ზამთრის სეზონისთვის დამახასიათებელი ცივი და მკაცრი პირობები უარყოფითად მოქმედებს ავტომობილის მდგომარეობაზე, ამიტომაც მას სპეციალური შემოწმება სჭირდება, რათა დროულად აღმოვაჩინოთ ხარვეზი და ჩავუტაროთ ყველა საჭირო სერვისი. ასეთ შემთხვევაში თავიდან ავირიდებთ კლიმატური პირობებისგან გამოწვეულ არასასურველ შედეგებს.

დღევანდელ ბლოგშიც ზუსტად ამ საკითხზე გვინდა გესაუბროთ და გამოვყოთ ყველა საჭირო დეტალი, რომლებიც აუცილებლად უნდა შევამოწმოთ ზამთრის სეზონის დადგომამდე, რათა ჩვენი მგზავრობა უსაფრთხო გავხადოთ.

აკუმულატორი: ისინი ყველაზე ხშირად ზამთრის პერიოდში გამოდიან მწყობრიდან. არადა, აკუმულატორი სწორედ ის დეტალია, რომელიც ავტომობილის მრავალი ელექტრონული კომპონენტისა თუ უსაფრთხოების ფუნქციების გამართულად მუშაობას უზრუნველყოფს. შესაბამისად, მისი გაუმართაობა რიგ პრობლემებს წარმოშობს. ამიტომაც, აუცილებელია მისი შემოწმება სპეციალური დატვირთვის ტესტით, რომელიც ზომავს მის სიმძლავრეს და ასევე იმასაც, თუ რამდენად არის დატენილი. გარდა ამისა, ტექნიკოსის დახმარებით აუცილებლად შეამოწმეთ მისი ყველა დამაკავშირებელი რგოლი და თუ რომელიმე ადგილას კოროზია შეინიშნება, გაასუფთავეთ მისგან.

სამუხრუჭე სისტემა: შემოწმეთ მისი შემადგენელი ნაწილები თუ სპეციალური სითხე (,,ჟიტკოსტი“), რადგან ხშირია შემთხვევები, როდესაც მოყინულ ან თოვლიან ზედაპირზე გვიწევს გადაადგილება. ასეთ პირობებში მართვა საკმაოდ რთულია და კონცენტრირებას მოითხოვს. გამართული სამუხრუჭე სისტემა კი, თქვენს უსაფრთხო მგზავრობას განაპირობებს.

ძრავი: კარგი იქნება თუ ზამთრის დადგომამდე შეამოწმებთ თქვენი ავტომობილის ძრავის მდგომარეობას. საჭიროების შემთხვევაში შეცვალეთ აალების სანთლები, დეტალურად შეამოწმეთ გაყვანილობები და კაბელები. დარწმუნდით, რომ საიდანმე არ ხდება წნევის გაჟონვა. ყოველივე ამის შემდგომ ის გამართულ და ეფექტურ მუშაობას შეძლებს.

გამონაბოლქვი: თქვენი ავტომობილის გამონაბოლქვი, შესაძლოა, გადამეტებული დაბინძურების წყარო იყოს. შესაბამისად, ნახშირბადის მონოქსიდის გაჟონვისა და სხვა საშიშროების თავიდან ასარიდებლად საჭიროა სპეციალური შემოწმება. გამონაბოლქვის სისტემის მწყობრში ყოფნა, ავტომობილის მაქსიმალურ გამართულობას უზრუნველყოფს.

საბურავები: თუ ჯერ კიდევ არ დაგიყენებიათ თქვენს ავტომობილზე ზამთრის საბურავები, ახლა სწორედ ამის დროა. ნუ დაელოდებით ტემპერატურის მკვეთრ კლებასა თუ მოულოდნელ ნალექს. ამან, შესაძლოა, სახიფათო მდგომარეობაში ჩაგაყენოთ. ამიტომაც, დროულად დააყენეთ ისინი თქვენს ავტომობილზე და აუცილებლად შეამოწმეთ მათში არსებული წნევის დონე, რადგან ტემპერატურის მერყეობამ, შესაძლოა, მათში გამოიწვიოს ჰაერის გაფართოება ან შეკუმშვა. გარდა ამისა, არასათანადო წნევა უარყოფითად აისახება მოხვევის კუთხეზე, სამუხრუჭე მანძილსა და საწვავის მოხმარებაზე. ამასთანავე, კარგად დააკვირდით პროტექტორის ზომას/სიღრმეს და აქვთ თუ არა მათ რაიმე ვიზუალური ხარვეზი, როგორებიცაა: გამობურცული ან დაზიანებული ადგილები.

ძრავის ზეთი: მისი მდგომარეობის შემოწმება და აუცილებლობის შემთხვევაში შეცვლა, ერთ-ერთი აუცილებელი პროცედურაა ზამთრის დადგომამდე. დაბინძურებული ზეთი ამცირებს ძრავის ეფექტურ მუშაობას. ამიტომაც, კარგი იქნება თუ, სეზონს ახალი და სუფთა საპოხი საშუალებით შეხვდებით.

გაგრილების სისტემა: აუცილებლად დარწმუნდით, რომ ის გამართულად ფუნქციონირებს. დეტალურად შეამოწმეთ მისი მილები თუ დამაკავშირებელი კვანძები. საჭიროების შემთხვევაში გაასუფთავეთ რადიატორი ნალექისგან. ამასთანავე, შეამოწმეთ ანტიფრიზის მდგომარეობა, რადგან თუ ის დაძველებულია, მაშინ ვერ უზრუნველყოფს ძრავის დაცვას გაყინვისგან.

საქარე მინის საწმენდები და სითხე: ორივე მათგანს მნიშვნელოვანი როლი აკისრიათ ჩვენს უსაფრთხო მგზავრობაში, რადგან საჭიროებიდან გამომდინარე, ასუფთავებენ მხედველობის არეალს. ამიტომაც, თუ მინამწმენდები დაზიანებულია ან სრულად ვერ წმენდს მინას, მაშინ დროულად შეცვალეთ ისინი. ამასთანავე, არ დაგავიწყდეთ სპეციალური ყინვაგამძლე სითხე, რათა არ გაიყინოს ექსტრემალურ პირობებში.

გამათბობელი: და ბოლოს, ზამთარში რომ გამათბობელი აუცილებლად გამართულად უნდა მუშაობდეს, ამაზე ყველანი ვთანხმდებით. ამიტომ, თუ მას რაიმე ხარვეზი აქვს, დროულად შეაკეთეთ, თორემ, შესაძლოა, გაყინული მანქანით მოგიწიოთ მგზავრობა.

გაითვალისწინეთ ზემოხსენებული რჩევები და დროულად ჩაუტარეთ თქვენს ავტომობილს ყველა საჭირო სერვისი.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!