ცვეთადი ნაწილებიდან ავტომობილის გამართულად და უსაფრთხოდ გადაადგილებაში უდიდესი როლი საბურავებს მიუძღვის. მათ სწორად შერჩევას როგორც სეზონურობის, ასევე იმ სამოძრაო არეალის მიხედვით, სადაც ყველაზე ხშირად გადაადგილდება ავტომობილი, გადამწყვეტი მნიშვნელობა აქვს. ამ ბლოგში გვინდა, განვიხილოთ, თუ რა კრიტერიუმებითა და როგორ უნდა შევარჩიოთ სათანადო საბურავები ჩვენი ავტომობილისათვის.

როგორ განვსაზღვროთ, თუ რა ზომის საბურავი სჭირდება ჩვენს ავტომობილს?

ამ საკითხის სწორად გადასაწყვეტად რამდენიმე გზა არსებობს, ესენია: პირველ რიგში, აუცილებლად უნდა ვიხელმძღვანელოთ ავტომობილის სპეციალური წიგნაკის ან კატალოგის მიხედვით, სადაც სხვა მრავალ ინფორმაციასთან ერთად, აღნიშნულია საბურავების ზუსტი ზომებიც. ამასთანავე, არსებობს უფრო მარტივი და სწრაფი გზა ზომების დასადგენად, ავტომობილების უმრავლესობას მძღოლის მხარეს, კარის ჩარჩოზე აქვს სპეციალური სტიკერი, სადაც ზუსტადაა მითითებული ზომებიცა და იმ რაოდენობის წნევაც, რამდენზედაც რეკომენდებულია რომ დაბეროთ საბურავები. კიდევ ერთი მეთოდი არის თვითონ საბურავზე დატანილი ინფორმაცია, რომლებიც გამოსახულია ციფრებსა და ასოებში.

ასე მაგალითად: P235/65R17 94T

·      235 არის კვეთის სიგანე მილიმეტრებში

·      65 არის გვერდითა კედლის სიმაღლის თანაფარდობა მის სიგანესთან 

·      R მიუთითებს საბურავის რადიალურ კონსტრუქციაზე

·      94 არის დატვირთვის ნიშანი ან მაქსიმალური წონა, რომლის ატანაც შეუძლია საბურავს

·      T არის სიჩქარის ინდექსი

საბურავების სახეები:

არსებობს საბურავების სამი ზოგადი კატეგორია: ყველა სეზონის, ზამთრისა და ზაფხულის. 

ყველა სეზონის საბურავი: ამ ტიპის საბურავი მეტ-ნაკლებად გათვლილია, როგორც ზამთრის ცივი და თოვლიანი ამინდებისთვის, ასევე ზაფხულის ცხელი და მშრალი კლიმატისთვის. ამ ჯგუფის საბურავზე, როგორც წესი, გვერდითა კედელზე შეხვდებით აღნიშვნას M+S (ტალახი+თოვლი).

ზაფხულის საბურავი: ის პროტექტორის დაბალი ზომით გამოირჩევა და ეფექტურია ზაფხულის ცხელ პირობებში. უზრუნველყოფს ეფექტურ აჩქარებას, მანევრირებასა და სამუხრუჭე მანძილს მაღალი ტემპერატურის დროს.

ზამთრის საბურავები: ამ ტიპის საბურავებსაც აქვს სპეციალური აღნიშვნა, რომლითაც განსხვავდება სხვა ჯგუფისაგან, ეს ნიშანი, ხშირ შემთხვევაში არის სამქიმიანი მთის შუაგულში ჩასმული ფიფქი. ზამთრის საბურავები ეფექტურია ყინულოვან და თოვლიან ზედაპირზე გადაადგილებისას, ასეთ გარემოში მას აქვს ეფექტური მოჭიდება და მანევრირება.

და ბოლოს, სანამ საბურავებს შეარჩევდეთ, საკუთარ თავს დაუსვით რამდენიმე შეკითხვა:

რა ტიპის კლიმატურ პირობებში მოგიწევთ მგზავრობა და რა არის ყველაზე ცუდი სიტუაცია, რომელიც შესაძლოა შეგხვდეთ? 

რა ტიპის რელიეფურ პირობებში მოგიწევთ ხშირად გადაადგილება: ქალაქში, ტრასაზე თუ სულაც გზიდან გადახვევა გიწევთ?

როგორია მართვის თქვენებური სტილი?

იმედი გვქვს, გამოგადგებათ ზემოაღნიშნული ინფორმაცია, რათა სწორად შეარჩიოთ სათანადო საბურავი თქვენი ავტომობილისათვის.

გისურვებთ მშვიდობიან მგზავრობას,

ამბოლი, მეტი დრო მოძრაობისთვის!