ალბათ ერთხელ მაინც ყველას შეგვიმჩნევია ფერადი ეტიკეტები ახალი საბურავების შეძენისას, რომლებიც მათ შეფუთვაზეა დატანილი. რეალურად, ეს არის მნიშვნელოვანი ინფორმაცია ავტომობილის მფლობელთათვის, რომლებსაც სურთ სხვადასხვა მოთხოვნების შესაბამისად, სწორად შეარჩიონ მათთვის სასურველი საბურავი, იქნება ეს განსხვავებული რელიეფური ზედაპირი, თუ სეზონური ან კლიმატური პირობები.

ამ ბლოგშიც სწორედ ამ საკითხზე გვინდა ვისაუბროთ და განვუმარტოთ ჩვენს ერთგულ მკითხველს, თუ რას ნიშნავს თითოეული მათგანი და რა სასარგებლო ინფორმაციის მოცემა შეუძლია მათ ჩვენთვის.

საავტომობილო სამყაროს განვითარებასთან ერთად, პერიოდულად იცვლებოდა და ვითარდებოდა საბურავების დამზადების წესები, მოთხოვნები და ტექნოლოგიები. 2021 წლის მაისში ევროკავშირმა (EU)-მ განაახლა საბურავების ეტიკეტირების წესები, რითაც ავტომობილის მფლობელებს დაეხმარა, დეტალურად მიეღოთ ინფორმაცია კონკრეტული საბურავის შესახებ, შედეგად კი - მათ გაუადვილდებოდათ მათთვის სასურველი საბურავის შეძენა.

რა არის საბურავის ეტიკეტები?

ეს არის გარკვეული რეგულაციები, რომლებიც შემოიღო ევროკავშირმა ათწლეულების წინ, რათა მომხმარებლებს შესთავაზოს მეტი ინფორმაცია საბურავების უსაფრთხოების შესახებ და ზოგადად, რა გავლენის მოხდენა შეუძლიათ მათ გარემოზე. აღნიშნული რეგულაციები საბურავებს აფასებს სამი მთავარი კრიტერიუმის შესაბამისად, ესენია:

• სველ ზედაპირზე მოჭიდების ინდექსი
• საწვავის ეკონომიის ინდექსი
• ხმაურის დონე (დეციბელებში)

სველ ზედაპირზე მოჭიდება მნიშვნელოვანია გადაადგილებისას, რადგან შესაბამისი საბურავის არქონის შემთხვევაში, შესაძლოა, გაიზარდოს საავარიო სიტუაციის რისკი წვიმიან ამინდში, მაგალითად, დაგროვებულ წყალში მაღალი სიჩქარით გავლისას.

საწვავის ეფექტურობის ინდექსი გვაძლევს მითითებას, თუ რამდენად დაბალი ბრუნვის წინაღობა აქვს საბურავს, რაც თავისთავად ეხმარება ავტომობილს, მოიხმაროს ნაკლები საწვავი. შესაბამისად, მძღოლებს მარტივად შეუძლიათ, შეარჩიონ მათი მანქანისათვის შესაბამისი საბურავები, რომლებიც ავტომობილს დაეხმარება საწვავის დაზოგვაში.

ამასთანავე, მნიშვნელოვანია ხმაურის ინდექსი გადაადგილებისას, რადგან დაგვეთანხმებით, რომ საბურავები, რომლებიც ხმაურს გამოსცემენ მოძრაობისას, ერთგვარად შემაწუხებელია, როგორც ჩვენთვის, ასევე - მოძრაობის სხვა მონაწილეებისთვისაც.

ევროკავშირის მიერ დადგენილი ეტიკეტები ასევე შეიცავს დამატებით ინფორმაციას საბურავის ზომის, სიჩქარის რეიტინგისა და დატვირთვის ინდექსის შესახებ. ეს ინფორმაცია მნიშვნელოვანია იმის უზრუნველსაყოფად, რომ თქვენ მიერ შეძენილი საბურავები შეესაბამება თქვენს ავტომობილს, რადგან არასწორი ზომა ან სხვა რომელიმე პარამეტრი, შესაძლოა, საშიში აღმოჩნდეს გადაადგილებისას.

ბრუნვის წინაღობა

ეს არის ძალა, რომელიც ეწინააღმდეგება ამა თუ იმ ზედაპირზე მოძრავი ობიექტების გადაადგილებას. შესაბამისად, თუ მოძრავი წინააღმდეგობა მაღალია, მაშინ მეტი ენერგია დასჭირდება ავტომობილს გადაადგილებისას, რამაც, შესაძლოა, გამოიწვიოს საწვავის მეტი მოხმარება.

