ელექტრონული სისტემა ავტომობილის აგებულებაში ერთ-ერთი ყველაზე რთული ნაწილია. ის მრავალი დეტალისაგან შედგება და პასუხისმგებელია ისეთ მნიშვნელოვან საკითხებზე, როგორებიცაა: ჩვენი უსაფრთხო და კომფორტული მგზავრობა. თუმცა, არის მომენტები, როდესაც მისი რომელიმე კომპონენტი მწყობრიდან გამოდის და მას დროული დიაგნოსტიკა და შეკეთება სჭირდება, რათა პრობლემა მყისიერად აღმოიფხვრას და სხვა ნაწილებზედაც არ იქონიოს გავლენა.

დღევანდელ ბლოგშიც სწორედ ამ საკითხზე გვინდა, გესაუბროთ და გამოვყოთ 7 ძირითადი რამ, რითიც ავტომობილი მიგვანიშნებს, რომ ელექტროსისტემის რომელიმე დეტალი დაზიანებულია და შეკეთება სჭირდება.

ავტომობილი არ იქოქება: ეს ფაქტი ელექტრონული სისტემის ერთ-ერთი ყველაზე გავრცელებული პრობლემაა. ის მრავალი სხვადასხვა მიზეზის შედეგი შეიძლება იყოს, დაწყებული აკუმულატორიდან და დამთავრებული რაიმე კაბელის დაზიანებით. ამიტომ, კარგი იქნება, თუ პერიოდულად ჩაუტარებთ თქვენს ავტომობილს დიაგნოსტიკას. ასე თქვენ შეძლებთ დროულად აღმოაჩინოთ ხარვეზი.

არასაკმარისი განათება: თუ თქვენი ფარები არასაკამარისად ანათებს ან პერიოდულად ქრება, ეს სერიოზული პრობლემაა, რადგან ღამით მხოლოდ მათ შეუძლიათ გაგვინათონ სამოძრაო არეალი, რათა დროულად შევამჩნიოთ სხვადასხვა ობიექტი, თუ მოძრაობის სხვა წევრები. ასე რომ, მათი გაუმართავობა ავტოსაგზაო შემთხვევის საფრთხეს ზრდის.

აკუმულატორი: ის ელექტონული სისტემის გულია და ავტომობილს საჭირო რაოდენობის ენერგიით ამარაგებს. მისი გაუმართავობა სერიოზული ხარვეზია, რადგან მასთან დაკავშირებული რიგი ელექტრონული მოწყობილობები ავტომატურად გამოდის მწყობრიდან, ეს კი ჩვენს უსაფრთხოებაზე აისახება. ამიტომ, პირველივე ნიშნებზე, იქნება ეს რთულად დაქოქვა, თუ მონაცემთა დაფაზე აკუმულატორის აღმნიშვნელი ნათურის ანთება, შეამოწმეთ მისი მდგომარეობა და საჭიროების შემთხვევაში შეცვალეთ.

მოულოდნელი გაჩერება: წარმოიდგინეთ, რომ საკმაოდ შორი გზა გაქვთ გასავლელი და იმ მონაკვეთზე ხართ, რომელიც დაუსახლებელია და უახლოეს სახელოსნომდე საკმაო მანძილი გაშორებთ. თითქოს ყველაფერი კარგადაა, მაგრამ უეცრად ავტომობილი ნელ-ნელა ჩერდება და აქსელერატორის პედალიც არ მუშაობს. ეს არასასიამოვნო ფაქტი ერთ-ერთი გავრცელებული მათგანია სხვა პრობლემებს შორის. მსგავს სიტუაციაში რომ არ აღმოჩნდეთ, მგზავრობამდე აუცილებლად შეამოწმეთ ავტომობილის გამართულობა, რამდენადაა ის მზად შორ გზაზე გადაადგილებისთვის. ჩაუტარეთ ელექტოდიაგნოსტიკა და დაათვალიერეთ დაკიდების სისტემის შემადგენელი კომპონენტები.

ნათურები: მათ უდიდესი როლი აკისრიათ ჩვენს უსაფრთხო გადაადგილებაში. წარმოიდგინეთ მოხვევის მანიშნებელი, ნათურის გარეშე მოხვევა ან შენელებისას ,,სტოპები“ რომ არ გინთებდეთ. მათი დახმარებით მოძრაობის სხვა წევრები ხვდებიან, რა მანევრის გაკეთება გვაქვს ჩაფიქრებული. ასე რომ, თუ რომელიმე მათგანი არ ანთებს, დროულად შეცვალეთ, რადგან ის ზრდის ავტოსაგზაო შემთხვევის მოხდენის ალბათობას.

ერთი სისტემა გავლენას ახდენს მეორეზე: თუ რადიოს ჩართვა იწვევს ფარების ნათების კლებას ან პირიქით, ფარების ანთება იწვევს ციფრული დისპლეისა თუ საათის გაჩერებას, მაშინ თქვენს ავტომობილს ნამდვილად აქვს ელექტრონული პრობლემა სისტემის რომელიმე ნაწილში. ანუ, თქვენი მანქანა ვერ იღებს საკმარის ენერგიას ყველა საჭირო ზონაში.

დამწვრის სუნი: თქვენი ავტომობილის სავენტილაციო არხებიდან გამომავალი ნამწვის მძაფრი სუნი, შესაძლოა, მიუთითებდეს ელექტრონული სისტემის გაუმართავობასა და პოტენციური ხანძრის წარმოქმნაზე.

გაითვალისწინეთ ზემოთ აღნიშნული ფაქტები, პერიოდულად შეამოწმეთ ავტომობილის გამართულობა, ხარვეზი არასდროს დატოვოთ უყურადღებოდ და ეცადეთ, დროულად მოაგვაროთ.

გისურვებთ მშვიდობიან მგზავრობას.

ამბოლი, მეტი დრო მოძრაობისთვის!