ბუნდოვნად განათებული სასტიკი ქალაქის ერთ მიყრუებულ გარეუბანში, სადაც ბოროტი აჩრდილები ისევე ებღაუჭებიან და ახრჩობენ ხალხს, როგორც ცოდვები ცოდვილს, ბავშვობის მეგობრები, დაუნდობელი თავებზე მონადირეები - ერნი და ვიპერი, გაუნძრევლად დგანან და ფოლადივით მტკიცე მზერით შეჰყურებენ ერთმანეთს.

ბოროტმოქმედებთან - სქაისთან და კოსმიურ მტვერთან, შერიფი დარკოს, ამ გულუხვი და ბრწყინვალე „კანონდამცველის“ მტრებთან, ანგარიში აქვთ გასასწორებელი... დამნაშავეებზე ნადირობის სეზონი გახსნილადაა გამოცხადებული!

ერნი ყინულივით ცივი თვალებით, ვიპერი კი, შხამიანი ღიმილით - ორი ერთმანეთის და კაცობრიობის ზიზღით გაჟღენთილი ადამიანი, ბნელ ღამეს, სისხლივით წითელი მთვარის შუქზე, აუჩქარებლად მიაბიჯებს სამართლიანობის აღსადგენად. მათი იარაღი, ერთის მხრივ კანონის, მეორეს მხრივ კი, შესაძლოა შურისძიების აღსრულებისთვისაა მომართული... გააჩნია, საიდან შევხედავთ საკითხს... ამ ქალაქში ხომ სამართალი მყიფე რამაა და ზღვარი გმირსა და კანონდამრღვევს შორის, უფრო თხელი, ვიდრე საპარსის პირი.

თავებზე მონადირეები უკვე ახლოს არიან მიზანთან. მტკიცედ აქვთ გადაწყვეტილი შეიპყრონ შეთქმულები და სამუდამო სასუფეველი უდაბნოს შეუბრალებელ მტვერში მიუჩინონ...

...................................................................

კაცობრიობის დაუნდობელ წიაღში, სადაც სხვების მიმართ ზიზღი, გადარჩენის და ძალაუფლების დამკვიდრების დაუოკებელ შიმშილად იქცევა, შური, სიძულვილი და სიბნელე ჭარბობს. ადამიანის გული, რომელიც ოდესღაც სიცოცხლით და სიყვარულით პულსირებდა, ახლა სისასტიკის და სიხარბის რიტმში ფეთქავს. ამ შეუბრალებელ გარემოში, სულიერება თანდათან იცრიცება, ქრება. მორალი იშლება, რაც ამ ქაოსის ფონზე, ავტომატურად გვაბრუნებს უკან, ძალიან უკან, ცხოველთა სამყაროში...