ალბათ ერთხელ მაინც ყველას შეგიმჩნევიათ მონაცემთა დაფაზე წითლად ანთებული აკუმულატორის მანიშნებელი ინდიკატორი. ეს ფაქტი ცალსახად მიანიშნებს, რომ რაღაც რიგზე არ არის და დიდი ალბათობით თქვენი ავტომობილის ელექტრო სისტემა ვერ უზრუნველყოფს მის დატენვას. 

ასეთ შემთხვევაში საჭიროა დროული ჩარევა რათა პრობლემა აღმოიფხვრას, რადგან წინააღმდეგ შემთხვევაში გაუმართავი აკუმულატორით დიდხანს ვერ იმოძრავებთ. პარალელი რომ გავავლოთ, შეგვიძლია წარმოვიდგინოთ მობილური ტელეფონი, რომელიც დამტენზეა შეერთებული, ასეთ სიტუაციაში ის მუდმივად იღებს ელექტრო ენერგიას და შესაბამისად მისი ბატარეა არ დაჯდება. მაგრამ საკმარისია ის გამოვაერთოთ დენის წყაროდან, რომ ის მყისიერად გადავა იმ დამუხტული ენერგიის გამოყენებაზე, რა რაოდენობაც დატენვის დროს მიიღო, ბოლოს კი საბოოლოოდ დაჯდება და გაითიშება. სწორედ ასეა აკუმულატორიც, თუ მუდმივად არ იტენება, მიღებული ენერგიის ამოწურვისთანავე დაჯდება და ვეღარ უზრუნველყოფს ავტომობილის გამართულ ფუნქციონირებას.

ამ ბლოგშიც სწორედ ამ საკითხზე გვინდა გესაუბროთ და განვიხილოთ ის 6 შემთხვევა, რომელთა გათვალისწინებაც დროულად აგარიდებთ თავიდან აკუმულატორის დაზიანებას.

მოარიდეთ ავტომობილი სიცხეს: ზაფხულის მოახლოებასთან ერთად ტემპერატურაც იმატებს, სიცხე კი ისევე ცუდად მოქმედებს აკუმულატორზე, როგორც სიცივე. ამიტომ ეცადეთ თქვენი ავტომობილი შეძლებისდაგვარად მოარიდოთ ცხელ ადგილებს და გააჩეროთ ისეთ ადგილებში, როგორებიცაა მიწისქვეშა პარკინგი, ავტოფარეხი ან ჩრდილში, სადაც მზე ნაკლებად აცხუნებს და სხვა.

მცირე დროით დაქოქვა: ეს შემთხვევა საკმაოდ მავნებელია აკუმულატორისთვის, რადგან ის ვერ ასწრებს საჭირო რაოდენობაზე დამუხტვას. ეცადეთ დაქოქვიდან მინიმუმ 20-30 წუთის განმავლობაში იმოძრაოთ ან დაახლოებით 10 კილომეტრი მაინც გაიაროთ. ასეთ შემთხვევაში აკუმულატორი სრულად დაიტენება.

შეამოწმეთ დამუხტვის მაჩვენებელი: აკუმულატორების უმრავლესობას ზედა მხარეს აქვს სპეციალური დამუხტვის მაჩვენებელი ინდიკატორი. თუ მასში ჩახედვისას მწვანე შუქს დაინახავთ, ესე იგი ყველაფერი რიგზეა და აკუმულატორი გამართულია, ხოლო თუ შავი ფერი აღმოჩნდება, მაშინ ის დასატენია.

კოროზია: კარგი იქნება თუ პერიოდულად თქვენი მანქანის აკუმულატორს ვიზუალურად შეამოწმებთ. იმ შემთხვევაში თუ შეამჩნევთ კოროზიას ეცადეთ დროულად მოაშოროთ ის, რათა არ გამოიწვიოს აკუმულატორის დაზიანება. ამისათვის კი გამოიყენეთ სპეციალური რკინის ფუნჯი, სოდა და თბილი წყლის ნარევი. ამასთანავე თუ ვიზუალური დათვალიერებისას აკუმულატორი რომელიმე ადგილას ამობურცულია ან ბზარები შეინიშნება, ესე იგი მისი შეცვლის დრო დადგა.

ხშირად მართეთ ავტომობილი: ავტომობილის დიდხანს უმოქმედოდ გაჩერება აკუმულატორის სიცოცხლისუნარიანობაზე უარყოფითად აისახება. ასე, რომ ეცადეთ შეძლებისდაგვარად ხშირად მართოთ ავტომობილი.

შეამოწმეთ თქვენი აკუმულატორი: თუ თქვენი ავტომობილის აკუმულატორი 5 წელზე მეტი ხნისაა, მაშინ აუცილებლად შეამოწმებინეთ შესაბამის ხელოსანს, რათა დაადგინოთ თუ რა რესურსი დარჩა ან შესაძლოა უკვე მისი შეცვლის დროც კი დადგა.

გაითვალისწინეთ ზემოაღნიშნული რჩევები, რათა დროულად აიცილოთ თავიდან აკუმულატორის დაზიანება. წინააღმდეგ შემთხვევაში მისი გაუმართაობა გამოიწვევს მთელ რიგ პრობლემებს, როგორებიცაა: აუდიო სისტემის გაუმართაობა, ელექტრო შუშების მოძრაობის შეფერხება, ან სულაც ფარების განათების ან კლიმატ კონტროლის პრობლემა.

გისურვებთ მშვიდობიან მგზავრობას,

ამბოლი, მეტი დრო მოძრაობისთვის!