილების სწორად დაგეგმვაში, რაც მნიშვნელოვნად შეამცირებს საწვავის ხარჯს და გაზრდის თქვენ მიერ ავტომობილით განვლილ მანძილს.

ახლა თქვენ უკვე იცით, რა არის ჰიპერმილინგი და რა მეთოდებსა თუ ტექნიკებს აერთიანებს ის. ეცადეთ, ყველა ზემოთ ჩამოთვლილი მათგანი მაქსიმალურად გამოიყენოთ მგზავრობისას.

გისურვებთ მშვიდობიან მგზავრობას,

ამბოლი, მეტი დრო მოძრაობისთვის!