ეტიკეტებზე დატანილი ლათინური ასოები A-დან G-მდე აღნიშნავენ საწვავის ეფექტურობის შესახებ ინფორმაციას, შესაბამისად, A არის ყველაზე ეკონომიური, ხოლო G - ყველაზე არაეკონომიური.  

ალბათ ცოტამ თუ იცის, რომ ავტომობილის საწვავის მოხმარების მთლიანი რაოდენობიდან 20% საბურავებზე მოდის. ამიტომ, გონივრულმა არჩევანმა, შესაძლოა, მნიშვნელოვნად დაგვაზოგინოს ფული.

სველ ზედაპირზე მოჭიდება

საბურავების მარკირება სველ ზედაპირზე მოჭიდებისას ასევე მერყეობს A-დან E-მდე, ხოლო სტიკერზე დატანილი შესაბამისი მარკირება ასახავს გაჩერების მანძილებს წვიმიან ზედაპირზე. განსხვავება თითოეულ ასოს შორის არის 2.5 მეტრი 80 კილომეტრი/საათის სიჩქარიდან დამუხრუჭებისას.

გამორჩეული ტექნოლოგიიდან და მასალებიდან გამომდინარე, ყველაზე მაღალრეიტინგული საბურავები, როგორც წესი, ყველაზე ძვირია. დაბალი რეიტინგის მქონე საბურავები კი შედარებით იაფია, თუმცა, მსგავსი ტიპის საბურავები არ გვთავაზობენ იმავე დონის მოჭიდებას სველ პირობებში.

ხმაური

საბურავების მიერ წარმოქმნილი გარე და, შესაბამისად, შიდა ხმაური რომელიც ავტომობილის სალონში ისმის, ასევე შეფასებულია ევროკავშირის მიერ დადგენილ ახალ ეტიკეტებზე. ისინი იზომება დეციბელებში (dBs) და რეიტინგი მერყეობს A-დან C-მდე. შესაბამისად, A არის ყველაზე უხმო საბურავი.

QR კოდი

ევროკავშირის ეტიკეტების უახლოეს ვერსიაში, ახალი საბურავების შეფუთვებზე, ზედა მარჯვენა მხარეს არის სპეციალური QR კოდი, რომლის სკანირების შემთხვევაშიდაც მარტივად შევძლებთ ყველანაირი სახის და საჭირო ინფორმაციის ჩამოტვირთვას პირდაპირ ევროკავშირის პროდუქტების მონაცემთა ბაზიდან.

ფიფქის ნიშანი

თოვლში სიარული გამოცდილი მძღოლებისთვისაც კი ძალიან რთულია, ამიტომ ამ აღნიშვნის მქონე საბურავები მნიშვნელოვანია მათთვის, ვინც თოვლიან გარემოში რეგულარულად მართავს ავტომობილს, რადგანაც მხოლოდ მოცემული ნიშნით აღჭურვილი საბურავებით შეიძლება თოვლსა და მოლიპულ ზედაპირებზე გადაადგილება.

ყველა ახალ საბურავს აქვს ეტიკეტირება?

დიახ, 2021 წლის მაისიდან გაყიდულ ყველა ახალ საბურავს უნდა ჰქონდეს ევროკავშირის ახალი ეტიკეტები. მიუხედავად იმისა, რომ ისინი განსხვავდებიან მათი წინა ვერსიებისგან, ახალი ეტიკეტები მაინც შეიცავენ მათ წინამორბედებში შეტანილ ყველა სახის ინფორმაციას.

უსაფრთხოების მახასიათებლები

თანამედროვე ავტომობილები აღჭურვილია მრავალი ჭკვიანი მოწყობილობებით, რომლებიც, საჭიროების შემთხვევაში მძღოლებს ეხმარებათ ეფექტურ დამუხრუჭებაში, რათა დროულად აირიდონ საფრთხე. თუმცა ამ მოწყობილობებთან ერთად, უდიდეს როლს თამაშობს საბურავები, სწორედ ამიტომ, მნიშვნელოვანია მათი სწორად შერჩევა, რათა ავტომობილი მანევრირებისას უკეთ მოეჭიდოს ზედაპირს და დამუხრუჭებისას ჰქონდეს ეფექტური მანძილი.

და ბოლოს, როგორც მსოფლიოში უმსხვილესი საბურავების მწარმოებელი კომპანიის Goodyear-ის წარმომადგენლები აცხადებენ, განსხვავება A რეიტინგისა და G რეიტინგის საბურავებს შორის შეიძლება ნიშნავდეს საწვავის მოხმარების შემცირებას 7.5%-მდე, რაც დაზოგავს 6 ლიტრზე მეტ საწვავს ყოველ 1000 კილომეტრზე.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!