ზაფხულის პერიოდი მეტ-ნაკლებად ყველასათვის საყვარელი სეზონია, რადგან ის ხშირად ასოცირდება დასვენებასთან, გართობასა და მოგზაურობასთან. დრო, როდესაც ჩვენს ახლობელ და საყვარელ ადამიანებთან ერთად ვგეგმავთ, თუ სად წავიდეთ და ამჯერად რა ადგილები თუ ღირსშესანიშნაობები მოვინახულოთ.

როგორც წესი, მსგავსი მოგზაურობა გრძელ გზასთანაა დაკავშირებული, რომელსაც სხვა სატრანსპორტო საშუალებებთან ერთად, ხშირად საკუთარი ავტომობილით გავდივართ. ამისათვის კი საჭიროა, ჩვენი მანქანა წინასწარ შევამზადოთ მოგზაურობისთვის, რათა რომელიმე პრობლემამ ცუდ დროს არ იჩინოს თავი.

აქვე უნდა აღინიშნოს ის ფაქტიც, რომ ერთ-ერთი დიდი ხარჯი, რაც მოგზაურობისას ვლინდება, საწვავის მოხმარების ხარჯია. მოგზაურობის წინ კარგი იქნება, თუ ვეწვევით სანდო და კვალიფიციურ სერვისცენტრს, სადაც გადამოწმდება ყველა ის საჭირო დეტალი, რომელმაც, შესაძლოა, გაზარდოს საწვავის მოხმარება.

ამ ბლოგშიც სწორედ ამ საკითხზე გვინდა, გესაუბროთ და გეტყვით, თუ რა უნდა შემოწმდეს მოგზაურობამდე, რათა საწვავის დაზოგვასთან ერთად, თქვენი მგზავრობა უსაფრთხო და კომფორტული იყოს.

·      შეამოწმეთ საბურავებში არსებული ჰაერის წნევა და დარწმუნდით, რომ შეესაბამება დადგენილ ნორმას.

·      საჭიროების შემთხვევაში გაწმინდეთ ან შეცვალეთ სალონისა და ძრავის ჰაერის ფილტრები.

·      შეცვალეთ საწვავის ფილტრი.

·      შეამოწმეთ ყველა საჭირო სითხე, მათ შორის ძრავის ზეთი, გამაგრილებელი და სამუხრუჭე სითხეები.

·      დარწმუნდით, რომ სამუხრუჭე ხუნდები კარგ მდგომარეობაშია.

·      საჭიროების შემთხვევაში შეამოწმეთ და შეცვალეთ აალების სანთლები.

·      შეამოწმეთ აკუმულატორის მდგომარეობა.

ამ პროცედურის ჩატარება აუცილებელია, რათა გაიგოთ თუ რა მდგომარეობაშია თქვენი ავტომობილი და რამდენად მზადაა ის გრძელ გზაზე მოგზაურობისთვის. ეს ყველაფერი ასევე დაგეხმარებათ საწვავის ხარჯის შემცირებაშიც.

აქვე გაგაცნობთ რამდენიმე რჩევას, რომლებიც ასევე დაგეხმარებიან საწვავის დაზოგვაში:

დაგეგმეთ თქვენი მარშრუტი: წინასწარ შეისწავლეთ, თუ რა გზის გავლა მოგიწევთ და რა დაშორებებითაა ყველა საჭირო ობიექტი, მათ შორის, ბენზინ-გასამართი სადგური, რომელ მათგანში უფრო იაფად ჩაასხამთ საწვავს. ეს უფრო მეტად შეავსებს თქვენი ავტომობილის ავზს, შესაბამისად, უფრო მეტ მანძილს გაივლით.

შეამსუბუქეთ ტვირთი: ზედმეტი ბარგი ზედმეტი წონაა, ეს კი საწვავის მოხმარებას ზრდის.

გამოიყენეთ კრუიზ-კონტროლი: ხშირი აჩქარება და შენელება ზრდის საწვავის მოხმარებას, ამის თავიდან ასაცილებლად უმჯობესი იქნება, თუ გზატკეცილზე მგზავრობისას კრუიზ-კონტროლს გამოიყენებთ.

შეარჩიეთ სიჩქარე: დადგენილია, რომ 80-100კმ/სთ-ით გადაადგილებისას ავტომობილი სტანდარტულად მოიხმარს საწვავს, ხოლო ამ დიაპაზონიდან გადაჭარბება, ავტომატურად იწვევს საწვავის ხარჯის ზრდას.

და ბოლოს, მოერიდეთ ფანჯრების ჩაწევას და ამ გზით სალონის გაგრილებას, ნაცვლად ამისა, გამოიყენეთ კონდიცირება. მართალია, ესეც ზრდის საწვავის მოხმარებას, მაგრამ იმაზე მეტად არა, ვიდრე ჩაწეული ფანჯრებით გადაადგილება. რადგან ასეთ დროს სალონში შემოსული ჰაერის ნაკადი ქმნის ერთგვარ წინაღობას და ანელებს ავტომობილის მოძრაობას, შედეგად მეტი ენერგია იხარჯება და ავტომატურად იმატებს საწვავის ხარჯიც.

გაითვალისწინეთ ზემოთ აღნიშნული რჩევები და დაზოგეთ საწვავის მოხმარება.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის.