ძრავი ავტომობილის გულია, მასში თავს იყრის მრავალი ელექტრონული თუ მოძრავი ცვეთადი ნაწილი, რომლებიც ერთობლიობაში უზრუნველყოფენ მის გამართულ მუშაობას და ავტომობილის უსაფრთხო გადაადგილებას. სამწუხაროდ, დროთა განმავლობაში მისი შემადგენელი ნაწილები ცვდება და ფუჭდება, შესაბამისად, ვეღარ ასრულებს ნაკისრ მოვალეობას, რაც იწვევს ძრავის გაუმართავობას, შესაბამისად, სიმძლავრის კლებასა და არაეფექტურ ფუნქციონირებას.

ამ ბლოგშიც სწორედ ამ საკითხზე გვინდა გესაუბროთ და გაგაცნობთ 7 პოტენციურ მიზეზს, თუ რატომ იკლებს ძრავის სიმძლავრე:

საწვავის ფილტრი

ის შექმნილია იმისთვის, რომ თავიდან ავირიდოთ მავნე ნაწილაკებისა და დეპოზიტების შერევა, როგორც საწვავში, ასევე - ძრავშიც. მაგრამ, როგორც ნებისმიერი სხვა ფილტრი, ესეც დროთა განმავლობაში ივსება და იბიდნება მტვრით, შედეგად, ვეღარ ფუნქციონირებს და ავტომატურად აისახება სიმძლავრეზე. ჩაკეტილ ფილტრს შეუძლია ხელი შეუშალოს წვის ციკლს.

საწვავის ინჟექტორები

მხოლოდ ფილტრი საკმარისი არ არის წვის სისტემაში ნაწილაკებისა და დეპოზიტების თავიდან ასარიდებლად. სწორედ ამ ნაწილაკებს შეუძლიათ ინჟექტორების ჩაკეტვა, რაც ხელს შეუშლის წვის კამერამდე სათანადო რაოდენობის საწვავის მიწოდებას. ინჟექტორები აღჭურვილია ვიწრო საქშენებით, რომლებიც ადვილად იკეტება ჭუჭყითა და ნაწილაკებით. როდესაც ეს მოხდება, ისინი ვეღარ უზრუნველყოფენ საწვავის ეფექტურ მიწოდებას ძრავში, ეს კი იწვევს სიმძლავრის კლებას.

ჰაერის ფილტრი

საწვავის ფილტრის მსგავსად, ჰაერის ფილტრიც მსგავს ამოცანას ასრულებს და როგორც მისი ანალოგი, ისიც ასევე შეიძლება გაივსოს ჭუჭყით და ვეღარ მიაწოდოს საკმარისი რაოდენობის ჰაერი ძრავს. ეს ფაქტი აფერხებს წვის ციკლს, რაც შესაბამისად იწვევს ძრავის არაეფექტურ მუშაობას და მისი სიმძლავრის კლებას. საბედნიეროდ, ის მარტივად მისადგომ ადგილასაა მოთავსებული და ადვილია მისი გაწმენდა, ასე რომ თუ პრობლემა მხოლოდ მისგან მომდინარეობს, მაშინ მისი მარტივად მოგვარება შესაძლებელია.

გამონაბოლქვის მილის დაბინძურება

თუ ავტომობილი არაეფექტურად მოიხმარს საწვავს, ჰაერის ფილტრის ან ინჟექტორების გამო, ამან შესაძლოა უარყოფითი გავლენა იქონიოს გამონაბოლქვის სისტემაზე. ანუ როდესაც სისტემა გამონაბოლქვითა და ჭვარტლით იჭედება, ეს აუცილებლად გამოიწვევს ძრავის სიმძლავრის კლებას. მისი გაწმენდა კი მარტივი პროცედურა ნამდვილად არ არის. ამიტომ საჭიროა, ძრავის ზემოთ აღნიშნულ ნაწილებს დროულად ჩაუტარდეს სერვისი, რათა თავიდან აირიდოთ ეს პრობლემა.

აალების სანთლები

ახლა კი დროა გადავიდეთ მექანიკურ პრობლემებზე, რამაც, შესაძლოა, გამოიწვიოს ძრავის სიმძლავრის მყისიერი და მნიშვნელოვანი ვარდნა. ამის ერთ-ერთი პირველი მიზეზი კი, აალების სანთლებია. ისინი ქმნის ელექტრონულ ნაპერწკალს, რომელიც საჭიროა ძრავის ფუნქციონირებისთვის. თუ ამ მხრივ პრობლემაა, მან სიმძლავრის კლებასთან ერთად, შესაძლოა, გამოიწვიოს ცუდი აჩქარებაც.

გაუმართავი სენსორები

თანამედროვე ძრავები აღჭურვილია უამრავი სენსორით, რომლებიც შექმნილია სხვადასხვა შეცდომის აღმოსაჩენად. ეს სენსორები აგზავნიან სიგნალებს ECU-ზე და აუცილებელია ენერგიისა და ფუნქციონირების შესანარჩუნებლად. მიუხედავად იმისა, რომ სენსორების გაუმართავობა იშვიათია, მან შეიძლება გამოიწვიოს რიგი პრობლემები, მათ შორის ძრავის სიმძლავრის კლებაც.

სხვა მექანიკური საკითხები

და ბოლოს, ამ ყველაფრის გარდა სიმძლავრის კლება შესაძლოა გამოიწვიოს:

·      გაუმართავმა საწვავის ტუმბომ.

·      ცუდი ანთების კოჭამ.

·      გაუმართავმა EGR სარქველმა.

·      გაუმართავმა ტურბო დამტენმა.

სწორედ ეს იყო რისი გაცნობაც თქვენთვის გვსურდა, გაითვალისწინეთ ზემოთ აღნიშნული შემთხვევები, რათა თქვენი ავტომობილის ძრავმა გამართულად ფუნქციონირება შეძლოს.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის.