ზამთარი არის პერიოდი, რომელიც გამოირჩევა რთული მეტეოროლოგიური პირობებით. წელიწადის ამ დროს ხშირია უამინდობა, უხვი ნალექი, ყინვა და ამ ყველაფერს დროდადრო ემატება ნისლი, რაც კიდევ უფრო ართულებს ხილვადობას და ზრდის საგზაო შემთხვევების რისკს. ამიტომაც, სანამ ავტომობილით გადაადგილებას გადავწყვეტთ, მრავალი ფაქტორია გასათვალისწინებელი, ხოლო უშუალოდ მოძრაობისას კი, დიდი დაკვირვება და სიფრთხილე გვმართებს, რათა დროულად ავირიდოთ მოსალოდნელი საფრთხე და გავუფრთხილდეთ, როგორც საკუთარ, ასევე მოძრაობის სხვა მონაწილეებს.

დღევანდელ ბლოგშიც სწორედ ამ საკითხზე გვინდა გესაუბროთ და განვიხილოთ ის ძირითადი ფაქტორები, რომლებიც დაგვეხმარება ცუდ ამინდში უსაფრთხოდ გადაადგილებაში.

ამინდის პროგნოზი: ნებისმიერ შემთხვევაში, სანამ ავტომობილით მოძრაობას დავიწყებდეთ, აუცილებლად შევამოწმოთ მოსალოდნელი ამინდის პროგნოზი. მისი დახმარებით შევძლებთ, დაახლოებით მაინც განვსაზღვროთ, თუ რა პირობებში მოგვიწევს გადაადგილება და რისთვის უნდა ვიყოთ მზად.

შეანელე სვლა: ცუდ ამინდში მართვისას აუცილებელია შევანელოთ სვლა და ვიმოძრაოთ გარემო პირობების შესაბამისად. რადგან კარგი ამინდისგან განსხვავებით, მნიშვნელოვნადაა ხილვადობა შემცირებული, ამას ემატება ნალექით დაფარული ზედაპირი, რაზედაც გვიწევს მოძრაობა. დაბალი სიჩქარით მოძრაობისას უფრო მარტივია ავტომობილის კონტროლი და, საჭიროების შემთხვევაში, ბევრად უფრო დროულად ვახდენთ რეაგირებას.

გაზარდეთ დისტანცია: დისტანცია არის ერთ-ერთი მნიშვნელოვანი ფაქტორი, რომელიც აუცილებლად უნდა დავიცვათ ჩვენსა და მოძრაობის ხვა მონაწილეს შორის. ზოგადად მიღებულია წესი, რომელიც ითვალისწინებს, რომ ჩვენსა და ჩვენს წინ მიმავალ ავტომობილს შორის დისტანცია უნდა განისაზღვრებოდეს მინიმუმ 4 წამის შუალედით. ხოლო ცუდ ამინდში ეს მაჩვენებელი აუცილებლად უნდა გავზარდოთ, რათა დროულად შევძლოთ გაჩერება.

გამოიყენეთ ფარები: წვიმაში, თოვლში ან ნისლში ხილვადობა მნიშვნელოვნად მცირდება, ამიტომაც საჭიროა გამოვიყენოთ ფარები, რათა მოძრაობის სხვა მონაწილეებმა დროულად დაგვინახონ. ხოლო თუ ხილვადობა მკვეთრად გაუარესებულია, გაბარიტულსა და ახლო განათებასთან ერთად, ჩართეთ სანისლე ფარებიც.

მოერიდეთ უეცარ მოძრაობებს: ცუდ ამინდში უეცარმა მოძრაობებმა, შესაძლოა, გამოიწვიოს თქვენი ავტომობილის მოცურება და მასზე კონტროლის დაკარგვა. ამიტომაც, მოერიდეთ აჩქარებებს, მკვეთრ დამუხრუჭებასა და სწრაფ შემობრუნებებს. ნაცვლად ამისა, შეეცადეთ, შეინარჩუნოთ თანაბარი სვლა.

აკონტროლე გარემო: მოძრაობისას აუცილებლად ყურადღებით დააკვირდით გარემოს, რადგან თითოეულ დეტალს მნიშვნელობა აქვს და ერთი შეხედვით უწყინარმა გარემოებამ შესაძლოა სავალალო შედეგებამდე მიგვიყვანოს. ეს არის პოტენციური საშიშროებები, როგორებიცაა: წყლის გუბე, ყინული, მოტეხილი ტოტი ან რაიმე საგანი, რომელსაც დროულად უნდა ავარიდოთ ავტომობილი.

და ბოლოს, კიდევ ერთხელ კარგად დაგეგმეთ თქვენი მარშრუტი, რადგან თუ იცით, რომ მოსალოდნელია ამინდის გაუარესება, მოერიდეთ საფრთხის შემცველ ადგილებს, მაგალითად როგორებიცაა, მეწყრული ან დატბორვისკენ მიდრეკილი ტერიტორიები.

გაითვალისწინეთ ზემოთ აღნიშნული რჩევები, გაუფრთხილდით საკუთარ და სხვის უსაფრთხოებას.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!